AFORISMA DIARIA [22-2-2007]

[Tuku 8:22 kalan, iha eskritóriu. Foin han kalan hotu iha kafetária PX—karil naan manu, no hemu serveja botir ida. La hatene marka saida. Dada lia oituan ho Mn Luzia, kona-ba kualidade edukasaun iha Kolejiu Soibada, Ossu, not sst.

Ha’u haksolok atu hatene ohin loromanas katak ha’u bele asesu fali ona ba ha’u-nia ‘blog’ sira. Ne’e katak ha’u la presiza tan fali ona osan ekstra atu ba iha internet Timor Telecom nian. Horiseik deit durante kuaze minutu 45, ha’u gasta $1.50. Husu boot katka buatamak sira iha IT la blokeia tan, hodi nune’e ha’u bele iha asesu livre ba ha’u-nia blog sira.

La hatene ohin kalan ha’u bele fila ba uma ka la’e. Horikalan ha’u toba deit iha eskritóriu tanba situasaun seguransa la permiti ha’u atu fila. Amor hatete horikalan katak ha’u, diak liu, toba deit ona iha eskritóriu. Ha’u mós tuir deit ritmu ne’e.

Udan ta’u maka’as ohin lorokraik ida ne’e. Horiseik mós hanesan ne’e. Ha’u aproveita tempu maka iha ne’e hodi halot sasan sira iha ha’u-nia meza servisu. Toka ho muzika isntrumentália, ne’ebé ha’u gosta. Mn Luzia mós halo ninia sasan.

Bainhira halot dadaun namanas sasan sira maka rungu-ranga iha gaveta meza nian, ha’u hetan fali nota oan ida ha’u haruka ba JRH hanesan ha’u-nia felisitasaun ba nia aniversáriu iha dia 26-12-2003. Memória servisu iha misaun UNMISET mosu fali ona iha ha’u-nia kakutak. Nota ne’e ha’u hakerek hanesan tuir mai:

------
Dili, 26 Dezembru 2003

Maun Zé Ramos-Horta maka ha’u respeita,

Ohin Maun halo tinan 54. Parabens! Husu boot Maun iha kbit nafatin atu hakat ba oin—hala’o moris ne’e hanesan individu ida no mós hanesan lider ida rai Timor-Lorosa’e nian.

Hanesan prenda oan ida ba Maun iha loron aniversariu ohin, ha’u hato’o poezia oan ida ne’ebé ha’u hakerek bainhira ha’u labuk iha tasi balu ne’eba. Maka ne’e:

-IN THE SPACE OF SUBLIME TRUTH-

I am free to fly!
I am free to sing!
I am free to dance!

Dala ida tan, “Many Happy Returns!”

Shalom! Hakoak boot,
ABÉ BARRETO SOARES
-----

Ami nain rua Mn Luzia mós depois dada lia oituan kona-ba situsaun Timor-Leste atual ne’eb’e nakonu ho violénsia. Ami iha idea han malu kona-ba oinsá atu kura moras psikolójika ne’ebé alin oan juventude sira sofre. Sim, sira presiza atensaun . Sira presiza domin. Domin sei halakon buat hotu.

[Amor foin haruka sms mai ha’u hatete: “Pai hau tauk los o fila ne? diak liu toba iha ktr ona.” . Ha’ u mós telefone kedas nia hodi hatete katak ha’u sei toba iha deit ktr ona ohin kalan… (tuku 8:40 kalan oras ne’e) ]

[Ha’u toma nota tiha ona kona-ba eventu horiseik no horikalan nian. Ha’u sei husik aban ka iha fin da semana maka ha’u sei hakerek barak kona-ba buat hirak ne’e. ….]

*) Atu komprende didiak realidade moris nian, ita presiza iha hanoin klean no iha fuan ne’ebé boot. Buka tama iha maluk “the haves not” sira-nia moris, hodi nune’e ita bele sinti oinsá maka sira sinti no hanoin.

*) Ita-nia istória umanidade nian nakonu ho ran, rungu-ranga iha fatin-fatin iha mundu rai klaran. Furak ba ita atu aprende, hodi nune’e ita sei labele repete fali hahalok sira ne’e iha tempu ikus mai.

[Tuku 8:57. Foin simu sms ida hosi Mize Sarmento hatete (ha’u sinti nia foin haree dadaun programa TVTL ne’ebé desde Outubru 2006 fó sai ha’u-nia reflesaun poétika iha kada Kinta kalan):

“He lalika halo bebeik poezia/dadolin iha tv, hare ba fahe fos rai manatuto nian ruma mai ami han, puisi la halo ami bosu ha….ha..”
(20:50;27/22-2-2007).

Ha’u hatan fali sms hodi dehan,
“Oi, hau hatene katak hau la bele fo hahan isin nian maybe hahan klamar nian. Hehehe..”
(20:53:32/22-2-2007)