AFORISMA DIARIA [7-2-2007]

[Nota aforisma sira tuir mai ne’e nu’udar kontinuasaun hosi nota sira ne’ebé ha’u halo durante viajen ba Manatuto, iha loron 5-2-2007.]

*) Lia midar, lia murak, lia osan mean haklaken barak tiha ona iha ita-nia dalan moris bainhira ita halo viajen naruk ida ne’e.. Saida maka ita presiza atu halo maka buka atu halibur no halot no orna didiak iha ita-nia pensamentu no sentimentu.

*) Demokrasia katak sa? Demokrasia katak ita konkorda atu diskorda malu.

*) Hala’o demokrasia hanesan mós ita kaer manu oan ida iha ita-nia liman tanen rua: bainhira ita loke liman halo belar, manu oan ne’e sei semo lakon, no bainhira ita buti metin ita-nia liman, manu oan ne’e sei dada iis la diak, no sai mate deit.

*) Haraik an la’ós sai ata ba ema seluk. Haraik an nu’udar virtude ida.

*) Edukasaun tulun ita atu kore ita-nia an hosi nakukun oinoin, ne’ebe falun metin ita. Maibé ita tenki hanoin katak karik la lori nakukun, ita sei la hetan matenek.

*) Fatuk ho ai iha tilun. Keta naran ko’alia tun, ko’alia sa’e.

[Notas hirak tuir mai, ha’u hakerek bainhira hola anin iha jardim tasi ibun palasiu Governu nia oin, tuku 2:30 loromanas, loron 5-2-2007]

*) Buat hotu iha moris ne’e iha nia sasukat rasik tiha ona. Midar liu ladiak. Moruk liu mós ladiak. Hanesan mós kafé no xá maka ita hemu. Susu been mós hanesan nune’e; bee barak liu, ita hemu, ita kabun moras, no susu been barak liu, ita hemu, ita kabun moras.

*) Hanesan artista ita deve barak ba situasaun rungu-runga. Normalmente, iha situasaun sira rungu-ranga maka artista sira hetan maka’as inspirasaun atu hamosu sira-nia obra. Absurdu, loos ka la’e? Maibé ne’e realidade.

[Iha Tropical Bakery, hein hela atu han kalan. Han sop sapi. Tuku 8 ona; 5-2-2007.]

*) Iha mundu globalizasaun ohin loron, ita presiza buka oinsá atu prepara ita-nia an atu sai didiak nasionalista ida, no iha tempu maka hanesan sai internasionalista ida.

[Iha portaun prinsipal Obrigado Barracks. Tuku 9:35 kalan. Hein hela shuttle bus atu fila ba uma.]

*) Atu sai intelektual ida, ita presiza iha laran badinas atu halo pergunta ba bebeik. Presiza kadi bebeik tudik análiz, hodi nune’e ita bele observa didiak realidade moris ne’e nian.

[Bainhira dadeersan tuku 8 resin, loron 6-2-2007, iha kareta leten, aranka ba servisu, hetan boleia hosi Amor-Iam. Ami dada lia.]

*) Atu ko’alia buat ida, ita tenki hanoin uluk maka ita foin ko’alia tanba keta halo, to’o ikus, ita rasik duni maka lambe fali ita-nia kabeen.