AFORISMA DIARIA [30-10-2007]

[TT Akait oras ne.e Ohin iha 12:30 almosu ho kolega Amerikana, Cindy iha Riung Kuring, Mandarin. Ami dada lia barak kona-ba kna'ar literatura iha dezenvolvimentu umanu, nst ...]

*) Buka hakerek buat ne'ebe o hatene, no buat kiik oan sira iha moris, ne'ebe dala barak ema ladun fo importansia.

AFORISMA DIARIA [29-10-2007]

[TT Akait fali ona. Lori ho laptop hodi atualiza blog ne'e hanesan iha 25-10 liuba.
Rai manas loos. Kompara ho Dili, Manatuto manas liu. Iha Sabadu, 27-10, ha'u lori Apai ho Amor ba vizita rate Papa nian. Apai foin maka vizita rate Papa nian no Manatuto desde nia moris besik halo tinan ida ne'e. Abati ho Lazata ba hotu, no mos Esnesto ho Ricky. Ba Manatuto, Ernesto maka lori kareta metan, no mai fali ha'u maka lori.. Vizita ida ne'e nu'udar vizita ida ne'ebe nakonu ho emosaun. Ha'u tanis maka'as iha Papa nia rate, no iha ninia kohe nia oin iha Uma Aiteas....]

*) Malus maran/Kohe matebian/Ahi oan lilin/Sunu halo lakan/Keta koko atu hamate/Keta koko atu fila kotuk/Ne'e ita-nia hun/Ne'e ita-nia abut//

*) Ita-nia istoria umanidade nakonu ho pintura furak no risku sira ne'ebe buradu. Istoria, la seluk la leet, sai nu'udar lalenok boot ba ita atu leno ita-nia an; atu hatene ho klean se loos maka ita.

*) Keta dudu ha'u ba didin lolon ho o-nia diman no surik. Ha'u la hanoin barak: ha'u sei buka defende ha'u-nia an, entre mate no moris. Hafoin tiha ha'u reaze maka'as ba o, o dehan fali ha'u malkriadu? Bullshit!

AFORISMA DIARIA [25-10-2007]

[TT Akait oras ne'e. Semana rua nia laran, ha'u la atualiza blog. Ha'u preokupa ho moris nia segmentu seluk. Sei ferias. Ha'u halo tempu barak liu iha uma; sulan deit; lee libru, haree televizaun, halot uma laran, haree Apai, no deskansa-toba maka barak,nst.. Sulan demais, no preokupa ho aitarak moris nian balu ne'ebe ezije atensaun tomak, halo ha'u kuaze lakon vontade atu hala'o ha'u-nia moris. ...Alias stress...]

*) Nai, atan ha'u foer/atan ha'u dois, dois la halimar, tanba ha'u monu ba sala dala fila-fila/Iha Ita Boot-nia ain hun, ha'u folin laek ona/Sunu ha'u halo mutuk didiak ba/ ho Ita Boot-nia ahi Santu nia nanal dikin/No husik atan ha'u sai ahukdesan/ no nune'e tiha Ita Boot sama ha'u ho Ita Boot-nia ain tanen//

*) Mestre nia lian sempre bolu ita/ iha dezertu fuan laran nian/Mai ita rona/Mai ita traduz lian ne'e ba iha lian asaun nian//

*) Tasi mosu bebeik/Ita deit maka mai iha tasi ibun ida ne'e, troka malu/Fihir an iha rai henek leten//

*) Dili tau matan, Dili se tilun, Dili tau neon ba ita. Ita deit maka dala barak halo finji, tilun diuk, no matan delek....

AFORISMA DIARIA [11-10-2007]

[TT Akait oras ne'e. Loron sanulu resin maka ha'u la atualiza blog ha'u-nia sira ne'e. Ha'u-nia planu atu atualiza momentu ha'u iha Kuta, apenas esperansa deit. La konsege realiza. Ha'u-nia tempu momentu iha Kuta, ha'u buka atu fo tomak ba Amor ho Apai. Ne'e duni ha'u kuaze laiha espasu ba ha'u-nia an--atu hakerek, no ba internet. Buat barak maka tuir loloos ha'u atu hakerek..
Loron haat ona maka ha'u sama fali rai TL depois de semana rua resin ha'u ba 'hola anin' iha illa "Dewata" alias Bali.
Kondisaun tempu maka manas la halimar iha loron rua ka tolu liuba halo ita kuaze atu la tahan.
Tuir loloos mos ha'u atu hakerek buat barak durante loron hirak fila mai TL ne'e. Ha'u seidauk iha tempu. Ne'e razaun klasiku ida, konserteza.Haree deit..
Ohin Papa nia loron hakoi-halo tinan 3 fulan 10. La hanesan babain, ha'u , ba loron Papa nia mate ne'e , la tenta haruka mensajen ba alin no bin sira. Ha'u desidi haruka deit mensajen ne'e ba ha'u-nia an rasik:

//IN MEMORIAM PAPA SEBASTIAO/ita ida-idak/hakat ba rate/hamulak/harohan/sunu lilin/Papa la taka matan/Papa la taka tilun//
(11-10-2007/08:36 AM)

***

*) Mestre loloos nian ida tenke hatene katak nia tenke halakon nia an, no hakiduk ba kotuk hosi palku leten iha loron ida. Hodi nune'e, nia sei husik eskolante sira hatutan no haklaken liutan ba ema seluk saida maka nia hanorin tiha ona ba sira. Nia naran ema sei temi. Nia ain leut ema sei la'o tuir.