Monday, May 28, 2007

AFORISMA DIARIA [28-5-2007]

[Agora ha'u iha ETDA nia sentru treinu iha Fatuhada. Ohin dadeer ha'u mai tuir workshop kona-ba Compat International hanesan durubasa. Tuir loloos ha'u mai tuir mos iha Sabadu liuba, maibe tanba ha'u ba halo fali servisu hanesan durubasa ba reuniaun VRESJ nian hamutuk ho PR Ramos-Horta ho partidu politiku sira iha OB, ha'u la jadi mai. Hau-nia kolega seluk ida maka mai troka fali ha'u. Foin primeira vez maka ha'u mai iha sentru ne'e. Ha'u iha impresaun diak ho kondisaun sentru nian maka furak... Deli Boot, Noi no Mana Zinda sira mai tuir treinu iha ne'e. ....]

*) Loromatan sa'e ona. Ita keta toba resin. Ita tenki, tuir loloos, buka atu hadeer molok loro matan sa'e.

Wednesday, May 23, 2007

AFORISMA DIARIA [23-5-2007]

[ Foin almosu iha OB. Dada lia oituan ho Jaime da Silva, kolega Manatuto oan ida ne'ebe uluk ami eskola hamutuk iha eskola primaria. Oras ne'e nia iha oan hitu ona. Ami troka impresaun hanesan Manatuto oan...Ha'u mos ohin sinti satiadu no triste tanba foin simu fali informasaun hosi ha'u-nia Xefe, Joel katak ha'u sei la hetan autorizasaun atu ba foti ferias--anual leave tanba razaun administrativu (enkuantu ha'u-nia Xefe Vera foti ferias, ha'u labele sai ba fatin ida. No mos oras ne'e, ha'u maka lori kargu nu'udar OIC).
Figuraun!! Ha'u-nia planu atu ba Australia, tuir Festival Eskritor fulan ida ne'e kala sei kansela hotu..Ha'u la bele halo buat ida....Filha da Mae!!! Ha'u-nia alin Mundu kala hein loos nia sapatu atu sosa ne'e...
Horikalan ha'u simu SMS hosi Mundu katak tanba loron 11 ha'u la update ha'u-nia blog sira, nia mos hanesan leitor ida, nia mate suri.. Ha'u promete ba nia ohin dadeer katak ha'u sei update ha'u-nia blog sira....]

*) Relasaun familiar iha uma kain ida nu'udar feen ho laen ejiji bebeik esforsu atu halo balansu entre 'atensaun ba familia' no 'atensaun ba feen/laen'. Se lakon ona ekilibru, entaun ne'e susar boot.

*) Moris nakonu ho buat maka ita la espera. Ita presiza prepara an atu enfrenta realidade ida ne'e ho fuan ho laran tomak...

*) Ita-nia oan sira maka sei hatutan no haburas ita-nia tradisaun. Hanesan ha'u hatete dala barak ona katak sira maka ita-nia sanak no dikin, no ita maka nu'udar hun no abut.

*) Manatuto hanesan rai klaran, rai husar iha kna'ar boot atu hakoak Loromonu no Lorosa'e. Bainhira parte rua ne'e iha tensaun, manas, no nakali, entaun Manatuto tenki hamrik hodi akalma sira nain rua. Hanesan maluk Nuno dehan, "Lelomonu ga sau, Lelosa'e ga sa'u".

Tuesday, May 22, 2007

AFORISMA DIARIA [22-5-2007]

[Hafoin loron 11 maka ha'u mai fali atualiza blog ne'e. Foin almosu ho David Ramos Castro, maluk Espanol ida ne'ebe foin lalais ne'e ha'u konese. Nia ema ida maka gosta literatura. JP maka fo konese ha'u ba nia. Ami hasoru malu ba dala uluk iha loron 16-5 bainhira espozisaun ha'u-nia poezia ho pintura hahu hala'o iha Fundasaun Oriente.....Buat barak maka atu hakerek. Ha'u-nia viajen no ferias ba Bali no Java foin lalais ne'e to'o oras ne'e seidauk hakerek....]

*) Poeta/poetiza ho ninia poezia mosu hanesan bee maka turu oitu-oituan, hafura fatuk maka toos...

Friday, May 11, 2007

AFORISMA DIARIA [11-5-2007]

[TT Akait. Tuku 2:09 loromanas. Foin almosu ho Toze iha Alpha ho Omega. Entrega konvite hosi PR XG ba seremonia despidida aban iha nia rezidensia ba Toze....
Horiseik ha'u ba Toze nia aula, fo palestra ida kona-ba "Influensia Literatura Portugeza iha ha'u-nia kareira literaria" iha UNTL. La'o furak. Ha'u hetan permisaun hosi servisu fatin hodi hala'o atividade ne'e.....]

*) Umanidade: klamar ida, isin barak-barak. Hamrik ketak-ketak, hananu hamutuk.

*) Prosesu hakerek poezia: iha asaun iha moris, no poeta sira-nia knaar maka hala'o apenas reasaun ba asaun maka iha tiha ona.

Tuesday, May 8, 2007

AFORISMA DIARIA [8-5-2007]

[Oras ne'e fila fali mai TT Akait. Almosu ho Toze, Mara, ho kolega sira seluk. Ami rua Toze halo koresaun ba manuskritu poema sira ne'ebe atu publika no hatudu iha espozisaun iha versaun Portuges.....]

*)Movimentu Romantismu iha literatura Ingleza fo kbiit mai ha'u atu esplora fali liutan Timor-Lorosa'e nia murak no kmanek. Ha'u agradese ba Nai katak ha'u iha oportunidade ba iha universidade, no estuda literatura Ingleza iha tinan hirak liuba.

*) Literatura mos iha nia kna'ar importante atu ajuda dezenvolve karakter nasaun ida nian. Ho nia espiritu persuasivu, literatura konvida ita atu luku klean liutan iha tasi realidade moris nian.

Friday, May 4, 2007

AFORISMA DIARIA [4-5-2007]

[Agora iha TT Akait. Amor ba tiha ona uma, haree Apai. Ha'u la almosu ida tanba ohin ha'u foin matabixu iha OB iha 10:45 dadeer, hau sinti kabun sei bosu. Ha'u hemu deit sumu goiava ida iha restaurante Alpha & Omega.
Furak atu observa ema sira maka la'o ba la'o mai: labarik oan sira; feto no mane faan aifuan, bani been, no estudante universitariu sira. Kareta ho motor barullu.. Horiseik la mai halo 'update' ha'u-nia blog sira tanba almosu ho Mara, Toze no Senora Fatima hosi Embaixada Portugal. Iha almosu ne'e, ne'ebe hala'o iha Hotel Timor, ami ko'alia kona-ba projetu kultural--espozisaun ha'u-nia poezia no pintura Yahya nian, no mos publikasaun ha'u-nia livru bazeia ba poezia no pintura sira ne'ebe produz iha tinan 2005 liuba. Toze mos informa mai kona-ba novidade foun-konvite hosi Portugal mai ha'u atu ba tuir feira livru nian ida iha tinan ida ne'e, la hatene loos sa fulan.....]

*)Poeta? Se maka nia? Nia nu'udar "reminder" ida ne'ebe fo hanoin mai ita atu hadeer beibeik hodi hateke 'tun' ho 'sa'e' realidade ita ema-nia moris. Nia ema mehidor? Bele mos ita hatete hanesan ne'e. (thinking of John Lennon's song, "Imagine" wih its line, "You may say I am a dreamer, but.. I am not the only one..)

-PANOROMA POLITIKA TIMOR-LESTE NIAN-
*)Xanana
manu aman mutin/sikat buri, sikat jala
hafetu tuir oras/ la tau tara
molok sarebak/ manu maten ita foti//
--
*) Interesante atu observa slogan "Maubere Tasi" no "Maubere Foho" durante kampana prezidensial iha segunda ronde ne'e.
*)demokrasi timor-leste nian buras. sei nurak. sei lori tempu atu tasak.
*) Vox Populi, Vox Dei, aforismu ida ne'ebe tuan maibe sempre relevante hosi tempu ba tempu. Iha koteksu TL nian, ema barak husu katak povu sei votu tuir nia konsiensia rasik.
***

Wednesday, May 2, 2007

AFORISMA DIARIA [2-5-2007]

[Fila fali mai iha XRR oras ne'e. Almosu tiha ona iha OB. Dada lia hamutuk ho Ceu no Laila kona-ba politika rai laran ne'ebe iha relasaun ho eleisaun prezidensial..
Semana ida resin ha'u la atualiza ha'u-nia blog sira ne'e tanba ha'u ba tiha ferias. Durante ferias, tempu maka laiha ne'e duni ha'u la konsege atualiza. Hau sei hakerek kona-ba ha'u-nia viajen ferias ne'e iha edisaun tuir mai...]

PANORAMA POLITIKA TL NIAN
1. Agora ita atu tama dadaun ona eleisaun prezidensial segunda ronda. Ema hotu hein katak, eleisaun sei la'o ho susesu.
2. Hosi kandidatu rua ne'e: JRH no LO, ida maka manan mos, ema hotu tenki hakruuk ba rezultadu eleisaun. Maibe, kandidatu ne'e tenki manan ho didiak alias laiha kaska malu. Hodi nune'e, moris nasaun nian sei la'o didiak tuir saida maka ema barak hakarak.
****
*) Istoria pasadu nian sempre sai referensia ba ita ema nia moris. Naran katak ita maka labele baruk atu aprende hosi referensia ne'e.
*) Ha'u sei la toba dukur ho didiak bainhira ha'u-nia ran rasik moris iha terus no susar nia laran.
*) Eskritor/a sira nu'udar koletor/a "fosil" tempu nian. Sira ema bulak ka?