AFORISMA DIARIA [29-7-2008]

[ Tuku 10:30 AM ona. Rai loron furak..Loron ida tan ha’u tama fali servisu ona. Ha’u hein katak ha’u sei tama servisu fila fali ho espiritu foun, enerjia foun. Ha’u laran susar oituan ho Apai maka moras—kabun moras,no isin manas-sa’e tun,sa’e tun desde Sesta kalan liubá hanesan ha’u hatete tiha ona. Nia foin dadaun liubá tee been no muta.. Tanba de’it Apai moras ne’e mak ha’u tenta la prenxe ha’u-nia férias ho atividade seluk maibé buka atu haree Apai.

Ha’u-nia atividade programa “Anin Naniri” iha RTL la hala’o tanba maluk sira prenxe tiha ona ho sira-nia gravasaun rasik iha Dominguu kalan, 27-7. Afinál, ha’u prepara tiha ona atu prenxe ho obra eskritór Indonézia, Sitor Sitomorang nian.

Horiseik..loron tomak, la’o liu—ha’u sulan de’it iha uma, haree Apai maka mal dispostu.. Lorokraik mak ami nain rua Amor ho Kaka Nia lori Apai ba hasai raan, no ba konsulta. Depois kalan tuku 7 ami ba vizita Enti, Bati no Ziña sira iha Usindu. Apai gosta halimar ho Félia no Nelvia sira... Uma oin Uma Usindu matak. Haas fuan tebar..Ami janta iha Zinha sira....]

*) Dili sai tiha ona testemuña ba ema mate lubuk/Dili sai tiha ona testemuña ba ema moris lubuk/ Dili hakruuk/Dili nonok/ Dili hakat ho laran tanis/ Dili hakat ho laran haksolok/hasoru loron aban//

*) Sei sinti la furak bainhira nasaun ida ukun an tiha, nia ema sira rasik haree fali ema rai seluk hosi rai liur mak mai sai fali “boss” iha sira-nia rain halo bara-barak, no sira rai nain sira sai fali “matros”.

*) Tasi ita-nia belun/Foho ita-nia belun/Ai-laran ita-nia belun/Ita keta sona borus/Ita keta halo rahun/Halo aat, ita mak sei leki/Halo aat/ ita maka sei lakon leet//

*) Ha’u sei hamnasa kabun moras bainhira haree ó “berlagak” sai moralista, maibé afinál iha kotuk ó ne’e sai “um grande sacana”. Moris ne’e nakonu ho “sandiwara”.

***