AFORISMA DIARIA [18-7-2007]

Illa Deuza nian, 17-7-2008

[Illa Deuza nian simu ha’u ho ha’u-nia familia ho fuan ho laran malirin. Ha’u hetan kbiit liután atu kontinua hala’o ha’u-nia viajen—esprituál no fíziku. Ha’u hakarak kontinua lori ha’u-nia kruz, sa’e ba to’o iha Kalváriu tutun..]

*)Ha’u promete tiha ona ba ha’u-nia an katak ha’u hakarak kontinua sai mestre no eskolante dala ida ba ha’u-nia an rasik. Ha’u hakarak aprende buat barak hosi sala hirak-ne’ebé ha’u komete tiha ona; sala hirak-ne’ebé hamosu konfuzaun no tensaun oinoin. To’o ikus, ita-boot sei iha nafatin korajen atu kontinua dehan katak ha’u ema bosok-teen? Ha’u la hatene, sá sentimentu mak ita-boot sei iha bainhira ita-boot mak iha to’ok ha’u-nia pozisaun ida hanesan ne’e? Apakah seorang yang sudah bersalah, kemudian kita terus hakimi, dan menjatuhi dia hukuman, tanpa adanya kesempatan untuk pemberian ampunan?

*) Ha’u sei la hakfodak, tanba de’it ha’u-nia hahalok kleuk—hakanek tebes ita boot-nia fuan laran tomak, no ita-boot, to’o ikus, foti liman hasoru ha’u, no la bolu tan ha’u hanesan ona uluk baibain ita-boot bolu ha’u. Laiha buat ida. Maluk, ha’u sei la hirus. Maluk, ha’u sei la rai ódiu ba ita-boot. Ha’u husu boot de’it katak ha’u sei kontinua iha pasiénsia hodi simu realidade ida-ne’e. Bele dehan mós katak ne’e konsekuénsia lójika ida-ne’ebé ha’u labele halais sees. Ne’e nu’udar mós kruz todan ida-ne’ebé ha’u tenke lori, no tula iha ha’u-nia kabas, hodi hakat, sa’e ba to’o ba ha’u-nia Kalváriu tutun.

*) Ha’u promete, ita kala sei la hamutuk ona, to’o de’it rai ne’e nabeen. Maibé hosi distánsia dook, ha’u sei kontinua hakarak atu haklaken ha’u-nia domin ba ó; domin ne’ebé hetan tiha ona purifikasaun hosi naroman lalehan nian.

*) Ha’u promete, bainhira ó mate tiha ona, ha’u kala sei ba hakbesik ó-nia mate isin hodi halot ó iha rai kuak ho didi’ak. Ó nu’udar ha’u-nia sorin balun ida-ne’ebé uluk ita moris hamutuk iha uma kain ida. Ha’u labele nega katak raan ne’ebé suli iha ita-nia oan sira isin lolon ne’e, raan ita nain rua nian, ne’ebé purifika tiha ona ho raan aliansa foun nian.

*) Ha’u hakarak fase tebes ha’u-nia isin ho klamar ne’ebé foer, no mós nakonu ho iis tahu dois, ho ha’u-nia fuan ho laran tomak. Ha’u hakarak fakar mina-morin “arependimentu” nian iha Na’i, uma lulik no matebian sira nia ain hun. Ha’u komprende katak ita-boot sei la fiar. Ha’u komprende katak ita-boot sei kontinua hamanasa. Ha’u komprende katak ita-boot sei kontinua laran sei la malirin. Maibé, permite netik ha’u atu hamosu pergunta ida ba dala ikusliu, sei to’o tempu ruma ba ita-boot atu muda ita-boot nia hanoin no sentimentu ka? Ah,Only God knows!