AFORISMA DIARIA [14-7-2008]

[ Tuku 8:23 dadeer. Morning! Ha'u sei nafatin rai Java...Sei kontinua hala'o viajen fiziku no espiritual. Dalan nakonu ho aitarak. Dalan nakonu ho kleuk. Ha'u sidi, no sidi la oras... Ha'u monu, no hadeer fila fali... Ha'u hakarak la'o, buka tuir Mestre no mestre sira seluk nia ain fatin.....]

13 Jullu 2008 [tuku 5:03 PM]

[Am still somewhere in the land of old Javanese Kingdom, Majapahit. Hala’o hela viajen—tantu fíziku no espirituál.

Figuraun, tanba de’it okupadu ho buat seluk, dala ida tan ha’u haluha loos Papá-nia loron mate no loron hakoi.. Papá, perdaun!......

Lakaleur (loron tolu tan) ha’u sei hasoru Apai, Amor ho Kaka Nia maka oras ne’e iha ona Illa Dewata. Sira to’o horiseik hosi Dili. Ami sei pasa férias hamutuk, no depois loron haat tan mak ami fila fali ba rain doben, TL.]

Percik-percik permenungan: [ba dala ida ne’e, ha’u konsege hakerek barak, tanba inspirasaun mosu, ha’u tahan labele..]

*) Lia loos ne’e hanesan foho vulkanu, sedu ka tarde, sei rebenta. Se la sala, ha’u hatete tiha buat ne’e ona iha tempu liubá. Bainhira rebenta ona, sei mosu rai bokur, dubun foun sei mosu, haburas foho lolon, no rai tetuk. Bainhira lia loos fakar sai ona, entaun sei iha armonia, rekonsiliasaun, no sei iha dame.

*) Ita hotu ne’e e mesak ema maksalak, hakat iha dalan nakukun, durante tempu naruk. Ita-nia egoismu bobar metin ita-nia an; ita sai matan delek, fuan tomak, laran laiha, neon laiha, kakutak la joga. Ita hakenek maluk sira seluk nia fuan no neon. Sinti ba dalan laiha hotu ona atu ko’alia. Saida teni maka ita sei bele defende ita-nia an, no ko’alia sé karik bandeira konfiansa nian ita la dada sa’e ona iha ita-nia “pelataran kehidupan”?

*) Buat hotu ne’ebé ita halo, atu ki’ik ka boot, sempre iha konsekuénsia. Husu boot de’it ita sei bele luku klean liután iha tasi “berpikir dan berjiwa besar” nian, hodi nune’e ita sei iha korajen atu simu konsekuénsia sá de’it maka sei mosu iha ita-nia oin.

*) Tan de’it ita-nia hahalok kleuk, ita-nia midar sira hotu ne’ebé durante ne’e iha, semo lakon hotu. Buat hotu sei sai moruk. Sei iha oportunidade no espasu atu halo fali buat sira-ne’e sai midar fila-fali hanesan uluk?

*) Kbiit ita ema nian lakon hotu ona. Nakukun, konserteza, sei falun metin ita hotu. Kbiit Ahi-oan Domin sei lakan, sei fó roman ne’ebé rohan la’ek, karik ita sei rai fiar oituan balu ba kbiit ida-ne’e.

*) Ha’u prontu atu sai hosi sirkulu amizade ita-nian sé karik istória hakarak buat ne’e sai hanesan nune’e duni. Kondisaun realidade moris nian ne’ebé nakonu ho antagonista, dudu ha’u atu hakiduk duni ba kotuk. Hosi dook, la ho dúvida, ha’u sei hateke no apresia panorama amizade nian ne’e ho saudades tomak, alias ho laran taridu. No aban, ha’u fiar katak loron matan sei mosu fali hanesan baibain iha orizonte ne’ebá. And I will be ready to sing my solitary tunes with all the strength that I still have.

*) Ha’u hatene katak susar ba maluk sira atu lolo perdaun oan ruma mai ha’u tanba ha’u-nia hahalok mak la tuir dalan ita ema moris nia hakarak. Karik nune’e duni, entaun ha’u sei husik tempu mak sei determina nia performance rasik—oinsá buat hotu sei haklaken. Ha’u labele nega katak ho laran kanek, no mós fuan moras, ha’u sei hakat mesak, la’o iha ambiente labirintu solitude nian.

[ sei nafatin 13-7-2008, tuku 9:21 kalan.]

*) Ódiu ho vingansa sei hamosu tan violénsia karik ita la kanaliza didi’ak buat rua ne’e iha ita-nia moris. Korente boot ne’e nunka mais kotu. Maski iha ódiu nia leet, no mós kondisaun ida-ne’ebé nakonu ho tensaun, dalan di’ak liu mai ita atu tuir mak ne’e: ita tenke prontu atu hasa’e bandeira domin no dame nian halo aas iha ita-nia moris nia foho tutun.

*) Ami monu tiha ona ba tahu laran ne’ebé nakonu ho iis dois. Tahu laran ne’e naruk no mós klean. Ami isin sai foer hotu, konserteza. Book an ladi’ak. Tahu kuaze halo ami mout ba bee kidun. Teki-tekis mosu Samaritanu ida. Nia dada ami sai husi tahu laran. Na’i, ami agradese ba Ita-Boot tanba Ita-Boot loke duni maluk Samaritanu ne’e nia fuan ho neon hodi simu fali ami “as the way we are, and not the way we should be.”

*) Maluk, keta rai ódiu, ketas rai hirus. Buka meius atu kontrola an, no labele atu tau liman hasoru ema seluk. Ó sei hanoin Mestre nia liafuan katak, “bainhira ema basa ó-nia hasan sorin, se tan hasan sorin ba nia atu basa.”?

*) Funu moris tiha ona. Funu trambe loos hanesan ahi han uma. Maluk, ó sei hakarak atu fui tan gazolina?

*) Kabeen maka tafui, se bele, ita labele lambe fila fali.

*) Hakarak atu sai asuwain? Tenke kumpri buat tuirmai: “berani karena benar, dan takut karena salah.”

*)Moris nia beleza no haksolok sei semo lakon iha ita-nia leet, se karik ita la tane buat tolu tuirmai ne’e: etika, lójika no estétika, hanesan bee kopu ida la nakfakar.

*) Ha’u sei bele halo tuir nafatin Mestre nia liafuan ne’ebé hatete katak, “hate the sin, and not the sinner.”?

*) Hatete katak, “I am sorry, I was wrong.”, hatudu katak “human being is not perfect.”

*) Hatete no rekoñese katak, “I was a real bastard. I have hurt many people’s feelings. And, overall, I have made the whole world unholy.”, hatudu katak “hosi dalan nakukun, ita la’o ba hetan naroman.” (hanoin fali Papá nia liafuan).

*) Mundu ita-nian nakonu ho buat kroat. Iha tendénsia ba ita atu kadi buat kroat sira-ne’e, no hamosu raan nakfakar iha fatin-fatin. Are you called to take the sword, and shed the blood, or are you called to raise the flag of peace, and let it fly high at the centre of our universe?

*) Na’i, Ita-Boot de’it mak Santu, Ita-Boot de’it maka boot liuhotu. Na’i de’it mak liurai. Na’i de’it mak ukun ho lia loos no domin. Hori uluk, hori otas kedas. Lolo mai ba, lolo mai atan ha’u perdaun lalehan nian!

*) Mestre, ha’u hakarak subar an metin iha lalatak Maria Madalena nian. Keta soe ha’u, keta husik ha’u. Keta halo ha’u monu, no monu dala fila-fila.

*) Mestre, ha’u-nia ibun toos, ha’u nanál metin.Ho sá liafuan tan maka ha’u bele haklaken agradesimentu ba Ita-Boot tanba Ita-Boot nia laran luak no maus, no tanba Ita-Boot kura ha’u-nia kanek bubu sira ho mina azeite domin nian?

*) Ita dala barak iha tendénsia atu dudu maluk seluk ba didin lolon. Ita la fó fatin ba maluk ne’e atu dada iis. Ita la fó oportunidade kedas ba maluk ne’e atu tuur ko’alia, defende nia an. Maibé, to’o ikus, maluk ne’e konsege defende an, no kaer liman hasoru ita. Nune’e tiha, ita sei iha korajen hodi dehan tan katak maluk seluk sira ne’e mak mesak ema “trouble maker” sira de’it. Jesus, holy cow, give me a break!

*) Iha metan, ita hetan mutin. Iha mutin, ita hetan metan. Ah, moris ne’e nakonu ho absurditas! How should I behave?

*) Ba ita ema, sempre iha limite ba buat hotu. Maibé, ba Na’i, “nothing is impossible”. Ho Na’i nia kbiit, ita sei kore ita-nia an hosi opresaun sala nian. Thank you, Lord, Oh my Almighty, my Savior, my Protector for your blessing mercy!

*) Iha ó-nia matan, ha’u hateke borus lalatak Mestre nian no Judas nian mós. Ha’u la hatene loos, oinsá mak ha’u bele haklaken ha’u-nia an ba ó?

*) Atu hakarak ka lakohi, dala barak ita uza máskara iha ita-nia asaun moris loron-loron. Ita hotu-hotu hala’o buat ne’e, maibé nia degrau mak la hanesan: balu uza barak buat ne’e, balu natoon de’it, no balu oituan liu. Ita bele bosok ema seluk, maibé ita bosok la hetan ba Maromak, matebian sira no uma lulik. Ah, teki-tekis ha’u hanoin fali provérbiu, “tak ada gading yang tak retak.”

*) Atu oituan ka barak, ita ema ne’e sempre rai segredu—segredu ne’ebé nakonu ho morin, no barak liu mak nakonu ho iis dois la halimar. Segredu ne’e refleta duni ita-nia vulnerabilidade hanesan ema kriatura ida-ne’ebé dala barak susar atu livre tebes hodi labele monu ba sala. Ita iha kbiit atu enfrenta vulnerabilidade sira ne’e hotu ho aten barani ka la’e?

***

14-7-2008
Tuku 6:34 AM

*) Mestre, tanba sá maka Ita-Boot tenke hili ha’u sai Ita-Boot nia eskolante? Ha’u ne’e folin sá teni? Ita-Boot haree rasik ho matan katak ha’u-nia isin no klamar nakonu ho tahu iis dois. Maibé, se karik ida-ne’e nu’udar bee kalis ida maka ha’u tenke hemu duni, entaun, ha’u sei halo tuir de’it ho saida maka Ita-Boot rasik hakarak. Ha’u prontu atu nega ha’u ha’u-nia an, tula kruz todan iha ha’u-nia kabas, no la’o tuir Ita-Boot nia ain leut.