AFORISMA DIARIA [22-7-2008]-2

22-7-2008

[Tuku 9:53 AM. Múzika Accoustic Alchemy lian oras ne’e. Ha’u tuur varanda, hakerek nota reflesaun ida-ne’e.

Ohin dadeer tuku 6:45 AM, depoisde halimar oituan ho Apai bainhira nia hadeer, no troka ni pampeers, ha’u ba tasi ibun, atu hala’o fali ha’u-nia ‘rituál kontemplasaun’ hanesan baibain.

Lalehan iha tasi ibun ohin malahuk. Loromatan subar an iha kalohan leet. Tasi nia laloran. Roo rua atraka tasi laran: ida kala roo mina nian, no ida fali roo mutin ospitál tropa EUA nian.

“Percik-permenungan” tuirmai mosu kuandu ha’u tuur tasi ibun:

*) Literatura konvida ita atu fila fali atu observa (meneropong) ita-nia espasu fuan ho neon nian. Literatura ajuda ita atu halo diálogu franku ho ita-nia an rasik. Ita hetan lia-murak, ita hetan lia-midar, ita hetan lia matak-malirin.

*) Ita-nia (ami-nia) família nia morin, ema horon tiha ona lemo-lemo. Nia iis dois mós ema horon tiha ona. Ita (ami) sai hosi família boot rua ne’e. Fásil ba ita atu horon nia morin. La’ós fásil atu horut nia iis dois. Ita (ami) balu hamorin família nia naran. Ita (ami) balu hadois, konserteza. Tanba de’it nia iis dois, ita (ami) barani loke ibun, halo juramentu katak ita (ami) di’ak liu soe maulu, nega malu? Ah, husik ba istória mak sei konta....
--
Percik permenungan iha tuku 9:14 AM:

*) Bee kopu ida mós bainhira ita fui nakonu, bee ne’e, to’o ikus, sei nakfakar. Ita ema nia pasiénsia mós iha nia limite. Ita keta abuza. Kuandu abuza, ita mak sei buka lia merik.

***