AFORISMA DIARIA [27-7-2008]

[Oras ne’e tuku 8:26 AM. Ohin loron Domingu, loron relaxa nian. Ha’u hadeer tarde loos iha tuku 8:15.Apai toba haklena iha sala família nian, haree hela video animal, no hemu bee hosi nia bibiroon. Derepente nia halai mai hakoak ha’u tanba nia tauk, haree labarik sira iha video, hatais roupa hanesan kulit animál fuik sira nian.

--
Ami rua Amor lori Apai ba konsulta iha Ospitál Nasionál horiseik, tuku 10 AM. Hetan aimoruk iha ospitál balun hosi reseita doutora Lucia nian. Apai isin manas ne’e pode ser tanba nia nehan mak atu moris tan.
Horiseik tuku 4 PM, ha’u hahú fali atividade hanorin Inglés iha UNTL depoisde semana tolu ha’u la mosu iha aulas tanba ha’u foti férias. Kontinua fanun fali alunu/a sira ho idea filózofika sira.

Ha’u-nia atividade sosiál kulturál semana liubá, bele sumariza hanesan tuirmai:

-22-7: atende festa aniversáriu Chris Metan nian iha LABEH, Malinamuk, Komoro. Ami rua Irmaun Augusto ba iha tuku 6:30 PM ona. Hasoru Mantuto oan; Eufemia no Tia Angela, Papa nia primu sira. Ha’u hato’o poezia oan ida ho títulu: “Language of Love” ba Chris hanesan prenda aniversáriu nian. Ha’u sunu surat tahan ninin ho lilin, depois entrega ba nia. Ha’u fila ba uma, oin halai, laran beik, atu muta.

-23-7: atua múzika ho poezia hamutuk ho Irmaun Augusto iha grupu ami nian (A2CS) ba programa “Timorese Poetry Reading”, ne’ebé organiza hosi maluk Amerikana, LA iha Tropical Bakery. Maluk sira apresia tebes ami-nia

-24-7: dada lia ho maluk poeta, Carion iha Restaurante Ocean View kona-ba futura vida sosiu-kulturál nian. Ha’u hetan belun literáriu ida ne’ebé ha’u bele konfia atu dada lia liután kona-ba buat barak. Nia atu ba ona kontinua fali nia estutu iha rai Java. Nia aranka horiseik...]

*)Fatuk ba’e iha tasi ninin fó lisaun boot ida mai ita ema atu aprende. Tasi nia laloran baku fatuk ne’e, maibé fatuk ne’e kontinua hamrik firme. Ita ema tenke hamrik metin nafatin, maski hetan dezafiu oinoin iha ita-nia moris.

--[percik permenungan 25-7-2008]—

*) Kruz ha’u lori/Kruz ha’u tutur/kruz ha’u hulan/ sa’e Kalváriu tutun/Iha dalan klaran/ ha’u monu/ no monu fila fali/Loro makas/ ha’u hamrok/Loro makas/ha’u hamlaha/ Loro makas/ha’u liman ain kole//

--[percik permenungan 15-7-2008]—

*) Imi sai hosi kaut ida. Imi husar talin ida de’it. Nusa mak imi tetak kotu? Nusa mak imi laran metan ba malu?

*) Violénsia fíziku mak sai nu’udar dalan úniku ba ita atu uza hodi hamoos uma laran ne’ebé foer, uma laran mak nakonu ho iis dois? Violénsia mak sai hanesan “shock therapy” ida? Bele mós “sim”, bele mós “não”, depende realidade?

*) Ita-nia problema moris ne’e sériu tebe-tebes. Ita-nia problema sira ne’e hakanek fuan, ita-nia problema sira ne’e halo ita toba la dukur. Problema sira ne’e bele hamosu konsekuénsia oinoin, ne’ebé ita lakohi atu hasoru.

***