AFORISMA DIARIA [22-7-2008]-1

21-7-2008
Tuku 11:15 PM

[Oras ne’e dadaun iha fali ona sala familia nian iha Uma Fatuhada. Respira fali ambiente típiku rai TL nian. Sama fali rai lulik ida-ne’e ho família ha’u-nian horiseik loromanas. Viajen ida mak furak hosi rai liur.
Ha’u ho Amor sei hadeer. Apai toba ona oras ne’e. Múzika instrumentál Bandari akompãna ami...Kalan boot. Asu ida la hatenu....Iha liur ne’ebá, iha varanda, bani hobur ahi oan lampu..]

*) Arte ajuda ita atu kadi ita-nia sensibilidade umana. Arte purifika lala’ok moris nian mak buradu. Arte iha tebes ligasaun maka’as ho espiritualidade. Ita hotu sai nu’udar artista ho ita ida-idak nia kapasidade maka iha. Sai artista katak ita sai mehidór—mehi kona-ba horiseik, ohin no aban. Iha mundu imajináriu, ita hakmatek, hetan santuáriu.

--Nota reflesaun bainhira iha rai Java no illa Deuza nian--.

*) Bainhira ha’u hatene katak ha’u monu duni ba tahu laran sala nian, ha’u prefere nonok, no lakohi atu ko’alia barak. Ha’u-nia nonok sempre hamosu intrepretasaun oinoin. Ah, bainhira ha’u-nia pozisaun iha entre didin lolon ho surik, saida tan mak ha’u sei bele halo?

*) Ahi no been hatudu lisaun boot mai ita. Bainhira ahi nakali, no ahi trambe, bee hakmatek, bee hamate.

*) Kosok oan sira-nia inosente mosu iha ita-nia leet hamate tebes ita-nia raan nakali. Kosok oan sira-nia domin lori matak malirin. Kosok oan sira-nia hamanasa lori dame ba ita tomak.

*) Tempu mosu iha ita-nia leet, kura fuan kanek, kura fuan moras. Tempu sai nu’udar aimoruk boot. Tempu sai nu’udar bálsamu.

*) Keta ansi, la’o neneik. Ansi, ita sei sidi, ansi ita sei monu. Ita monu tidin kidun, ita monu taka rabat. Hosi ita-nia monu, husu boot, ita aprende lisaun boot ruma.

*) Ema rua sai funu maluk. Ema rua haree malu matan la moos. Ema rua haree malu hanesan busa ho asu. Ema ida kadi katana, ema ida seluk hamrik hakmatek. Duut no ai oan sira mós tuur la hakmatek, nakdedar iha fatin, sama rai la metin, sai sasin moris. Ó,to’o ikus, buka tama klaran, atu sobu liután?

*) Ita-nia konsekuénsia sai nu’udar doutór juiz. Ita-nia konsekuénsia hakotu lia tuir dalan loos. Ita-nia konsekuénsia hakotu lia tuir Na’i nia hakarak.

*) Bainhira ita sei ema kiik, ita mehi hakarak atu sai ema boot. Sai tiha ona ema boot, ita,konserteza, sei sa’e ba tuur iha “torre poder” nia leten. Maibé, bainhira ita tuun, ita sei tuun ho laran? Bainhira ita tuun, ita sei tuun ho fuan boot, no neon luan nafatin?