AFORISMA DIARIA [26-7-2008]

[Tuku 00:19 AM. Kalan boot ona. Ha’u sei lees matan. Buka atu refleta. Buka atu relaxa. Buka atu rona múzika Ebiet G.Ade nian hosi album foun ne’ebé foin sosa iha Kolmera horiseik lorokraik.

Apai ho Amor toba tiha ona. Sira na’in rua nia klamar kala oras ne’e kala iha ne’ebé ona, ha’u la hatene. Apai ohin kalan (25-7) moras. Isin manas maka’as, ne’e duni mak ha’u-nia tempu iha Otél Timor la kaleur de’it..Amor bolu ha’u ho telefone atu fila sedu mai uma atu mai haree lisuk Apai mak moras..Iha Otél ha’u hasoru maluk sira (Jordão, Jorge, Quim, Ameu), dada lia kona-ba TL nia futuru hosi aspetu oinoin..

Horiseik, kuaze loron tomak, ha’u iha uma de’it, relaxa, lee, rona múzika, nst...Ha’u tenta apresia di’ak liutan kresimentu Apai nian.. Nia tanis. Nia halai mai besik ha’u.Buka halimar ho ha’u. Halo maña....]

[Percik permenungan 24-7-2008]

*) Domin sobu rahun laran metan, domin sobu rahun laran makerek. Domin, hanesan mós bee, la tauk ahi. Ahi bele trambe oinsá mós, kuandu bee tama ona klaran, ahi ikun sei tuuk kedas.

[Percik permenungan 25-7-2008]

*) Ho kbiit naroman oituan ne’ebé ha’u iha, ha’u iha kometimentu boot atu hatudu dalan ba ha’u-nia oan sira. Ha’u sei husik mós sira la’o mesak, duni tuir sira-nia mehi. Ha’u iha konsiénsia tomak katak ha’u monu tiha ona ba nakukun laran, ha’u monu tiha ona ba rai naruk, ha’u monu tiha ona ba tahu laran. Ha’u lakohi ha’u-nia oan sira atu monu tuir hanesan ha’u. Hanesan ema kriatura, konserteza, ha’u-nia oan sira sei sidi, no sei monu, maibé di’akliu sira monu iha fatin foun, labele monu iha fatin sira ne’ebé ha’u monu ba tiha ona ne’e.

***