AFORISMA DIARIA [24-7-2008]

[Tuku 10:20 AM. Uma Fatuhada. Loro matan furak. Manu oan sira semo ba, semo mai iha uma oin. Bani lubun ida maka naktabar iha kaixote nia leten iha uma oin desde loron hirak ona. Ohin dadeer Adolfo sunu ahi iha ai kaixote okos, ho esperansa katak ahi suhar anin sei huu sa’e ba ai leten, no depois sei duni bani sira ne’e. Maibé, ahi suhar ne’e la konsege duni sira.

Labarik oan sira viziñu nian oras ne’e tebe bola masa iha uma oin. Bainhira haree sira tebe bola, ha’u hanoin fali uluk iha Manatuto, ami halimar bola meias, joga kontra karau atan sira. Ami tebe bola meias to’o ami nia ain sira nakasalak hotu. Karau atan sira maka dala barak manan ami eskola oan sira.

Múzika instrumentál lian. Hosi album “18 golden Saxophone” (CD bajakan ne’ebé ha’u sosa iha Kolmera iha fulan hirak liubá). Músika “How can I tell her” foin hotu.....

Ohin ha’u ba tasi ibun hanesan baibain, hodi hala’o ha’u-nia rituál kontemplasaun. Fila mai hasoru maun Agio. Nia husu se karik RESJ ba ferias, ne’e maka ha’u la ba servisu. Ha’u hatan katak, ha’u mak sei férias, no ha’u ba tasi hodi buka inspirasaun (hanesan eskritór ida).....

*) Labarik sira, ita-nia matan-fulun/Labarik sira, ita-nia tilun-tahan/Labarik sira, ita-nia tee-rohan/Labarik sira, ita-nia raan kafuak/Labarik sira, ita-nia liman-ain/Labarik sira, sai sasin moris/ hatutan ita-nia lisan/husi hun to’o rohan/ Labarik sira, ita-nia eskolante/Labarik sira, ita-nia mestre.//

*) Atu aat ka di’ak, ita-nia raan ita sei la soe, no ita sei la husik maski sira ema matak leet ida hatetee aat sira didi’ak, maski ema matak leet ida fila kotuk, no lakohi tan ona see tilun ba saida maka ita-nia raan sira sei ko’alia, haklaken lia loos, no haktuir lia naksalak.

*) Sai masin, tenke meer/Sai naroman, tenke lakan/ Sai masin, sai naroman/nu’udar kna’ar ita ka’er/ atu hakat fila fali/ hodi tama hikas iha Na’i nia kadunan.//

*) Ha’u-nia matan been maka turu, ha’u-nia matan been maka suli la maran tanba konsekuénsia saida de’it maka ha’u simu, ha’u fiar katak sei la halo mudansa boot ida iha mundu rai klaran. Maibé, ha’u fiar ho fuan no laran tomak katak ha’u-nia matan been ne’e iha kbiit duni atu transforma ha’u-nia an rasik bainhira ha’u hakat iha dalan nakukun hodi ba hetan naroman, no bainhira ha’u lori ha’u-nia kruz, sa’e ba iha Kalváriu nia tutun. (hanoin hikas belun, Abilio Belo nia lia fuan kona-ba esénsia matan been nian ).

*) Depende ba kontestu—labele haree sé loos mak ko’alia buat ida, maibé haree ba saida no oinsá mak ema ne’e ko’alia.

--Percik permenungan 23-7-2008—

*) Keta haluha Maromak iha fatin ne’ebe-ne’ebé de’it tanba Maromak la fihir ó-nia koor, Maromak la diskrimina katak ó ne’e ema maksalak, ka ó ne’e ema makloos. Kada segundu bainhira ita dada iis ( dada ar puru moris nian tama ba iha ita-nia inus), ita dada mós Maromak nia iis. Hamutuk ho Maromak, ita sei manan funu espirituál. This, off course, will sound ridiculous for those who have no faith whatsoever in Almighty God.

--Percik permenungan 22-7-2008—

*) Ha’u an kanek. Ha’u an fo’er. Ha’u an iis dois. Na’i de’it maka bele iha kbiit no ema ne’ebé hetan duni ona Na’i nia kbiit tomak mak bele iha pasiénsia duni atu atura ha’u hosi hun to’o rohan, no simu hikas fali ha’u “as the way I am, and not the way I should be.”

*) Bee matan, bee lihun domin ne’e ita hotu nian. Mai ita hakbesik bee lihun ne’e. Mai ita fase ita-nia an ho bee nia murak, ho bee nia furin. Ha’u fiar katak ita sei hetan matak-malirin.

*) Na’i, sunu ha’u ba ho Ita-Boot nia Ahi Domin. Biar ba ha’u sai mutuk didi’ak, no rai hela netik ha’u-nia ahukdesan oan ruma. Ha’u-nia oan, konserteza, sei hateke ahukdesan ne’e ho laran dodok, ho laran taridu bainhira nia hakat ba buka nia hun, bainhira nia hakat ba buka nia abut.

*) La kusta buat ida, ha’u-nia moris ne’ebé frájil ne’e, maluk sira hakotu konforme tuir maluk sira-nia hakarak tanba de’it ha’u sai “rebelde” ida—viola lei relasaun (familiar) nian ne’ebé sagradu tebe-tebes. Maibé, molok maluk sira hala’o buat ne’e, bele ha’u husu pergunta ida ba dala ikus: dalan seluk kala laiha duni ona, ne’e duni maka maluk sira hili dalan ida-ne’e hanesan solusaun finál ida?

***