AFORISMA DIARIA [19-7-2008]

Illa Deuza/Dewata, 19 Jullu 2008
[7:43 AM)

[Oras ne’e múzika ho tema domin nian hosi “The Beatles” akompaña ha’u iha viajen espirutuál ida-ne’e, no bainhira ha’u hakerek reflesaun sira tuirmai..

[Ohin ha’u hakfodak hosi kama iha tuku 6 AM. ...Lakaleur, Apai mós hakfodak. Amor mak sei toba falun an…

Loron tolu ona iha illa ida-ne’e, kuandu kalan toba ona, ha’u mehi oinoin. Nabolok. Hadeer mai, ha’u kuaze haluha hotu mehi sira-ne’e, ne’e duni ha’u la konsege hakerek iha ha’u-nia diáriu. …]

*) To’o bainhira loos mak “sandiwara” sira-ne’e ita kontinua atu halimar alias haklaken ba maluk sira? Ah, ha’u hakarak sai tebes duni ona hosi realidade falsu ida-ne’e. Ha’u la tahan ona atu hein. Maibé, ha’u kontinua fiar katak buat hotu sempre iha hun, no sempre iha rohan.

--(Nota reflesaun 17-7-2008) --

*) Ó hatene katak ha’u hetan presaun maka’as hosi sorin rua-rua. Ó hatene katak ha’u hakarak hetan liberdade. Ó hatene katak ha’u lakohi ema ida sama ha’u-nia ulun. Tanba ne’e mak, dalaruma ha’u sinti katak di’ak liu ha’u mate de’it mak di’ak, duke ha’u moris, ha’u somente hamosu de’it laran moras no tensaun.

*) Ha’u sei la hakfodak katak to’o ikus, tanba de’it situasaun apertadu, ó sei nega ha’u, no la kumpri promesa sira ne’ebé uluk ó haklaken ho liafuan funan-funan. Maibé, maluk, fiar ba katak ha’u sei lamenta. Lamenta no lamenta. La hatene to’o bainhira. Husik ba tempu mak sai aimoruk di’ak hodi kura ha’u-nia laran kanek, ha’u-nia laran moras.

*) Pasensia, situasaun oras-ne’e kala la permite tebes ona atu ita hamutuk hanesan uluk. Hosi dook ha’u sei kontinua hadomi, no simu ó “as the way you are.”. Cinta tidak berarti harus selalu bersama secara fisik, dan memiliki.

*) Labele ansi atu foti konkluzaun ba kualker asuntu bainhira ita foin mak haree de’it asuntu ne’e hosi aspetu ida. Hanesan intelektuál ida, sé ita halo buat ida ne’e, ne’e hatudu katak di’ak liu ita presiza ba “han tan lai”.

*) Hirus nu’udar sentimentu normál ida iha moris. Maibé, hirus mak la kanaliza ho didi’ak, hatudu katak ita ema beik-teen. Hatudu mós katak ita nu’udar ema mak laiha dauk maturidade. Figuraun, afinál buat ne’e fásil loos atu hatete, maibé susar ba ita atu pratika iha ita-nia moris loron-loron!

*) Ó hakarak ema atu respeita ó? Entaun, respeita mós ema seluk. Ne’e “harga mati, yang tidak bisa ditawar-tawar lagi.”

***