AFORISMA DIARIA [28-9-2008]

28-4-2008 [tuku 11:26 kalan]

[Uma Fatuhada. Sala familia nian. Apai toba dukur iha kulsaun leten. Amor okupadu loos hodi haloot sasan sira bisnis nian. Kanal televizaun Indonézia, “Indosiar” ne’ebé fó sai programa “Soulmate Show”....
Ha’u-nia matan dukur oituan, maibé ha’u esforsa an hodi lees matan...]

*) Buat sasan sira ne’ebé ita hetan ho fásil sei mohu mós ho lalais de’it. Atu hetan buat di’ak, uluk nana’in ita tenke terus.

*) Hatene katak ita seidauk hatene buat ida sai nu’udar motivatór ida ne’ebé estimula ita atu hatene buat barak liután.

*) Hirus nu’udar parte ita-nia emosaun umanu ne’ebé normál. Hirus mós presiza atu kanaliza ho didiák, se la’e bele “berabe”.

*) Moris nu’udar universidade boot ida. Ita nunka halo hotu ita-nia kursu sira iha instituisaun edukasaun nivel aas ida-ne’e. Ita sai nu’udar “mahasiswa abadi” alias estudante rohan la’ek. Tantu mais ita aprende, tantu mais ita sinti katak ita seidauk aprende buat ida.

AFORISMA DIARIA [27-4-2008]

[tuku 1 loromanas]

[Uma Fatuhada. Tuur iha varanda bainhira hakerek nota diáriu ida-ne’e. Loromanas furak. Ohin Domingu. Ha’u rileks maka barak. Apai ho Amor oras ne’e goza sira-nia ‘sesta’. Múzika instrumentál hosi album “Amazing Sound” akompaña..
Iha ai kaixoti leten, ha’u rona manu kakoak halo lian. Iha nuu leten ha’u rona manu liin sira halo mós lian.

Ohin dadeer ha’u hadeer sedu, tuku 5. Ha’u tenta halo reflesaun. Hanoin Papá, ha’u tanis, matan been suli. Esénsia Papá nian iha ha’u-nia moris dezde sei ki’ik to’o boot. Papá sakrifika buat barak ba ami oan sira. Nia hadomi ami oan sira ho fuan ho laran tomak. Domin ninian maka boot ne’e ha’u hakarak hatutan duni ba Apai maka oras ne’e moris buras iha ha’u-nia leet.Papá nia lia fuan lulik, “keta haluha ha’u-nia hun!” doko tebes ha’u atu kaer metin nafatin abut familia Soares nian iha ha’u-nia moris.

Interesante horiseik dadeer atu tuur dada lia ho Tiu Nascimento, Papá nia kolega servisu iha tasi-ibun Farol kona-ba esénsia literatura iha moris.
Nia mós oras sai nu’udar membru grupu lia-na’in nian ne’ebé ha’u forma.

Ha’u hahú fali fó aula “Inglés IV” ba estudante sira UNTL nian horiseik tuku 2 loromanas. Ho estudante sira ha’u diskuti kona-ba oráriu aula nian, no tópiku maka atu diskuti durante semestre ida-ne’e.Ami muda fali oráriu ba tuku 4 tanba sira balu iha aulas iha tuku 2. Semana liubá ha’u somente tama aula hodi fó de’it avizu katak aula sei hahú iha tuku 2 loromanas.....]

*) Ha’u hakarak hetan de’it deviza “SERSAN SATU (serius, santai, sampai tujuan)” iha ha’u-nia moris tomak.

*) Atu fokit aifarina iha rai toos? Uluk nana’in, ita tenke ke’e hale’u lai aifarina nia hun, atu nune’e aifarina isin sei labele tohar bainhira ita fokit aifarina. Arte diplomasia nian mós, maisumenus hanesan nune’e.

ENSAIU LITERARIU 6: "LITERATURA NU'UDAR OAZIS IHA ITA-NIA VIAJEN NARUK"

*) LITERATURA NU’UDAR OAZIS IDA IHA ITA-NIA VIAJEN NARUK

(Pontu Diskusaun iha Konferénsia kona-ba “Timor-Leste: Que Futuro?” iha

UNTL, 23 Abril, 2008)

Hosi Abé Barreto Soares

Lokraik kmanek ba maluk sira hotu ne’ebé ohin hakat mai iha-ne’e atu partisipa iha konferénsia kona-ba “Timor-Leste, Que Futuro?”.

Uluk nana’in ha’u hakarak atu hato’o obrigadu barak ba komisaun organizadora sira, tanba konvida ha’u atu mai iha-ne’e, liu-liu ba Dra. Fátima Mendes, no mós ha’u-nia belun Mara ba sira-nia konsiderasaun boot mai ha’u hodi dudu ha’u atu involve ha’u-nia an bebeik iha atividade kulturál luzofonia nian iha Timor-Leste, liuliu iha kapitál Dili, inklui atividade feira livru nian ida-ne’e.

Ha’u prepara ha’u-nia intervensaun ida-ne’e ho lia-tetun. Frankamente ha’u hakarak hatete iha-ne’e katak ha’u seidauk iha kapasidade ida-ne’ebé bastante atu espresa ha’u-nia an ho didi’ak liuhosi hakerek iha lia-portugés. Atu tradús intervensaun ida-ne’e ba lia-portugés, ha’u hetan tulun boot hosi ha’u-nia kolega, Luis Pinto. Ha’u-nia Portugés iha oral mós sei mangal hela, seidauk tasak didi’ak. Ne’e duni ha’u husu imi-nia toleránsia boot mai ha’u bainhira iha ita-nia enkontru ida ne’e, no mós iha okazisaun sira seluk, imi sei nota momoos katak ha’u viola oituan regra sira gramatikál nian.

Ha’u haksolok atu halo parte iha painel ida-ne’e, hamutuk ho konferensista sira seluk hodi hato’o netik ha’u-nia hanoin oan ruma kona-ba loron-aban Timor-Leste nian. Nu’udar mós onra boot ida mai ha’u atu hakat mai iha Universidade Nacional de Timor-Lorosa’e (UNTL) hodi respira anin murak ambiente akadémiku nian.

Ha’u-nia prezensa iha universidade prestíjiu ida-ne’e ohin atu ko’alia kona-ba aspetu kulturál foin maka ba dala lima: iha tinan 2002 ha’u mai dala rua—partisipa iha atividade komemorasaun restaurasaun independénsia nian iha fulan-Maiu hodi lee poezia, no depois tiha fó palestra ida iha aula departamentu Inglés nian kona-ba “Xanana Gusmão: The Man of Letters”, iha tinan 2004 dala ida—ko’alia iha departamentu Portugés kona-ba “Fernando Sylvan: Ha’u-nia Mestre, Ha’u-nia Mentor Literáriu”, no iha tinan 2007 dala ida—ko’alia kona-ba “Influénsia Literatura Portuguesa Iha Ha’u-nia Karreira Literária.”

Iha ha’u-nia enkontru ho Dra. Fátima no Mara iha semana rua liubá ha’u dehan katak ha’u sei ko’alia fila fali de’it kona-ba tópiku “Influénsia Literatura Portuguesa Iha Ha’u-nia Karreira Literária” ne’ebé ha’u hato’o ona tinan ida liubá iha UNTL, iha intervensaun ida ohin. Maibé, depoisde iha Sábadu hori bainhaat bainhira ha’u haree pamfletu feira livru nian kona-ba tema konferénsia ohin nian kona-ba “Timor Leste: Que Futuro?”, ha’u mós muda ha’u-nia ideia, no deside atu ko’alia kona-ba tópiku seluk. Ohin, ha’u sei ko’alia kona-ba “Literatura Nu’udar Oazis Ida iha Ita-nia Viajen Naruk.”

Timor-Leste, hanesan mós nasaun sira seluk iha nia pasadu rasik, ne’ebé nia hakat liutiha ona, iha-nia prezente, ne’ebé oras ne’e dadaun nia goza hela namanas, no mós sei iha nia futuru rasik, ne’ebé nia mehi atu hetan iha aban-bairua.

Timor-Leste nia pasadu, laiha dúvida, nakonu ho mutin no metan. Timor-Leste nia pasadu sai nu’udar referénsia, sai nu’udar lalenok boot ba nia oan sira atu fihir sira-nia an hodi didi’ak, hodi nune’e sira sei hakat ba oin nafatin, hasoru loron ohin no loron aban ho laran kmanek no laran haksolok.

Oras ne’e dadaun, atividade dezenvolvimentu nian hala’o namanas, hanesan ita hotu hatene. Atividade moris tomak nian sira-ne’ebé oras ne’e hala’o hosi Timor-Leste hanesan povu, hanesan nasaun ida, ha’u konsidera nu’udar viajen koletiva ida nian ne’ebé naruk. Iha kontestu ida-ne’e, pergunta boot ida mak ha’u hakarak koloka, entaun, literatura hanesan ramu arte nian ida, enkaixa nia an iha fatin ida-ne’ebé loos, iha prosesu dezenvolvimentu ida-ne’e?

Atu hatan ba pergunta ida iha leten ne’e, maka ha’u tenta atu hatete katak literatura sai nu’udar oazis ida iha ita-nia dezertu dezenvolvimentu moris nian. Literatura iha kbiit atu fornese ai-han no bee klamar nian mai ita. Literatura ajuda ita atu bele luku klean liután iha pensamentu profundu kona-ba moris: ita mai hosi ne’ebé, oras ne’e ita iha-ne’ebé, no ita atu ba ne’ebé loos. Ita bele, hanesan povu, hanesan nasaun, hakat ba oin nafatin tanba ita-nia klamar hetan kbiit, ita-nia klamar hetan matak-malirin. Buat ne’e han malu ho, se la sala, hanesan saida maka poeta, Fernando Pessoa hatete, “Tudo valeu a pena, quando a alma não é pequena!”

Literatura (poezia) ajuda ita hamoos ita-nia fuan ho neon iha ita- nia prosesu viajen naruk ida-ne’e. Atu reforsa liután vizaun ida-ne’e, permite ha’u atu sita liafuan sira-ne’ebé hato’o hosi eis Prezidente Estadus Unidas nian, John F. Kennedy (matebian) durante diskursu ida-ne’ebé nia hato’o iha Amherst College, Amherst, Massachusetts, iha loron 26, fulan-Outubru, tinan 1963) tuirmai:

“When power leads men towards arrogance, poetry reminds him of his limitations. When power narrows the areas of man's concern, poetry reminds him of the richness and diversity of his existence. When power corrupts, poetry cleanses. For art establishes the basic human truth which must serve as the touchstone of our judgment.”

Sei iha relasaun ho kestaun ida leten, Octavio Paz, poeta Mexikánu provoka ita hodi hatete liután, “if a society eliminates poetry, then that society commits a spiritual suicide.”

Hanesan individu ida-ne’ebé halo parte iha prosesu viajen naruk ida-ne’e, hamutuk ho maluk sira seluk iha Timor-Leste, no iha mundu rai klaran, ha’u sempre hetan dezafiu hosi pergunta ezistensiál sira tuirmai: saida maka ha’u hala’o tiha ona, saida maka ha’u hala’o oras ne’e dadaun, no saida maka ha’u sei hala’o ba moris? Atu refleta di’ak liutan kona-ba preokupasaun ida-ne’e, ha’u hakarak fahe ba maluk sira ha’u-nia poezia oan ida tuirmai (ne’ebé tradús ba lia-portugés hosi ha’u-nia belun poeta/kronista, Tozé Borges):

SOU UMA PEDRA QUE TU ATIRASTE (PARA O LAGO)
(Uma Meditação Crepuscular)

“quando todas as cordas da música da minha vida forem tocadas, então cada toque Teu criará a música do amor”
Rabindranath Tagore

Senhor, sou simplesmente uma pedra que atiraste
para um refrescante e transparente lago

E afundo-me

Em breve afastando-me para trás do ondular das ondas
que se movem lentamente
para o limite

O pôr-do-sol,
iluminando com os seus raios,
beijando os lábios do lago

O ondular das ondas, suavemente espumando-se

O ondular das ondas, lentamente
desaparecendo

***
2002-2005

Pesoalmente, oras-ne’e ha’u iha oan mane oan ida. Foin halo tinan ida, fulan lima ho balun. Nia moris durante krize polítika-militár iha tinan 2006 nia laran, konserteza. Ha’u iha mehi simples ida ba nia hanesan aman ida ne’ebé kolabora iha ninia prosesu moris. Ha’u-nia mehi maka ne’e: hakarak haree Timor-Leste, rai Lafaek lulik ida-ne’e sai buras no sai matak liután iha tempu ikusmai. Hodi nune’e, ha’u-nia oan, Habas alias Teo sei iha oportunidade ida atu moris iha dame no hakmatek nia laran. Atu hatene di’ak liután ha’u-nia mehi ne’e, ha’u hakarak oferese ba maluk sira poema oan ida tuirmai ( ne’ebé tradús mós ba lia-portugés hosi belun, Tozé Borges):

FLORINDO ETERNAMENTE

Tudo será esmagado
Tudo será quebrado
Tudo será tornará poeria

Novos rebentos surgirão, florindo a terra plana

Nós rezaremos
Nós cantaremos as canções ancestrais
Nós dançaremos tebe
Nós dançaremos bidu
Circundando as pedras da casa sagrada

Uma grande esteira será estendida
Todos nos sentaremos
Os nossos corações estarão serenos
As nossas mentes estarão tranquilas
Dizendo a verdade
Recontando os males feitos

A felicidade do amor surgirá
A beleza da paz será verde
Florindo e florindo
Florindo eternamente
***
Dili, Junho de 2006

Obrigadu barak ba imi hotu nia antensaun.

***
*)Intervensaun ida-ne’e ha’u hato’o iha lia-portugés durante konferénsia.

AFORISMA DIARIA [23-4-2008]

23-4-208 [ Tuku 11:27 kalan..]

[Oras ne’e Apai ho Amor toba ona. Ha’u sei hakarak lees matan atu refleta, avalia atuasaun loron ohin nian..
Ohin lorokraik tuku 4 ha’u haksolok partisipa iha konferénsia kona-ba “Timor-Leste, Que Futuro?” hanesan oradór ida iha UNTL hamutuk ho konferensista sira seluk: Prof. Barbedo Magalhães, Luis “Takas” Cardoso (eskritór Timorense), Pedro Rosa Mendes (jornalista LUSA), no Sr. Domingos Sousa maka modera sesaun ne’e. Ha’u maka halo intervensaun uluk, ko’alia ho lia-portugés ne’ebé ha’u lee hosi ha’u-nia diskursu mak ha’u prepara tiha ona, no hetan tulun hosi belun, Luis Pinto hodi tradús ba lia-portugés. Debate ne’e han kedas oras rua ho balun. Interesante atu rona komentáriu sira durante sesaun ‘husu no hatan’ nian.]

*) Hanesan nasaun, hanesan povu ida-ne’ebé soberanu ita tenke afirma ita-nia identidade própriu. Ita tenke kaer rasik ita-nia kuda talin. Ita labele husik ema seluk hosi rai liur maka mai manda ita hanesan “cavalo mandado.”

*) Poeta nu’udar ema ida-ne’ebé “takes the road less travelled by”. Tanba de’it ida-ne’e, ema dehan nia ‘ema bulak’, no ‘ema estrañu’ (dada lia ho M.Stahl ohin loromanas durante almosu iha Erli)

*) Keta hakfodak atu enfrenta konflitu iha ita-nia moris iha mundu rai klaran. Konflitu ne’e importante atu hodi hetan dinámika progresu nian iha aspetu hotu-hotu. Karik fatuk ahi la kose malu ho besi kusan, oinsá maka ita sei bele hetan ahi? Ita tenke hatene oinsá jere konflitu maka ita enfrenta. Ne’e sai dezafiu boot ida mai ita.

*) Moris nu’udar luta. Buat hotu la’ós tuun de’it hosi lalehan, tau iha bandeza no oferese gratuitamente mai ita.

AFORISMA DIARIA [22-4-2008]

22-4-2004 [ Uma Fatuhada. Tuku 6:05 dadeer]

[ Dadeer matak. Dadeer buras. Dadeer di’ak. Ha’u hadeer iha tuku 4:30 AM. Refleta kona-ba esénsia arte, no sai artista. Hanoin fali liafuan Gibran nian ne’ebé hatete, “penyair adalah seorang raja tanpa mahkota”.. Hetan fali vizaun klaru. Hetan fali espiritu foun atu luku klean liután iha tasi klean artista nian (lee: poeta alias vagabondu kulturál). Rona múzika instrumentál piano (Morning Dance, Coming Home, Pleasures, Love’s Awakening) no muzika instrumentál seluk (Majestic View, Touching the Sky). Rona Mozart: “Eine Kleine Nachtmuzik”. Hanoin fali Tiu Boot—“Sang Maestro”. Nia mós sai nu’udar admiradór ida ba Mozart. Yes, Mozart is a genious...

Hanoin Papa. Ha’u laran dodok, ha’u tanis. Hanoin bainhira ami oan sira sei ki’ik Papa estima ami. Oras ne’e ha’u iha oan mane ida ona. Ha’u tenta atu transmite domin Papa nian ba kosok oan ne’e. Hodi nune’e, ha’u hein katak Habas (ne’ebe kostuma ha’u bolu mós Apai) sei transmite liután domin ne’e ba nia oan sira iha tempu ikusmai. I have to learn a lot on how to become a good father.

Alai halo tinan ohin. Ha’u haruka mós SMS ida ba nia: “Alai, alin doben! Ohin halo tinan 35. Parabens! Ita hamutuk nafatin iha kbiit domin. Bjhns, manu.” Nia hatan kedas hodi dehan, “Obrigadu, Manu.”.

**
*) Artista ida, se nia hakarak tebes duni atu tuir dalan arte nian ne’ebé nakonu ho aitarak, no ema barak maka lakohi liu iha dalan ne’e, tenke iha nia karakterístiku rasik. Tenke iha nia koor rasik. Dia harus memiliki warna yang khas, alias. Kalau tidak, dia akan tergilas oleh jaman.

*) Ema sei hakru’uk no hatudu sira-nia respeitu bainhira ó hetan ona fatin di’ak. Bainhira ó sei bilimbala hela, ema barak sei hateke ó ho de’it matan ikun. (Hanoin fali Tiu Boot nia liafuan no maluk Takas, eskritór Timoroan nian mós)

*) “Istória Timor-Leste nian hakerek ho raan, kosar, no matan-been.” (Liafuan Pe. Martins, SJ iha palestra horiseik iha UNTL bainhira Prof. Barbedo lansa nia livru foun kona-ba TL). Timoroan sira, hanesan mós povu iha ne’ebé de’it iha mundu rai klaran, presiza valoriza sira-nia istória. Se la’e, sira lahatene loos atu hakat ba ne’ebé.

*) Keta hatudu de’it liman ba ema seluk. Presiza mos atu haree liután ho klean sé loos maka ita. Keta halo ba, invez ita maka sai nu’udar “problem solver” maibé sai fali “problem maker.”

AFORISMA DIARIA [19-4-2008]

[19-4-2008; tuku 2:34 madrugada]

Oras ne’e,ha’u sei lees hela ha’u-nia matan hodi hakerek nota oan ida-ne’e iha Uma Fatuhada. Amor ho Apai oras ne’e tuba dukur loos.

Semana ida resin ona mak ha’u la atualiza ha’u-nia blog sira tanba okupadu tebes ho servisu, nst.

Ha’u foin maka halo servisu hotu—hala’o tradusaun ba aprezentasaun powerpoint nian ida ba konferénsia kona-ba ensinu bilinge, ne’ebé UNICEF organiza hamutuk ho GovTL.
Ha’u partisipa iha konferensia ne’e hanesan durubasa simultánia. Interesante. Ha’u ba iha loron segundu (18-4), no sei kontinua tan orsida tuku 8:30 dadeer.
Hasoru maluk lubuk ida, ami dada lia durante intervalu ba kafé no durante han loromanas.

Udan tau boot loos ohin lorokraik bainhira ha’u sei iha fatin konferénsia nian iha Sentru formasaun S. João Paulo, Comoro. Udan tau hanesan ne’e halo ha’u hanoin fali múzika instrumentál sira.

Ha’u, to’o ikus, konsege hetan asesu ba internet iha Uma Fatuhada. Ami instala tiha ona telefone iha semana tolu liuba. Durante ne’e ha’u liga sala liña telefone nian.Figuraun!

***

*) Lia na’in ida hatete ba nia belun sira: maluk doben sira hotu hosi rai Lafa’ek ida-ne’e, ha’u katak ba imi ho fuan no laran tomak, kona-ba kestaun estratéjiku, di’ak liu, atu aat ka di’ak, ita tenke hamutuk, karik la’e, ema seluk hosi rai liur tama iha ita-nia klaran, sobu namkari ita hotu, no to’o ikus, ita hotu maka sei leki leet de’it.

*) Atu hatene loloos kona-ba rai ida nia mehi, no nia hanoin ne’ebé klean kona-ba moris, lalika ba dook. Ba rona de’it rai ne’e nia knananuk sira. (konversa ho maluk Nuno hosi Fohorem kona-ba dadolin,nst durante konferénsia bilinge).

*) Na’an ó sei ko’a la han bainhira ó-nia tudik la kro’at. Hanesan mós ó-nia matenek; sei folin la’ek bainhira o la buka atu kadi beibeik.

AFORISMA DIARIA [10-4-2008]

[Rai loro. Manas. Dili kontinua ho nia atividade hanesan baibain.

Foin maka almosu, mesak-mesak iha Terrace Cafe: han modo baiaun fila, no sasate manu rua. Molok ida-ne'e, ha'u ba Colmera buka CD muzika instrumental.

Enkontru ha'u-nia xefe boot iha ONG Forum la'o diak horibairuak. Ha'u ho kolega, Michael maka fornese servisu tradusaun.

Loron rua tuir-tuir malu, horiseik no horibairuak ha'u ba almosu iha Erli. Tuur han iha meza maka hanesan, no kuaze oras maka hanesan (depoisde tuku 1 loromanas), no trava konversa ho ema maka hanesan. Hahan mos kuaze hanesan de'it. Ha'u dada lia ho M. Stahl kona-ba mundu poezia, no politika timorense, nst. Interesante. Nia prefere poezia maka ho rima, no ha'u gosta poezia livre. Ha'u esplika ba nia kona-ba esensia poezia, "Timorese Meditation".

Ohin Papa nia loron mate, halo tinan 4, fulan 4. Zinha horikalan telefone katak nia sei rona misa ida ba Papa orsida lorokraik tuku 6:30 iha Igreja Aimuti Hun. Papa nia isin dook ona, konserteza, maibe nia klamar sei hamtuk ho ami oan sira nafatin.....]

*) Lia na'in sira hatete, "O hakarak hemu susu been ida-ne'ebe iha gostu furak? Di'ak liu, belu, susu been keta barak liu, no bee mos keta barak liu. Karik la'e, susu been ita hemu, ita-nia kabun sei moras."

*) Labarik kosok oan sira sai nu'udar lalenok ba ita ema boot sira atu leno, no fihir didi'ak ita-nia an. Hosi labarik sira, ita aprende buat barak kona-ba moris. Interesante atu refleta fali liafuan sira tuirmai, ne'ebe ha'u sita hosi livru "Berguru Pada Anak", obra Paul Subiyanto: "Anak-anak adalah utusan Tuhan, dari hari ke hari dikirim untuk berkhotbah tentang cinta, harapan, dan kedamaian." (James Russel Lowell).

*) Na'i, tansa maka ha'u maka Ita-Boot hili atu sai nu'udar "portavos" alias "jurubicara" era nian poetikamente?

*) Mundu Osidental no Oriental ida-idak mosu ho sira-nia karakteristiku iha ita-nia leet. Ida-idak iha ninia kbiit no frakeza. Depende ba ita maka atu buka halibur "kbiit" hosi parte rua ne'e, no tau hamutuk hodi halo/forma kbiit kombinadu ida, hodu nune'e ita bele uza kbiit ne'e hanesan referensia di'ak ida iha ita-nia komunikasaun entre nasaun iha era globalizasaun ida-ne'ebe oras ne'e ita involve iha laran.

***

POEZIA MENSAL IV: TIMORESE MEDITATION

TIMORESE MEDITATION

(Inspirasaun mosu depoisde rona muzika instrumental Bandari, ho titulu 'Irish Meditation' iha uma Fatuhada, iha 5-4-2008)

***

Ami tuur, ho haraik an, iha hadak leten uma "huhun lidun" nian

Ami hamulak ba matebian

Ami harohan ba Maromak

Ami hasa'e lia ba lulik bei ala sira

Haraik rahun-di'ak,

Haraik matak-malirin,

Haraik bensaun-kmanek

mai ami, atan oan sira

Atu nune'e,

ami hakat ba oin nafatin,

hala'o viajen naruk

ho aten-barani,

ho neon-luan, no

ho laran-luak

liutan

---

Abril 2008

***

AFORISMA DIARIA [7-4-2008]

[ Udan tau maka'as oituan. Para ona. Udan impede ha'u atu mai lalais Internet Cafe,Caicoli hodi mai atualiza blog sira depoisde ha'u almosu iha Terrace Cafe. Ha'u hamrik hein kaleur oituan atu udan para iha loja 88 Xina nian, hateke ba eis edifisiu supermarket Hello Mister nian maka sobu rahun tiha ona.

Almosu mesak-mesak. Despois hasoru kolega, Xico G. ne'ebe uluk ami frekuenta iha eskola sekundaria iha Dili. Dada lia kona-ba krize politika-militar TL nian.

Udan maka tau maka'as iha Sabadu horibairauk no Domingu horiseik iha lorokraik halo ha'u sulan de'it iha uma. La ba fatin ida. Aproveita tempu hodi lee, haree Apai, rona muzika no halot sasan,nst.

Apai nia nakar halo ha'u kuaze la tahan. Nia gosta halai tun, halai sa'e...

Hahu ohin ha'u kaer kargu hanesan OIC ba ami-nia unidade tradusaun/interpretasaun to'o loron 9-4 tanba ha'u-nia xefe ba rai liur trata nia saude.

Iha loron-sesta, 4 Abril ha'u ho kolega sira halo festa suspreza aniversariu tinan nian ida ba ami-nia xefe, Vera. Nia sinti agradesidu tebes ho ami-nia jestu solidariu ida-ne'e. ...]

**

*) Ita-nia konsiensia, hanesan ita hotu hatene, sai hanesan juis boot ida iha ita-nia moris loron-kalan. Ita-nia konsiensia sempre akuza bainhira ita halo buat ruma la loos. Hanesan aitarak, ita-nia konsiensia sempre buka tuu hela de'it ita-nia isin-lolon.

*) Revolusaun konsiensia ne'e nu'udar pra-kondisaun ba moris ho rahun diak nian ida-ne'ebe ita hotu hakarak atu hetan.

*) Karik laiha konflitu iha moris, entaun buat hotu sai paradu. Segalanya akan mengalami stagnasi. Importante maka oinsa ita lida ho konflitu, hodi nune'e, ita bele dezenvolve liutan moris iha mundu rai klaran.

*) Ita tenke hatene simu realidade bainhira ita lakon iha jogu moris nian. Hodi nune'e, bainhira ita manan karik, ita sei la foti an alias "ita-nia inus kuak sei la luan".

*) Atu sai 'revolusionariu' diak, no loloos nian iha ita-nia moris, entaun ita keta iha duvida "atu deskonfia mos ita-nia lalatak rasik".

***

AFORISMA DIARIA [4-4-2008]

[Ha'u tuur fali iha fatin ne'ebe hanesan loron rua liuba bainhira ha'u mai atualiza blog ida-ne'e iha Global Internet Cafe, Caicoli. Hateke ba luron boot.

Lalehan falun an ho kalohan mutin...

Foin almosu iha Terrace Cafe..

Kole oituan hafoin tiha halo servisu interpretasaun simultania iha servisu fatin iha enkontru ida, ne'ebe lori kedas oras 1 ho balun nia laran........]


*) Lalika iha duvida atu fila fali de'it atu hamutuk bebeik ho natureza: foho, tasi, mota, kdadalak, nst. Natureza sei, konserteza, oferese ba ita sabedoria murak no kmanek.

**

AFORISMA DIARIA [3-4-2008]

[Ohin dadeer tuku 7:15 ha'u ba fali tasi ibun Fatuhada nian--atu hala'o reflesaun. Iha Segunda semana kotuk mos ha'u foin ba iha fatin maka hanesan, maibe la konsege halo reflesaun tanba hasoru malu ho maluk Tomas, ha'u-nia vizinu. Ami dada lia oituan kona-ba situasaun rai laran nian, ne'ebe nakonu ho nia 'zig-zag'. Ha'u preokupa, keta halo "istoria bele repete fila fali".

Lalehan iha tempu dadeer ohin malahuk. Tasi la boot. Laloran baku ba ninin. Maibe tasi been ladun moos. Loromatan sa'e kaleur ona, maibe haree la hetan, tanba subar an iha kalohan leet. Hosi dok ha'u hateke Atauro, no estatua Kristu Rei..Panorama dadeer nian ida-ne'ebe fantastiku. Ha'u haluha lori makina fotografia. Ha'u somente lori de'it gravador ki'ikoan marka Sony. Ha'u grava ha'u-nia lian; deskreve panorama dadeer nian, nst...

Depois ha'u ba tuur iha banku, iha tenda oan ida nia laran, besik luron boot, no iha ne'eba maka ha'u tenta hala'o reflesaun............]

***

*) Armonia no kmanek dame nian sei, konserteza, la haklaken sira-nia knananuk murak bainhira ema na'in rua ne'ebe involve iha konflitu ida sei kontinua nafatin ulun toos, no la haraik an ba malu.

*) Inan nia matan been , ne'ebe suli no turu la maran hosi nia hasan, tanba de'it ita oan sira-nia hahalok kleuk, sai nu'udar avizu forte ida katak buat ne'e hanesan tusan boot ida, ne'ebe ita hakarak ka lakohi, ita tenke selu iha loron aban-bainrua.

*) Hanesan ema fiar na'in ida, ha'u hakarak dehan katak ha'u fiar iha liafuan sira- ne'ebe hatete, "Primeiru Maromak, segundu inan-aman". Ha'u somente repete fali de'it saida maka ema balu hatete ona kona-ba buat ida-ne'e. Inan-aman sira ho Maromak maka, ho kbiit tomak, hatuur ita iha mundu rai klaran. Ita sei sidi, ita sei monu bainhira ita fila kotuk, no lakohi atu rona sira-nia lia murak..

***

AFORISMA DIARIA [2-4-2008]

[Ha'u tuur hateke ba luron boot bainhira hakerek hela nota ne'e iha komputadora, iha Global Internet Cafe, Caicoli. Horiseik mos nune'e banhira ha'u mai atualiza fali ha'u-nia blog.

Kareta ho motor la'o liu. Estudante universitariu sira--ida ka rua hein kareta iha ai kaixote nia hun. Balu tara pasta, la'o ba, la'o mai.

Ha'u foin almosu iha Erli. Ema ladun iha. Han modo koto ho ikan. Horiseik mos kuaze hanesan, somente diferensa iha na'an de'it.

Lalehan malahuk. La hatene kala orsida lorokraik udan sei tun. Horikalan udan tau maka'as. Molok ha'u atu fila ba uma iha tuku 8 hosi servisu fatin, udan been hisik oituan ha'u.

Panorama sidade Dili iha tempu udan maka: luron kuak arbiru. Bee nalihun iha estrada laran tanba sistema kanalizasaun bee maka ladi'ak. Ne'e sai tiha ona problema kronika ida. ....]

***

*) Mestre ka mestra nu'udar ema ne'ebe prepara nia an sai jambata, no konvida nia eskolante sira atu hakat liuhosi jambata ne'e; no depois tiha halo fasil hala'o pasajen-hakur liutiha jambata ne'e, jambata ne'e mos tohar ho laran haksolok, no dudu eskolante sira atu harii rasik sira-nia jambata. [tradusaun livre hosi liafuan eskritor Gregu, Nikos Kazantzakis ne'ebe ha'u hetan ohin dadeer iha livru "Berguru pada Anak--20 Kiat Parenting", obra Paul Subyanto, pajina 130.]

*) Karik la sala, ha'u hatete tiha ona antes katak diplomasia ne'e ita haree ba hanesan loloos ita ba "lambe ema nia kidun". Se de'it maka hatene aplika didi'ak diplomasia iha moris, ema ne'e konsege pratika ona arte komunikasaun inter-personal. Ne'e sai nu'udar baze ba komunikasaun iha nivel sira aas liutan tuirmai iha mundu ohin loron nian, ne'ebe nakonu ho "trick" oinoin.

*) Iha teoria, buat hotu ne'e ita haree ba la'o loos hotu. Buat ida maka furak, no ideal tebes konserteza. Maibe, iha mundu real, ita presiza iha fleksibilidade atu adapta ho situasaun no kondisaun atual. Se la'e, ita rasik maka sei enfrenta frustasaun iha tinan bailoro, no ita, to'o ikus, iha tendensia atu fo sala de'it ba ema seluk no ambiente.

***

AFORISMA DIARIA [1-4-2008]

[Ohin loron bosok teen. Laiha voatu sira ruma sirkula iha rai laran atu 'selebra' loron bosok teen..Estranu!!

Iha buat barak maka tuir loloos ha'u hakerek iha ne'e. Semana rua resin maka ha'u la mai atualiza ha'u-nia blog sira. Okupadu ho servisu, vida familiar, nst halo ha'u laiha tempu no vontade atu hala'o buat ne'e.

Loro manas. Iha foho leten ne'eba nakukun. Orsida lorokraik bele udan karik..
Ha'u foin almosu iha Erli, depois ho Alex ho kolega sira dada lia iha Terrace Cafe.

Loron tolu tuir-tuir malu ne'e udan maka'as.

"Segunda Negra" kontinua preokupa Timoroan barak. Halo ema sai bila an, no husu: tanba sa, tan se?
Iha loron 19-3 ha'u simu lia-murak hosi alin Mundo, ne'ebe deskreve nia sentimentu hanesan tuirmai:

segunda nakukun/loromatan foin fo roman/hamanas rai lafaek/hali bot, sei hisik tahan mahubeen/semo manu metan sira//rani iha leten/tukir kulit halibot/we mean nakfakar rai lafaek// [14:49:34/19-3-2008]

Ha'u impresionante ho liafuan sira ne'ebe Mundo hakerek.
Segunda Negra sei hakerek iha istoria Rai Lafaek, konserteza. Jerasaun sira tuirmai sei hatene katak afinal iha buat ruma la'o la loos. Presiza hadi'a. Presiza ke'e sai abut problema nia hun.

***

*) Hanesan poeta, ha'u presiza la'o tuir ain fatin poeta tuan sira-nian. Hili saida maka sira soe hela iha dalan ninin. Karik ha'u la halo ida-ne'e, ha'u sei la hatene ha'u-nia hun, no ha'u sei la hatene ha'u-nia dikin.

*) Ita ida-idak, atu hakarak ka lakohi, sempre rai "naan ruin iha armariu laran".

*) Mestre, ha'u Na'i... ha'u hakarak subar ha'u nia an iha Ita Boot-nia neon ho fuan. Iha Ita Boot-nia fuan ho neon, maka sai nu'udar lalenok, ha'u sei fihir ha'u-nia an, no ha'u sei hatene liutan se loos maka ha'u nia an.

***

AFORISMA DIARIA [13-3-2008]

[ Semana tolu alias hamutuk loron 21 loloos mak ha'u la mai atualiza ha'u-nia blog sira. Ha'u sinti ba ha'u nu'udar ema ida-ne'ebe "ketinggalan kereta" iha aspetu vida literaria iha mundu 'cyberspace'. Ha'u-nia tempu okupadu barak liu ho vida familiar, no servisu, nst, ne'e duni halo ha'u lakon tiha ona oituan animu hodi mai hala'o atualizasaun ba blog sira.

Apai-nia dezenvolvimentu moris hanesan kosok oan ida iha ha'u no Amor nia leet presiza tebes duni ami-nia atensaun boot. Ha'u tenke halo sakrifisiu mak'as ba nia kresimentu fiziku no mental.

Loromanas. Oras ne'e ha'u iha Global Internet Cafe, Caicoli.. Almosa iha Erli.

Ha'u lori mos nota entrevista sira ne'ebe halo ho poeta kontemporaniu Indianu sira, ne'ebe ha'u imprimi hosi internet. Interesante atu observa sira-nia pensamentu poetiku...

Fulan ida, loron rua ona "Segunda Negra" akontese. Ita laran susar, ita laran dodok, ita laran kanek. Timoroan sira, hanesan ema sarani, hakat, lori sira-nia krus todan, sa'e ba Kalvariu nia tutun....]

*) Lia fuan sira iha liras. Lia fuan sira semo, hadulas universu. Lia fuan sira iha kbiit atu hamamar ema-nia laran, no mos iha kbiit atu hakenek ema-nia laran. Ita hotu nia kna'ar maka atu labele naran hasai liafuan sira, no lekar arbiru deit iha ita-nia moris loro-loron.

*) Keta naran ko'alia tun, ko'alia sa'e. Fatuk sira iha tilun, ai sira mos iha tilun. Katuas ho ferik sira sempre buka fo hatene kona-ba buat ne'e mai ita. Maibe, ita mak dalaruma iha tendensia atu halo tilun diuk ba sira-nia liafuan.

*) Ema Ingles sira hatete, "time is money", no ema Indonezia sira tradus buat ne'e sai, "waktu adalah uang". Tempu ne'e osan mean. Ita labele so'e lekar arbiru de'it. Se la'e ema seluk hili tiha, ita maka sei leki leet.

*) Atu halo di'ak buat ruma presiza tempu naruk, maibe atu halo aat ne'e lalais de'it. Ah, moris ita ema nian ne'e nakonu loos ho paradoksu!

*) Karik ita haree ho didiak, afinal ita-nia moris iha mundu ne'e apenas iha de'it trajedia no komedia.

***

AFORISMA DIARIA [21-2-2008]

[Global Internet Cafe...Rai loro..Kalohan mutin taka oituan lalehan. Kareta no motor la'o... Estudante sira la'o ba, la'o mai.. Ai tahan matak..Anin hu.. Luron sei bokon...

Udan tau maka'as loos horikalan to'o fali ohin dadeer tuku 7:00. Udan no anin. Uma oin sira bee nakonu.. Iha fatin balu parese bee sa'e tan uma.. Ema sira okupadu loos iha dadeer san hamoos baleta kuak iha uma sorin maka intupidu.

Iha fatin balu iha territoriu laran, kondisaun konserteza sei hetan impaktu maka'as hosi udan tau maka'as ida ne'e.

Ita preokupa ho kondisaun iha kampu dezlokadu sira. Maluk sira kala aguenta ho udan been, no kondisaun bokon iha tenda lona sorin-sorin.....]

*) Afinal atu sai rai ida-ne'ebe hamrik raisik alias ukun rasik nia an la'os buat ida maka fasil. TL hanesan loloos kosok oan ida ne'ebe foin hakat atu la'o. Krize atual ne'e halo TL monu, tidin kidun. TL tenke hamrik fila fali, hakat ba oin, hodi hasoru naroman tempu nian.

*) Sa valor moris nian maka ita sei iha tan, se karik espiritu amizade nian ne'ebe loloos ita la buka ona atu kuda no haburas bebeik?

*) Moris sei lakon nia sentidu se karik ita, hanesan ema sira ne'ebe hala'o moris ne'e, lakohi tan ona atu buka hola distansia hodi halo reflesaun klean kona-ba moris nia esensia, ne'ebe nakonu ho buat hirak maka ita la espera.

*)Nu'udar ema fiar na'in, ita abut la metin, ita sei sai hun la dikin bainhira ita kotu ona ho ita-nia Nai Maromak.

*) Poeta/lia na'in: ema "solitariu" ne'ebe buka atu "solidariu" ho ema seluk. Nia ema mehidor ida. Nia nu'udar ema ne'ebe moris iha fronteira entre mundu real no mundu imajinariu. Nia hakarak tau nia an hanesan ponte entre mundu rua ne'e. Nia ne'e ema estranu?

*) Keta matebian no lulik rai ida ne'e nian babeur ona ita karik, tanba ne'e maka ita la buka atu hamutuk hodi kesi metin aisar, hodi nune'e ita bele dasa fo'er iha uma laran, maibe tetak rahun tiha aisar kesak sira ne'e, no halo namkari?

AFORISMA DIARIA [20-2-2008]

[Global Internet Cafe, Caicoli. Rai nakukun. Lalehan malahuk..Udan kala orsida tan tun...]

*) O dudu ha'u ba didin lolon, no nune'e tiha o lori surik naruk atu sona tan ha'u. Ha'u buka dalan atu defende ha'u-nia an ho kbiit tomak ne'ebe ha'u iha, tanba ha'u hatene katak ha'u iha perigu nia laran. Depois o dehan katak ha'u ema bulak, no laiha konsiensia kona-ba konseitu dame nian?

*) Bainhira iha kuzineiru barak resin ne'ebe tein modo oin ida deit, entaun modo ne'e sei lakon tiha nia sabor. Ita mos laiha vontade atu han modo ne'e.

*) Tanba deit ha'u-nia riku soi, ema halo ha'u no ha'u-nia maluk sira hanesan loloos "modo masin". Ha'u-nia emar barak maka seidauk matenek, entaun ema aproveita situasaun ida ne'e hodi "hanehan" ha'u ho maluk sira seluk ho maneira oin-oin. Laiha dalan seluk ba ha'u no ha'u-nia maluk sira, anaun ser buka atu funu hasoru tipu neo-kolonialismu ida hanesan ne'e ho kbiit tomak maka ami iha.

*) Rai boot ne'ebe iha kbiit maka'as sempre iha tendendsia buka atu domina rai seluk. Buka hakarak atu sai hanesan "polisia"--tau matan ba ema. Naturalmente, rai boot ida ne'e sei sinti la hakmatek, bainhira rai ne'e haree rai seluk, liu-liu rai ki'ikoan sira, ne'ebe buka atu mantein sira-nia militansia.

*)Mundu globalizasaun mosu mai iha ita-nia oin, hodi "bani been" iha nia liman kuana, no lori "veneno" iha nia liman karuk. Ita maka tenke matan-moris, neon na'in hodi hatene kona-ba realidade ida ne'e, atu nune'e ita sei laran monu ba nia lasu.

****

AFORISMA DIARIA [18-2-2008]

[Global Internet Cafe. Rai nakukun. Lalehan la moos. Ha'u foin almosu lalais iha Alpha & Omega.

Familia Soares oras ne'e hasa'e namanas hela bandeira metan tanba Tiu Xico, Tia Kiik nia katuas oan Maromak bolu tiha ona iha Sabadu, 16-2 lorokraik. Ha'u rona notisia ne'e iha Sabadu kalan ona. Horiseik feton sira no alin Enty maka ba Manatuto hodi hato'o sentimentu pezame. Ha'u labele ba hamutuk ho sira tanba ha'u okupadu ho servisu pesoal ne'ebe iha relasaun ho programa radiu, no kondisaun fiziku Apai nian maka ladun di'ak.
Ha'u tenta ajuda trata surat mate nian ne'ebe atu haruka hosi Manatuto ba Kupang, hodi nune'e Abela (Tia Ki'ik) sira bele mai.

Programa radiu "Anin Naniri" iha RTTL -edisaun 17-2-2008 la'o ho diak. Foin ba dala uluk ha'u grava programa n'e desde ha'u kaer programa ne'e iha tinan 2000. Ami nain tolu: Apai, amor no ha'u maka ba estudiu halo gravasaun iha tuku 6:30 to'o 7:40 kalan. Ami tenke fila sedu tanba kondisaun estadu sitiu. Iha uma, hosi tuku 8 to'o 9 ha'u tuur rona fali programa ne'e. "Not bad!", ha'u hatete iha laran.

Ohin Amor nia aniversariu, halo tinan 30. Ha'u laiha buat diak ida atu fo ba nia hanesan prezente ida. Husu boot ami-nia relasaun domin kontinua metin liutan ho idade avansadu ne'ebe oras ne'e ami iha.....]

*) Timor-Leste: rai lafaek, rai lulik. Ita hotu nian, hanesan Timoroan. Ita-nia inan sira-nia raan fakar iha nia fohon bainhira sira hahoris ita. Keta halo rai lulik ida ne'e tanis resin!

***

AFORISMA DIARIA [16-2-2008]

[Global Internet Cafe, Kaikoli...Ha'u foin fo hotu aula Ingles ba estudante sira hanesan baibain iha Sabadu. Aula la'o diak, ho partisipasaun estudante nain 18. Ami ohin ko'alia kona-ba "Krize 2006". Ohin ha'u hahu iha tuku 1, fo mid-term test ba estudante 2 ne'ebe seidauk tuir. Hotu tiha ha'u ba lalais Terrace Cafe. Hasoru kolega, XG ne'ebe uluk ami hamutuk iha SMAN I iha ne'eba. Ami dada lia lalais kona-ba situasaun atual iha rai laran. Depoisde ne'e, ha'u hahu fali aula iha tuku 2.

Ha'u-nia kondisaun fiziku ladun diak ohin loromanas molok atu hakat mai atu fo aula. Estomagu provoka fali ona. Oin halai oituan.

Ha'u toba tarde loos horikalan. Sei buka atu lee, refleta.......

Horiseik kalan, ha'u ho kolega Michael ajuda fo ami-nia servisu durubasa nian ba iha programa RTL kona-ba seguransa. Ha'u ladun sinti komfortavel ho aranju sira iha estudio, ne'e duni halo ha'u susar oituan atu rona ho didiak saida maka lokutor ko'alia, no ha'u halo durubasa direta ba lian Tetun, no sai iha radiu. Tanba estadu sitiu ne'ebe Estadu impoen, entaun ami hetan eskoltu hosi polisa NU bainhira ami fila ba uma ida-idak nian....]

*) Mundu ne'ebe ita hela ba ne'e sempre repete azineira sira, no to'o ikus hamosu raan nakfakar. Ita mos sai bila an. Ita laran taridu. Ita mos luku klean iha tasi pergunta nian oin-oin. Bainhira loos maka sirkulu visiozu sira ini remata?

***

AFORISMA DIARIA [15-2-2008]

[Global Internet Cafe maka sai nu'udar fatin mai ha'u ikus-ikus ne'e atu atualiza ha'u-nia blog sira hanesan saida maka ha'u hatete tiha ona.

Rai nakukun. Udan anin oituan. Ha'u foin ba almosu iha Alpha-Omega ne'ebe Alai servisu iha ne'eba. Han lalais. Hakerek, refleta.....profundamente....

Horiseik lorokraik depoisde almosu, ha'u uza barak liu ha'u-nia tempu hodi observa kobertura media kona-ba atentadu vida PR RH nian. Ne'e duni ha'u-nia servisu durubasa nian la la'o tuir planu ne'ebe ha'u trasa.

Ha'u fila uma sedu hosi servisu tuir kondisaun seguransa maka oras ne'e iha, desde iha loron 11-2.

Insidente 11-2 ne'ebe xoke tebes aten no fuan nasaun TL ne'e kontinua provoka ema atu husu, tanba sa maka buat ne'e sai nune'e? Ha'u iha konversa klean kona-ba asuntu ne'e ho Tio Boot bainhira ha'u almosu iha Bekusi hamutuk ho nia, Mae no Mana Zinda iha Kuarta, 13-2. .... ]

*) Timor-Leste hakat ba oin ho kanek (todan) iha nia lolon. Nia kanek sei lori tempu naruk atu kura. Kanek maka atu di'ak, derepente mosu tan fali kanek foun iha kanek tuan nia leten..Timoroan sira rasik duni maka tenke uluk nana'in harii ulun hodi kura kanek sira ne'e.

*) Poeta: ema ida ne'ebe buka halo konkluzaun moris nian iha liafuan sira ne'ebe badak.

***

AFORISMA DIARIA [14-2-2008]

[ Rai nakukun.Udan atu tau. Oras ne'e ha'u iha fali ona Global Internet Cafe, Caicoli. Molok atu ha'u tama mai iha ne'e, ha'u haree sinal iha odomatan hatete, "open 24 hours". Ha'u deskonfia katak tanba situasaun seguransa foin lalais nian maka obriga ba Internet Cafe nia nain hodi loke nia servisu internet durante oras 24, hodi nune'e fo asesu ba jornalista atu hala'o sira-nia servisu.

Mundu tomak hakfodak ho atentadu atu hamate vida PR RH nian iha Segunda, 11-2, no mos atake ba PM XG hosi grupu armadu AR nian . Ha'u simu xamada telefone hosi maluk ida servisu iha governu kona-ba insidente rua ne'e iha maisumenus tuku 8:15 molok ha'u atu ba dadaun ona servisu.

Hanesan mos ho maluk sira seluk, ha'u sinti triste tebes ho situasaun ne'e. Ha'u konsege hakerek poezia haat horiseik kalan. Tenta atu halo refleta ho klean, tanba sa maka buat hotu sai nune'e? Poezia ida maka ha'u hakarak fahe iha blog ne'e maka tuirmai, ne'ebe ha'u hakerek ho lian Indonezia:
---
REQUIEM ANAK BANGSA/benih permusuhan cukup lama tertanam/anak-anak bangsa saling menikam/anak-anak bangsa saling berhantam/gumpalan darah segar pun kembali bercecer/butir-butir air mata haru pun kembali bercucur//

Ha'u tenta haruka poezia rua, inklui ida ne'e ba maluk lubuk ida. Ha'u hetan komentariu balu.

Desde Segunda, 11-2, iha konferensia imprensa hosi ha'u-nia servisu fatin dala tolu to'o horiseik, ko'alia kona-ba situasaun atual. Ha'u akompana ha'u-nia ulun boot sira hanesan durubasa. Ha'u ko'alia sidi-sidi oituan iha konferensia imprensa sira ne'e.

Ohin iha tuku 11:00-12:30, ha'u fornese ha'u-nia servisu durubasa nian ba enkontru ha'u-nia xefe boot ho partidu politiku sira. Depoisde ne'e, ha'u ba almosu lalais iha Tropical Bakery...

Sabadu, 9-2 ha'u hala'o ha'u-nia atividade hanorin Ingles ba estudande UNTL sira hanesan baibain.

Iha Domingu, 10-2, English Conversation Club ne'ebe ha'u forma ho estudante UNTL sira hala'o nia atividade ba dala rua iha kampus UNTL. Estudante rua mosu, no ami hala'o ami-nia atividade ho antuziasmu.

Papa nia loron mate iha 10-2 marka ho ami nain 3-Apai, Amor ho ha'u-nia vizita ba rate. Ami ba sunu lilin iha Avo Feto nia rate iha tuku 6:20 PM hanesan nune'e. Iha kalan, ha'u haruka mensajen tuirmai ba alin sira:
-
IN MEMORIAM PAPA SEBASTIAO MARUBI/ita toba dukur/nia fanun ita/hadeer/hodi buka tuir nafatin/hun maka se, abut maka se/nia laran maus, nia laran midar/haklaken matak-malirin//...............]


*) Ema ne'ebe halo diak ba ema barak, sempre hasoru realidade katak ema balun haree nia ho matan ikun deit alias hakarak haree nia vida ne'e badak iha mundu rai klaran.

***

AFORISMA DIARIA [08-02-2008]

[ Ha'u mai fali ona Global Internet Cafe, Caicoli hanesan baibain hodi atualiza ha'u-nia blog sira. Almosu iha Erli tarde oituan. Hasoru Seba, Aze, Tom, Alex, Zesopol iha ne'eba.

Ha'u-nia atuasaun iha servisu interpretasaun iha enkontru koordenasaun iha edifisiu STAE nian kona-ba siklu eleitoral ohin iha tuku 10:15-12:00 ladun optimal tuir saida maka ha'u hakarak. Ha'u sidi-sidi oituan.

Figuraun! Ohin dadeer madrugada entre tuku 3 no 4 hanesan ne'e na'okteen tama uma Fatuhada. Iha tuku 5 resin maka ami foin hatene bainhira Mingas sai mai dapur, haree odomatan kotuk dapur nian nakaloke hela. Ha'u deskonfia ema ida mai na'ok ne'e hela iha ami-nia vizinu. Nia maka pode ser tama na'ok iha uma Fatuhada iha fulan liuba. Apai nia salera nono bee no kokakola kaixa tomak no kaixa sorin balu lakon.

Horikalan ha'u toba tarde loos tanba sei lee no halo reflesaun no rona muzika hosi Madredeus, Yanni, no Ben Harper.

Horiseik ha'u tuir reuniaun "town -hall" nian ne'ebe ko'alia kona-ba HIV/SIDA. Enviada Espesial SJ NU nian ba HiV/SIDA iha area Azia no Pasifiku maka mai ko'alia nu'udar oradora prinsipal. Ha'u toma nota balun ba nia ko'alia no dada lia lubuk oan ida ho kolega feto oan hosi Fiji ne'ebe servisu iha seksaun DU.

Ha'u-nia atuasaun iha servisu interpretasaun durante konferensia imprensa semanal ne'ebe ha'u-nia Xefe Boot ko'alia no mos Enviada Espesial HIV/SIDA nian maka ko'alia, la'o furak. Ha'u la sidi.

Horikalan molok ha'u fila ba uma hosi eskritoriu, ha'u hala'o 'internet surfing" ba TEFL, ha'u hetan situs ida maka furak. Furak se karik ha'u iha opotunidade foti "on-line course" ida ne'e. Let us see! .......]

*) Ita rua bele hamutuk iha uma kain ida hanesan feen ho la'en, maibe nu'udar individu, ita iha espasu moris nian ne'ebe keta-ketak. Ita nain rua labele obriga malu atu "tenke sai ema ida deit". Ne'e nu'udar buat ida maka sei nunka akontese. Saida maka ita bele halo maka kria armonia entre ita nain rua, hodi nune'e ida nain rua sei "hananu" hamutuk, hamosu atuasaun duet nian ida ne'ebe ideal tebes.

*) Sa autoridade moral maka ha'u sei iha tan, se karik ha'u rasik la atua iha ita-nia moris ida ne'e ho maneira ida ne'ebe diak, alias moralmente aseitadu?

*) Matenek ha'u buka hetan iha fatin-fatin iha mundu rai klaran. Matenek loke ha'u-nia neon no ha'u-nia fuan. Matenek ne'ebe ha'u hetan sei folin la'ek se karik ha'u rai deit ba ha'u-nia an, no la fahe ba maluk sira seluk.

*) Poeta sira apenas nu'udar dirijente iha "orskestra simfonia moris nian". Sira konvida ita ho laran luak atu "kanta" ho sira. Ita prontu atu hatan ba konvite ne'e ka?

***

AFORISMA DIARIA [6-2-2008]

[Agora ha'u iha fali ona Global Internet Cafe, Caicoli atu atualiza ha'u nia blog. Ha'u la almosu dauk tanba ha'u-nia kabun sei bosu. Ohin ha'u matabixu tarde loos--han manutolun sona, koto no ham iha Cafetaria OB.
Ha'u ba sedu eskritoriu (Amor maka tula hanesan baibain) ohin dadeer iha tuku 7:45 tanba ha'u ho kolega, Marco tenke ba akompana ami-nia Xefe Boot, AK iha reuniaun altu nivel kinzenal iha Palasiu Governu, ne'ebe hala'o iha tuku 8. Enkontru lakaleur deit. Ha'u-nia atuasaun ohin diak liu oituan kompara ho atuasaun sira iha reuniaun sira uluk liuba.

Horiseik loromanas la konsege atualiza ha'u-nia blog iha TT Akait tanba sistema maka variadu. Ha'u somente lee deit. Antes ba Akait, ha'u ba almosu iha Erli. Hasoru Nuno ho Mada. Ami dada lia kona-ba lalaok hakiak oan. Ha'u hatete ba sira katak hakiak oan ne'e buat furak ida, maibe aumesmu tempu nu'udar buat ida 'xatu'. Ha'u dehan tan katak ha'u tenke aprende oinsa maka atu sai aman diak ba ha'u-nia oan mane mesak, Apai maka oras ne'e halo ona tinan 1 fulan 3.

Horiseik tuku 3-5 lorokraik hamutuk ho ha'u-nia kolega, Michael akompana ami-nia Xefe Boot iha reuniaun ida ho NGO Forum. Ha'u-nia atuasaun diak, maibe sidi-sidi oituan. Michael enkoraja liutan hodi dehan katak ha'u-nia atuasaun ne'e eselente. Ami nain 2 nu'udar ekipa diak iha ami-nia fornesimentu servisu hanesan durubasa....]

*) Se ita dehan katak hosi rai ulun to'o rai ikun, tasi feto, tasi mane, lorosa'e to'o loromonu, ita ne'e mesak feton nian, naan nian deit, maibe tanba saida maka han malu--haree malu hanesan loloos busa ho asu?

*) Diak liu ita keta ibun boot resin hodi promete tun, promete sa'e atu hala'o buat ida. Ita-nia nanal ne'e ruin laiha, fasil tebes atu baku ba, baku mai. Ha'u tauk deit katak to'o ikus ita la kumpri saida maka ita promete tiha ona.

***

AFORISMA DIARIA [04-02-2008]

[Ha'u mai fali Global Internet Cafe agora hodi atualiza ha'u-nia blog sira. Foin almosu iha warung Padang Bobonaro. Hasoru kolega sira uluk ami hamutuk iha Yogya: Ilido no Eduardo iha ne'eba.Kleur duni ona maka ha'u la ba han iha warung ne'e. Iha tempu UNTAET ha'u dala ruma ba han iha ne'eba. Antes almosu ha'u lori surat tahan uzadu sira ba iha loja Fotokopia Railakan atu halo kapa. Hasoru primu Andre Koli...

Ha'u husu sedu ba ha'u-nia xefe bainhira ohin reuniaun iha ami-nia eskritoriu iha tuku 9:45 AM tanba ha'u tenke ba Akait hasoru kolega Portugeza, Rute atu hala'o entrevista ba programa RDP 'ao vivo", ne'ebe tuir planu atu hala'o iha tuku 10 AM. To'o iha ne'eba, ha'u sei hein to'o kuaze tuku 11 maka programa foin hahu. Ohin Programa Conversas em Portugues halo nia tinan lima. Ha'u ba iha programa ne'e hanesan poeta Timor-Leste. Tanba tempu la to'o ona, ne'e duni ami ko'alia lalais deit iha final programa ne'e, no ha'u konsege lee poema ida ho titulu "Passaro da Paz", ne'ebe tradus ba Portuges hosi kolega-poeta, Toze Borges iha tinan liuba...]

*) Oinsa loos maka ita atu iha disiplina iha tempu katuas nian se ita rasik la buka atu kuda buat ne'e iha ita-nia an bainhira ita sei ki'ik no iha tempu foin sa'e?

*) Formula pensamentu klasiku tuir mai furak ba ita atu refleta bebeik:
-Ha'u hatene katak ha'u la hatene;
-Ha'u la hatene katak ha'u hatene;
-Ha'u hatene katak ha'u hatene;
-Ha'u la hatene katak ha'u la hatene.

*) Apa Katuas la rai buat barak mai ami, oan sira bainhira nia hakat ba mundu seluk. Nia rai deit kbiit entuziasmu mai ami atu konkista moris ne'e, ne'ebe nakonu ho mutin ho metan. Ami mos hakarak atu transmiti buat ne'e liu ba imi, oan sira hanesan buka'e klamar nian.

*) Hakarak sai poeta alias lia nain? Labele baruk atu sinti duni moruk no midar mundu nian.

***

AFORISMA DIARIA [02-02-2008]

[Ha'u iha fali ona Internet Cafe Global, Caicoli. Foin maka hanorin hotu Ingles III ba estudante sira. Sira balu ne'ebe la tuir dauk ezame mid-semester iha semana rua liuba, ha'u fo tempu atu tuir ezame ohin. Ami hahu ezame iha tuku 1:30. Depois hahu fali aulas hanesan baibain, iha tuku 2:30, no hotu iha tuku 4:00. Ha'u la fo materia foun, maibe ami diskuti kona-ba aprezntasaun sira-nian ne'ebe hato'o iha semana sira liuba; halo koresaun ba sala sira ne'ebe halo iha aspetu gramatika no pronunsia, nst...

Ohin dadeer ba tasi ibun Fatuhada iha tuku 8:00. Tuir loloos atu lori Apai, maibe to'o ikus ha'u desidi la lori ha'u-nia oan ba tasi ibun, tanba loro manas ona. Nia ba ho ha'u ne'e furak ona, maibe ha'u kala sei laiha tempu diak atu tuur halo reflesaun, no ha'u-nia tempu tomak ha'u kala sei dedika tomak hodi tau matan, haree nia maka halai tuun, no halai sa'e iha rai henek leten. Ha'u iha tempu furak atu tuur refleta. Aforisma sira ne'ebe mosu iha edisaun ohin nian nu'udar rezultadu reflesaun ne'ebe ha'u halo ohin iha tasi ibun Fatuhada. Ha'u mos haruka sms poezia oan ida kona-ba Jesus ba kolega sira, no alin Mundo. Mundu fo suporta ha'u hodi dehan, "Cool. Tasi nia panoroma fo inspirasi barak. have nice work." (07:29:18/02-02-2008).....]

*) Jesus--revoltador--revolusionariu/Jesus tuba/Jesus doko/Revolusaun domin, ne'e maka Nia asaun. Labele baruk atu tuir, labele hakotu, iha dalan klaran, ne'e maka Nia husu fila-fila//

*) Biblia: nu'udar bee matan/suli loron, suli kalan/ ha'u kuru, bee la maran/bee ha'u daku ha'u neon/ bee ha'u daku ha'u fuan/ bee halo ha'u hetan matak-malirin//

*) Destinu nasaun nian iha ita hotu nia liman. Se nune'e, entaun mai ita rona malu, mai ita fo laran ba malu. Se la hahu agora, bainhira tan, se la'os ita rasik, se tan?

*) Buat hotu sei la tuun deit hosi lalehan, se karik o la haka'as an to'o kosar metan suli atu hetan buat ida ne'ebe o hakarak.

*) Rai sabutar/manu kokorek ona/lakaleur rai hun mutin/lakaleur loro matan mosu/Belun, o prontu ona atu hadeer, o prontu ona atu ka'er rasik o-nia destinu?//

*) Laloran tasi/Baku ba ninin/ Hamosu furin/Rai henek bokon/Panorama ida maka furak/Ha'u tuur, rona ho hakmatek/ Ha'u tuur, hanoin ho neon luan/Nai, aban O sei fo fali tempu mai atan ha'u atu mai iha tasi ibun?//

*) Ita-nia isin presiza vitamina, presiza aihan murak. Ita-nia klamar?

*) LAMENTATION OF A MOTHER: 1) Oan, o dook tiha ona/o dook hosi ha'u-nia sorin/se loos maka ha'u atu tau neon tan?/se loos maka ha'u atu tau laran tan? 2) Ka'er metin ba o-nia lia fuan kmanek/ halo ha'u laran haksolok/hanoin fali ba o-nia hahalok kleuk/halo ha'u laran taridu/Oan, keta lokok an resin!/Keta haluha hun mak se, keta haluha abut maka se!//

***

AFORISMA DIARIA [31-1-2008]

[Oras ne'e ha'u iha fali ona Internet Cafe Global, Caicoli. Aproveita tempu ne'ebe ha'u iha hodi mai atualiza blog sira. Almosu ho kolega Portugeza foun ida ne'ebe Mara fo konese mai ha'u iha Alpha & Omega besik Parlamentu Nasional. Mara labele almosu ho ami tanba nia tenke ba aeroportu ba hasoru Sra. Fatima ne'ebe foin to'o hosi Portugal. Kolega foun ne'e naran Rute. Ami dada lia kona-ba preparasaun programa radiu RDP nian ida, ne'ebe nia hakarak entrevista ho ha'u "ao vivo" iha Segunda Feira oinmai. Furak mai ami atu dada lia liutan kona-ba mundu literariu, espesialmente poezia. Ho ha'u-nia "broken" Portuges ne'ebe ha'u iha, ha'u tenta espresa ha'u-nia idea sira ho avontade. Rute mos hakarak pratika nia Tetun, entaun ha'u dehan ba nia katak husu boot ami-nia relasaun ne'e la para deit iha programa radiu, hodi nune'e ami bele habelar liutan ami-nia aventura aprendizajen nian (lian Tetun no Portuges) iha tempu badak ikusmai. Molok atu la'o hela ami rua Rute, Mara entrega livru poezia Amerikanu, Walt Whitman nian (katuas poeta ne'e nu'udar ha'u-nia mentor literariu ida mos) iha lian rua:Portuges no Ingles, no karta ida ne'ebe solok hosi ha'u-nia belun-poeta, Toze iha Portugal. Iha livru nia primeira pajina, Toze hakerek, "............ My dear friend, Abe: As you truly said, you and me "we are always together in poetic dreams"........". Ha'u sinti ha'u hetan enerjia foun atu hala'o nafatin ha'u-nia kna'ar hanesan ema lia nain ida iha rai lulik ida ne'e.

Hanesan baibain, ha'u fornese ha'u nia servisu interpretasaun ba konferensia semanal iha ha'u-nia servisu fatin. Konferensia imprensa ohin nian jeralmemte la'o ho diak. Maibe, ha'u sinti katak ha'u sidi-sidi oituan iha ha'u-nia atuasaun. Konferensia hahu iha tuku 11:00 to'o tuku 12:00 loromanas. ...]

*) Hanesan eskritor/poeta ita sempre enfrenta dezafiu oinsa maka ita kontinua atu observa realidade moris nian ho perspetiva ida ne'ebe klaru. La'os buat ida ne'ebe fasil atu hala'o. Presiza iha estamina mental nian ida ne'ebe forte atu hala'o ezersisiu ida ne'e.

*) Ha'u la'os anju. Ha'u iha parte fraku ne'ebe barak la halimar. O sei hakarak atu komprende no simu ha'u ho liman rua bainhira o hetan ha'u ho kondisaun ida hanesan ne'e?

*) Lei karma sempre iha/eziste. Atu fiar ka la fiar buat ne'e, konforme deit ita. Ema ida la obriga.

*) Moris ne'e hanesan lalenok. Bainhira o hamanasa, nia sei hamanasa ba o, no bainhira o tanis, nia mos sei tanis hasoru o. Ha'u hanoin fali liafuan hirak ne'e hosi livru eskritor Ingles nian ida ne'ebe ha'u haluha ona nia naran ho titulu "Vanity Fair".

***

AFORISMA DIARIA [30-1-2008]

[Ha'u iha Internet Cafe Global, Caicoli oras ne'e. Foin almosu lalais deit iha Terrace Cafe besik Parlamentu Nasional. Kansela tiha ha'u-nia enkontru ho estudante sira ohin antes oras almosu tanba ha'u tenke fila sedu ba eskritoriu atu hala'o servisu urjente ruma..... ]

*) Ita tuur la hakmatek, ita-nia konsiensia sempre akuza ita bebeik bainhira ita halo buat ruma ne'ebe la loos.

*) Atu kleur ka tarde justisa sei manan iha loron ruma. Infelismente, justisa sei terus uluk lai.

*) Na'an 'haram' ne'ebe ita falun metin ho didiak iha armariu laran, loron ruma nia iis dois ema sei horon.

***

AFORISMA DIARIA [26-1-2007]

[Ha'u mai fali TT Akait oras ne'e hodi atualiza blog sira. Foin akaba daudaun sesaun aula Ingles III maka ha'u fo ba alunu sira hosi departamentu agrikultura, fakuldade Sosial Ekonomia, UNTL. Iha estrada ibun Akait, ha'u hasoru Tio Boot, Enty no Felia, lori Avo nia kareta nissan metan. Katuas to'o iha 23-1 hosi Macau, no sei hela iha TL to'o meadus fulan Fevereiru. Aula ohin la'o ho dinamika ida ne'ebe kapas...

Ohin dadeer ha'u ba fali Tasi Ibun Fatuhada nian tuku 8:30. Tasi maran. Rai henek bokon ,no ita la'o iha rai henek leten, ita sinti ba furak. Kleur ona maka ha'u foin ba fali tasi. Ambiente tasi nian fo inspirasaun mai ha'u atu hakerek. Ha'u hetan animu foun hodi hala'o viajen. Iha ai hun mahon ida, ha'u tuur, no hakerek reflesaun ne'ebe mosu iha Aforisma Diaria ho data ohin nian iha blog ida ne'e......]

*) Buat hotu hakmatek, buat hotu nonok ona/Ita rona Na'i ko'alia/Ita rona Na'i tesi lia/ Ita rona Na'i hakotu lia//

*) Viajen sei naruk/presiza hanawa/ presiza estamina/ viajen nakonu aitarak/ viajen nakonu rai kuak/tenke matan moris, tenke neon na'in//

[Ha'u haruka liafuan oan sira ne'e ba maluk sira, inklui ha'u-nia alin, Amundo. Ha'u hetan resposta hosi nia tuirmai: viajen iha nia plano/viajen naruk htene metan no mutin/ htene ain leut fatin//) 08:06:00/25-1-2008]. Hetan mos resposta hosi maluk ida fali naran Mary Vidigal tuirmai: obrigada, ba ita-nia poema, nia signifikadu makas tbs, ne los duni.// 11:04:19/26-1-2008]

*) Ha'u nonok, o hanoin ha'u beik/ Ha'u mamar, o sama ha'u-nia ulun/ Ha'u hatan, defende ha'u-nia an, o dehan ha'u haluha an?//

AFORISMA DIARIA [23-1-2008]

[Agora ha'u iha fali TT Akait. Foin almosu iha Erli. Ha'u dada lia oituan ho Nelson no Lina kona-ba situasaun rai laran nian ne'ebe nakonu ho problema sosial, nst.

Ohin dadeer hosi tuku 09:30-11:00 ha'u ho Amor ba Embaixada Portugal trata ha'u-nia BI Portuges foun. Ha'u soe lakon BI ne'e iha Uma Usindu. Ha'u tenke hein tempu lubuk ida atu hetan BI hodi trata pasaporte...]

*) Importante ba ita atu tuir ain leut mestre ida nian bainhira ita sai hanesan eskolante. Ita labele sama tuir ain leut ne'e, maibe sei furak liutan, bainhira ita hamosu ain leut seluk iha besik ain leut mestre nian.

AFORISMA DIARIA [22-1-2008]

[ Agora ha'u iha Internet Cafe Global, Kaikoli fali ona atu atualiza ha'u-nia blog sira. Almosu iha Terrace Cafe besik Parlamentu Nasional. Hasoru malu ho Jailson hosi MNE, no ami dada lia oituan kona-ba mundu diplomasia. Nia apresia kapasidade JRH nian iha mundu ida ne'e..Tuir loloos ha'u atu ba Uma Fatuhada hodi ba haree Apai maibe ha'u kansela fali planu ne'e tanba kna'ar ruma iha eskritoriu ezije ha'u atu hahu tama fali sedu servisu.....Iha ha'u-nia viajen mai iha Internet ne'e, ha'u hasoru malu ho ha'u-nia estudante rua; ida ha'u haluha ona nia naran, no ida fali naran Fernando...]

*) Liafuan, kro'at liu tudik/Liafuan, meik liu surik/Liafuan, sona borus ita fuan/ Liafuan, sona klean ita neon/Keta naran losu/Keta naran lekar/Keta naran kari/Keta naran tuda//

*) Ita keta halimar ho lia loos. Lia loos ne'ebe ita falun metin, to'o ikus sei mosu malorek. Lia loos sei rebenta hanesan bomba. Bainhira rebenta ona, maka ema hotu sei hakfodak, no ita basa reen toos mos, buat hotu liu ona.

*) Furak atu ba ita refleta fali kantiga Tetun sira tuirmai, ne'ebe iha signifikadu klean:
-Hori uluk be parenti, ida mos ami, hetan seluk parenti ona, ami laek ona;
-Sambarle musan ida monu uma leet, ema seluk hili tiha, o leki leet;
-Saburaka fuan ida rai iha meza leten, ka'er koko, han koko, han liutiha.

***

AFORISMA DIARIA [21-1-2008]

[Agora mai fali iha Internet Cafe Global, Kaikoli. Ohin ha'u almosu iha Restorante Erli. Kleur ona maka ha'u la ba han iha restorante ne'e. Hasoru kolega sira: Abilio, Xico. Ami dada lia kona-ba filozofia, nst...]

*) Furak atu haree fali esensia analize psikolojika ho nia formula tuirmai:- I am OK, You are OK; -I am OK, You are not OK; -I am not OK, You are OK; -I am not OK, You are not OK.
Formula ida ne'e ajuda ita leno didiak ita-nia an, hodi nune'e ita, pelumenus, hatene ita-nia an ne'e se loos.

AFORISMA DIARIA [19-1-2008]

[Iha TT Akait oras ne'e. Foin fo ezame materia Ingles III meiu-semestre nian ba aluno no aluna sira departamentu Agrikultura, Fakuldade Ekonomia Sosial, UNTL, ne'ebe ha'u hanorin ba semestre ida ne'e. Sira nain 14 deit maka tama ohin tuku 2 loromanas. Sira seluk, tuir alunu ida naran Fernando katak, ba hala'o 'field study' iha Maliana. Ezame dura oras ida ho balun...]

*) Iha mundu apredizajen nian, so mate deit maka hapara prosesu ne'e. Bainhira ita ema sei moris, dada iis iha mundu ne'e, prosesu ne'e sei kontinua la'o nafatin. Atu aprende buat ida, presiza ita sunu lakan bebeik ita-nia ahioan lilin animu nian. Karik ita la sunu ona, entaun adeus biola!

*) "Quem corre pelo gosto nao cansa," ditadu Portuges nian hatete. Furak ba ita atu hala'o buat ida ho gostu tomak. Hodi nune'e, ita sei alkansa ho maksimalmente buat ne'ebe maka ita hakarak hala'o ne'e.

***

AFORISMA DIARIA [17-1-2008]

[Ha'u mai fali Internet Cafe Global, Kaikoli. Tuir loloos ha'u mai horiseik kalan, maibe la konsege mai tanba tempu maka la admiti. Amor, Apai, Zakia, no Bunga maka tula ha'u mai.]

*) Moris nu'udar viajen naruk ne'ebe ita hala'o. Dala barak ona maka ha'u hatete buat ne'e. Ita nu'udar viajante, ema la'o rai alias sole-salan. Durante viajen naruk ida ne'e, iha buat barak maka ita esplora. Furak atu refleta fali lia fuan poeta Ingles, T.S. Eliot nian ne'ebe hatete katak, "We shall not cease from exploration/And the end of all our exploring/will be to arrive where we started/And know the place for the first time//"

AFORISMA DIARIA [15-1-2008]

*) [ Saida maka ha'u hala'o tiha ona durante tinan 2007? Hanesan baibain, hetok ha'u halo buat barak, hetok ha'u sinti katak iha deit buat oituan maka ha'u halo tiha ona iha moris maka konsidera nu'udar viajen naruk ida ne'e. No, konserteza iha buat barak tan maka presiza ha'u atu halo molok h'u fila fali ba rai kuak alias fila ba rai rahun...

[Oras ne'e ha'u mai iha Global Internet Cafe, Caicoli. Ha'u mai atu atualiza blog iha tinan foun ida ne'e. ]

*) Reflesaun ajuda tebes ita hateke borus ita-nia an ne'e oinsa loos. Asaun reflesaun nu'udar nesesidade ida ne'ebe ita presiza hala'o se ita hakarak tebes duni atu involve an iha kampu moris nian maka nakonu ho dezafiu ne'e.

*) Ita-nia kakutak la konsege sukat Nai Maromak nia kbiit. Rekonese katak ita ema ne'e iha limitasaun, nu'udar asaun haraik an nian ida ne'ebe furak, no asaun ne'e halo ita sai ema matenek, no neon nain.

*) Prosesu resiklajen akontese iha aspetu hotu-hotu iha ita ema nia moris. Prosesu ne'e nu'udar fenomena interesante ida ba ita atu refleta. Sei hanoin lia fuan iha Biblia ne'ebe hatete katak, "there is nothing new under the sun?"

AFORISMA DIARIA [26-12-2007]

[TT Akait. Foin almosu ho Amor ho nia kolega, Elsa iha restorante Indonezia nian ida iha kruzamentu (lampu mean) Lesidere ne'eba.
Ohin tama servisu ho laran todan-todan, tanba sei baruk hela. Tuku 10 dadeer ohin tuir reuniaun xefe seksaun sira nian iha servisu fatin. Hahu ohin to'o 4/1/2008 ha'u kaer kargu hanesan enkaregadu xefe unidade tradusaun.Ha'u relata oituan kona-ba kondisaun tradusaun/interprete sira: 5 maka ba foti ferias, hela nain 4 maka oras ne'e hala'o hela servisu...]

***

[ Natal tinan ida ne'e la hanesan tinan baibain. Tanba lia naksalak/sakat oan ruma, ha'u hakiduk ba kotuk hodi haree panorama moris (familia) nian hosi dook. Ha'u tenke tolan buat moruk sira ne'ebe mosu iha ha'u-nia oin. Ha'u ba misa dadeer tuku 7:30 horiseik iha Loron Natal iha Igreja Motael. Ha'u gosta rona omilia. Iha omilia, Pe. Venansio konvida sarani sira atu hakat hodi ba refleta oituan kona-ba esensia eventu Natal nian ne'ebe akontese iha Belem. Hosi 24/12 to'o ohin dadeer ha'u kontinua simu/haruka sms hosi/ba maluk sira--dejeja kmanek no ksolok Natal no Tinan Foun nian. ...]

***

*) Loos duni, ksolok dame sei mosu, kmanek domin sei buras tanba ita tuba iha rai lulik ida deit. Maibe, dame sei la mosu, domin sei la buras iha rai laran tomak, karik ita ida-idak la buka atu kuda uluk buat rua ne'e iha ita-nia fuan ho neon.

AFORISMA DIARIA [24-12-2007]

[[ TT Akait. Foin almosu hotu ho kolega Amerikana, Cindy iha restorante Riung Kuring, Mandarin. Han sasate manu no modo kankung.

Semana rua liutiha maka ha'u foin mai fali atualiza blog ne'e tanba durante ne'e ha'u okupadu ho servisu no mos moras,nst.

Hahu 11 Dezembru, hamutuk ho kolega sira iha Seksaun Tradusaun okupadu prepara an hodi simu ami-nia Xefe Boot sira hosi NY. Ami fahe servisu hanesan ekipa. Ha'u hetan servisu menus, la hanesan uluk ona. Iha parte ida, ha'u-nia kondisaun mental fraku oituan durante vizita ne'e. Iha 13-12 ha'u ho kolega Michael ba akompana delegasaun ida, hala'o vizita ba iha Distritu Bobonaro. Iha 14-12 ami maka okupadu loron tomak hodi simu SJ NU, ne'ebe foin ba dahuluk vizita TL hafoin tiha simu kargu foun hanesan ulun boot NU nian.

Ha'u-nia saude fiziku komesa fraku iha 13 no 14- 12, no to'o ikus durante fim da semana, 15 to'o 16-12 ha'u iha uma deit, deskansa. Kustipadu no mear ataka.
Apai mos moras, sofre kabun moras, no infesaun iha nia kakorok. Ami lori nia ba konsulta iha Dra Virna iha Sabadu, 15-12. Ha'u-nia oan nia isin tuun ikus ne'e, tanba nia laiha vontade atu han.

Iha 17 no 18-12, ha'u husu lisensa loron rua hodi deskansa iha uma. Hasai raan iha 17-12, no iha 18-12 ha'u ba foti rezultadu raan, nia rezultadu normal hela. Iha 19-12 ha'u hodi biit servisu, no iha loron sorin baluk deit, ha'u fila ba uma hodi deskansa.

Iha 20-12 ha'u deskansa deit kuaze iha uma. Feriadu, loron Idul Adha. Lorokraik maka ha'u ba hasoru kolega poeta sira hodi prepara ba konsertu dame, ne'ebe sei hala'o iha 22-12.

Udan fase ha'u to'o bokon didiak iha 21-12, bainhira ha'u fila hosi Estadiu Munisipal, hafoin tiha ba cek fatin no tempu atu konsertu iha loron tuirmai.

Konsertu Dame

Hamutuk ho kolega poeta sira, ha'u atua poezia "Manu Dame nian" iha Estadiu Munisipal iha 22-12.

Festa Natal
Ha'u responsabiliza hodi organiza labarik sira iha grupu Criancas Unidas ba kanta iha Festa Natal ha'u-nia servisu fatin nian iha Sabadu, 22-12.

Ha'u mos atua iha festa ne'e; lee poezia no baku tambor ho ritmu tebedai nian hanesan "atuasaun surpreza" ida.

**

Horiseik Domingu, 23-12 ha'u, Apai no Amor ba vizita Mimi nia oan ne'ebe foin moris iha loron rua antes. Depois tiha ami ba vizita Zinha sira iha uma Comoro. Rai manas....]]

Tempu Natal besik tama ona. Sinti ba hanesan bain leet. Hein katak espiritu dame Natal nian domina maka'as liutan iha ha'u-nia fuan ho neon. Hodi nune'e, ha'u sei bele hadae't espiritu ne'e ba maluk sira seluk...

***

*) Laiha buat foun iha mundu ne'e. Buat sira maka ita, maioria, enfrenta iha ita-nia moris ne'e apenas resiklazen deit. Keta hakfodak ho fenomena ne'e!

*) Se karik o rasik maka laiha ona hanoin atu estima o-nia an, entaun keta hein fali ema seluk maka atu halo buat ne'e. Atu aat ka diak, ita tenke simu ita-nia an "apa adanya".

AFORISMA DIARIA [10-12-2007]

[TT Akait. Foin han hotu iha Tropical Bakery; modo na'an manu no baiaun. Gostu. Hemu xa zeladu.. Foin hasoru Amor maka iha servisu namanas iha balkaun BNU Akait. Foti osan balu tan, atu hodi gasta ba despeza adisional.

Ohin Papa nia loron mate: tinan haat loloos Papa la'o hela ona ami hotu. Micha maka atu ba Manatuto oras-oras tan, tau aifunan ho labarik sira balu.. Iha Sesta-Feira liuba, bainhira Micha kontaktu ha'u iha ha'a-nia eskritoriu servisu fatin, iha lorokraik atu ko'alia kona-ba selebrasaun Papa nia loron mate, ha'u, tanba deit okupadu servisu, haluha lakon loos ba buat ne'e. Ami 'sharing' oituan kona-ba Papa nia moris. To'o oras ne'e Micha sente katak Papa sei moris iha fatin ruma, no nia hakarak tebes vizita nia. Ha'u laran dodok, dada lia ho Micha, hanoin fali Papa...

Horiseik lorokraik ho Apai no Amor ami ba Bekusi, lori 'minuman: serveja no kokakola' atu lori ba Manatuto, selebra Papa nia loron. Hasoru Ama, Tiu Padre, Ama Eve, Manun Andre, nsst iha ne'eba.
Avo maka mamar liu ona oras-oras ha'u rona halerik..Durante ne'e labarik seluk ne'ebe la'os beioan rasik maka kole loos ba Avo. Sira-nia favor ne'ebe halo ba ami, la'os buat ida maka halimar. Hodi sa maka ami sei selu fali sira-nia favor?....

Sabadu liuba, ha'u ba UNTL atu fo avizu ba estudante sira ne'ebe ha'u hanorin Ingles katak ha'u labele hanorin sira tanba ha'u sei okupadu ho servisu iha eskritoriu, maibe laiha ema ida mak mosu. Sala laran mamuk loos. Karteira sira maka rungu-ranga. Ha'u komesa hanoin tanba sa maka nune'e? Afinal sira la tama tanba iha Sesta, 7-12 loron feriadu nasional--loron invazaun......Sira kala aproveita oportunidade hodi goza sira-nia ferias to'o Sabadu. Figuraun! ]

Ohin loron direitus umanus internasional nian, ne'ebe selebra iha mundu tomak.
Ko'alia kona-ba direitus umanus, Timoroan sira familiariza tiha ona ho asuntu ne'e iha tinan barak nia laran, durante kolonialismu Portuges no okupasaun Indonezia. Timoroan sira-nia direitu ema viola maka'as iha momentu ne'eba.
Iha Sabadu lorokraik liuba, ha'u okupadu halo tradusaun diskursu ha'u-nia Xefe Boot nian ba loron boot ida ne'e, hosi lia-Ingles ba lia-Tetun. ...]

*) Rai Timor/Rai Lafaek/ Rai Lulik//Se o-nia tilun ba nia halerik/Loke o-nia matan ba nia hamnasa........../No o sei la monu, o sei la sidi/ sama o-nia ain iha nia foho lolon sira//

AFORISMA DIARIA [6-12-2007]

[ TT Akait oras ne'e. Foin ba almosu iha Star Food hamutuk ho kolega interpretu rua: Michael no Marco.

Konferensia imprensa semanal ha'u-nia eskritoriu nian ohin tuku 11 la'o ho diak, sein prezensa ha'u-nia Xefe boot nian. Ha'u maka sai durubasa.

Apai oras ne'e boot dadaun ona. Hakat dala ida-rua. Nia dolar la hatene. Furak haree nia moris buras. Ha'u sei bele akompana nia to'o nia boot sai mane klosan ida iha tempu ikusmai?

Novidade triste! Deli kiik hetan dezastre iha Segunda Feira. Monu hosi kareta leten, Tiu Padre hatete. Nia ulun maka agrava oituan. Baixa ospital, no alta tiha ona iha kedas Tersa Feira ne'e. Ha'u seidauk iha biban ba haree nia. ...]

*) Atu kore kabas ne'ebe falun an runguranga presiza pasiensia no ulun malirin. Ne'e hanesan mos bainhira ita enfrenta problema moris nian ne'ebe komplikadu no delikadu.

*) Moris nia realidade nakonu ho buat midar no sin. Keta buka hakarak deit koko nia midar.

*) Prokastinasaun hamate progresu. Dala barak ita buka hala'o buat ida ho motivasaun boot bainhira iha ultima ora ona.

AFORISMA DIARIA [5-12-2007]

[Iha internet cafe naran Domin Matebian. Foin ba dahuluk maka ha'u mai iha ne'e. Almosu ohin iha Alpha-Omega. Hasoru Alai, maka servisu iha ne'eba. Han lalais deit. Depois Zinha mos ba almosu.

Kansasu mental no fiziku nia talin sei kontinua bobar metin ha'u. Sinti ba laiha vontade atu hala'o buat hotu. Bainhira loos maka ha'u bele kore an hosi buat ne'e. Ha'u tenke 'tahan bantingan', loos ka la'e? Ne'e hanesan kruz todan ida ne'ebe ha'u tula iha ha'u-nia kabas iha moris loron-loron..

Horiseik no horibairuak ha'u ho kolega interpretu sira okupadu loos hala'io servisu interpretasaun ba enkontru ASEAN nian.
Ikus-ikus ne'e ha'u sinti ha'u-nia 'skill' interpretasaun nian la la'o ba oin, maibe dulas deit iha fatin....]

*) Buat hotu iha moris ne'e regula tuir lei maka iha. Se deit maka viola buat ne'e, nia sei, sedu ka tarde, ba hatan nia konsekuensia.

AFORISMA DIARIA [27-11-2007]

[TT Akait oras ne'e. Foin mai hosi HT. Misaun KS NU nian ida oras ne'e vizita TL. Ekipa ne'e foin to'o ohin loromanas. Ha'u ho kolega sira hosi unidade tradusaun/interpretasaun nian sei okupadu loos iha semana ida ne'e nia laran.
Ha'u-nia saude fiziku no mental ladun diak iha fulan ida ne'e nia laran. Moras estomagu oras ne'e 'ataka' fali ona ha'u. Tinan-tinan ha'u hetan ataka ida ne'e, desde tinan 2005. Ha'u oin halai, atu muta hela deit. Buka hakarak toba maka barak... Tanba ida ne'e, ha'u-nia vontade atu hala'o servisu no buat seluk-seluk tan mos ladun iha. Ha'u tenta hasoru kondisaun ida ne'e ho kbiit tomak maka ha'u iha....]

*) Dalan moris ne'e nakonu ho "tun" ho "sa'e". Zig-zag mos barak. Presiza iha estamina forte hodi enfrenta realidade ida ne'e. (Ha'u hanoin fali ha'u-nia kolega Xina ida naran Herry ne'ebe dehan iha tinan 1990 katak, "hidup itu kejam").

AFORISMA DIARIA [21-11-2007]

[TT Akait. Semana rua loron rua ona maka ha'u la mai fali atualiza ha'u-nia blog ne'e. Ne'e tanba okupadu demais ho servisu, no preokupa loos ho dimensaun vida nian sira seluk....Ha'u, to'o ikus, lakon vontate atu hakerek..]

*) Saude ne'e nu'udar osan mean--tantu saude mental no fiziku; ita presiza kuidadu ho didiak. Karik la'e, ita maka sei sai leki, no to'o ikus ita basa reen toos mos, buat hotu liutiha ona.

*) Oinsa loos maka ita bele iha susesu hala'o buat boot, se karik buat kiik oan ida mos ita la konsege hala'o ho didiak?

*) Diplomasia tulun tebes ita iha ita-nia komunikasaun ho parte sira seluk iha moris ne'e. Dala ruma ita interpreta sala katak diplomasia ne'e hanesan loos ita ba "horon tuir ema-nia kidun" deit.

AFORISMA DIARIA [5-11-2007]

(TT Akait fali ona. Atualiza blog ne'e.. Almosu iha Restorante Erli.
Ha'u-nia vontade ladun iha.
Hahu fali servisu iha 1-11. Buat barak maka tenke traduz.

(Iha Apai nia aniversariu-halo tinan 1 , ne'ebe monu iha iha 31-10, laiha buat espesial ida hala'o ba nia. Lokraik ko'a dose keek iha Uma Fatuhada, no kalan ami nain tolu:ha'u, Amor ho Apai ba Mae iha Bekusi, hola bensaun no lori dose ba. Apai simu selendang oan ida hosi Mae.)

(Iha loron matebian, 2-11, ha'u, Apai no Amor ba tau aifunan iha rate Avo Luarentina iha dadeer tuku 9. Ema nakonu. Rai manas....)

(Iha Sabadu, 3-11 maka ami rame-rame ba tasi--Arreia Branca, selebra Apai nia tinan. Labarik sira hariis tasi, to'o baruk didiak. Ami toka muzika, nst..)

*) Ha'u bele subar segredu ba ema lubuk. Maibe, susar ba ha'u atu subar segredu ba Nai Maromak no ba ha'u-nia an rasik.

AFORISMA DIARIA [30-10-2007]

[TT Akait oras ne.e Ohin iha 12:30 almosu ho kolega Amerikana, Cindy iha Riung Kuring, Mandarin. Ami dada lia barak kona-ba kna'ar literatura iha dezenvolvimentu umanu, nst ...]

*) Buka hakerek buat ne'ebe o hatene, no buat kiik oan sira iha moris, ne'ebe dala barak ema ladun fo importansia.

AFORISMA DIARIA [29-10-2007]

[TT Akait fali ona. Lori ho laptop hodi atualiza blog ne'e hanesan iha 25-10 liuba.
Rai manas loos. Kompara ho Dili, Manatuto manas liu. Iha Sabadu, 27-10, ha'u lori Apai ho Amor ba vizita rate Papa nian. Apai foin maka vizita rate Papa nian no Manatuto desde nia moris besik halo tinan ida ne'e. Abati ho Lazata ba hotu, no mos Esnesto ho Ricky. Ba Manatuto, Ernesto maka lori kareta metan, no mai fali ha'u maka lori.. Vizita ida ne'e nu'udar vizita ida ne'ebe nakonu ho emosaun. Ha'u tanis maka'as iha Papa nia rate, no iha ninia kohe nia oin iha Uma Aiteas....]

*) Malus maran/Kohe matebian/Ahi oan lilin/Sunu halo lakan/Keta koko atu hamate/Keta koko atu fila kotuk/Ne'e ita-nia hun/Ne'e ita-nia abut//

*) Ita-nia istoria umanidade nakonu ho pintura furak no risku sira ne'ebe buradu. Istoria, la seluk la leet, sai nu'udar lalenok boot ba ita atu leno ita-nia an; atu hatene ho klean se loos maka ita.

*) Keta dudu ha'u ba didin lolon ho o-nia diman no surik. Ha'u la hanoin barak: ha'u sei buka defende ha'u-nia an, entre mate no moris. Hafoin tiha ha'u reaze maka'as ba o, o dehan fali ha'u malkriadu? Bullshit!

AFORISMA DIARIA [25-10-2007]

[TT Akait oras ne'e. Semana rua nia laran, ha'u la atualiza blog. Ha'u preokupa ho moris nia segmentu seluk. Sei ferias. Ha'u halo tempu barak liu iha uma; sulan deit; lee libru, haree televizaun, halot uma laran, haree Apai, no deskansa-toba maka barak,nst.. Sulan demais, no preokupa ho aitarak moris nian balu ne'ebe ezije atensaun tomak, halo ha'u kuaze lakon vontade atu hala'o ha'u-nia moris. ...Alias stress...]

*) Nai, atan ha'u foer/atan ha'u dois, dois la halimar, tanba ha'u monu ba sala dala fila-fila/Iha Ita Boot-nia ain hun, ha'u folin laek ona/Sunu ha'u halo mutuk didiak ba/ ho Ita Boot-nia ahi Santu nia nanal dikin/No husik atan ha'u sai ahukdesan/ no nune'e tiha Ita Boot sama ha'u ho Ita Boot-nia ain tanen//

*) Mestre nia lian sempre bolu ita/ iha dezertu fuan laran nian/Mai ita rona/Mai ita traduz lian ne'e ba iha lian asaun nian//

*) Tasi mosu bebeik/Ita deit maka mai iha tasi ibun ida ne'e, troka malu/Fihir an iha rai henek leten//

*) Dili tau matan, Dili se tilun, Dili tau neon ba ita. Ita deit maka dala barak halo finji, tilun diuk, no matan delek....

AFORISMA DIARIA [11-10-2007]

[TT Akait oras ne'e. Loron sanulu resin maka ha'u la atualiza blog ha'u-nia sira ne'e. Ha'u-nia planu atu atualiza momentu ha'u iha Kuta, apenas esperansa deit. La konsege realiza. Ha'u-nia tempu momentu iha Kuta, ha'u buka atu fo tomak ba Amor ho Apai. Ne'e duni ha'u kuaze laiha espasu ba ha'u-nia an--atu hakerek, no ba internet. Buat barak maka tuir loloos ha'u atu hakerek..
Loron haat ona maka ha'u sama fali rai TL depois de semana rua resin ha'u ba 'hola anin' iha illa "Dewata" alias Bali.
Kondisaun tempu maka manas la halimar iha loron rua ka tolu liuba halo ita kuaze atu la tahan.
Tuir loloos mos ha'u atu hakerek buat barak durante loron hirak fila mai TL ne'e. Ha'u seidauk iha tempu. Ne'e razaun klasiku ida, konserteza.Haree deit..
Ohin Papa nia loron hakoi-halo tinan 3 fulan 10. La hanesan babain, ha'u , ba loron Papa nia mate ne'e , la tenta haruka mensajen ba alin no bin sira. Ha'u desidi haruka deit mensajen ne'e ba ha'u-nia an rasik:

//IN MEMORIAM PAPA SEBASTIAO/ita ida-idak/hakat ba rate/hamulak/harohan/sunu lilin/Papa la taka matan/Papa la taka tilun//
(11-10-2007/08:36 AM)

***

*) Mestre loloos nian ida tenke hatene katak nia tenke halakon nia an, no hakiduk ba kotuk hosi palku leten iha loron ida. Hodi nune'e, nia sei husik eskolante sira hatutan no haklaken liutan ba ema seluk saida maka nia hanorin tiha ona ba sira. Nia naran ema sei temi. Nia ain leut ema sei la'o tuir.

AFORISMA DIARIA [30-9-2007]

[Iha Internet Darma Suci, Ubud oras ne'e. Loron haat ona maka ha'u la atualiza blog sira ne'e tanba intensidade programa festival nian. Ha'u to'o ikus abandona oituan... Ha'u hein katak bainhira ha'u fila fali ba Kuta ona, entaun ha'u sei tenta atu hakerek buat barak oituan kona-ba Festival Ubud....]

*) Ain leut pasadu nian ita la'o tuir. Ain leut ohin nian ita husik hela.

*) Lia fuan sira iha liras/Lia fuan sira semo/Hale'u mundu rai klaran/Lia fuan sira lakohi ema futu/Lia fuan sira lakohi ema sulan.//

*) Mestre, Ita Boot maka mata-dalan, ka'er ahi oan lilin, leno dalan nakukun. Keta husik hela ha'u!

*) Komunikasaun entre nasaun ezije atitude igualdade. Ita tuur iha meza, diskuti kona-ba buat barak, kona-ba nasaun nia destinu. Husu boot deit maka katak ita labele sai hanesan "katak di bawah tempurung".

*) Hala'o moris laho reflesaun hanesan loloos mos kalan nakukun maka laiha fulan no fitun.

AFORISMA DIARIA [26-9-2007]

[Iha Internet Cafe Roda Mas. Buat barak maka ha'u hakarak hakerek--rekapitulasaun akontensimentu horiseik nian, nst ohin dadeer iha otel ne'ebe ha'u hela ba ho laptop, maibe tanba virus, nee duni ha'u la konsege. Figuraun! Tanba tempu, la biban, nee duni ha'u iha internet kafe ida nee mos ha'u desidi atu la hakerek. Ha'u tenke fila fali ba otel atu 'check out' iha tuku 12:00....]

*) Ita la'o iha nakukun tinan bai loro. Ezame konsiensia tenke hala'o loron-loron. Hodi nune'e ita hetan roman nabilan.

*) Ita kala sai hosi kaut ida. Kaut ne'ebe katuas ho ferik homan hela. Loron ruma ita sei buka malu--dada lia, haktuir lia naksalak, haktuir lia kmanek, nst.

*) Nai, tanba sa maka ha'u Ita boot hili sai lia nain ida hodi kaer ahi oan lilin-- leno dalan nakukun?

*) Ha'u la'os anju. Ha'u foer. Ha'u dois. Ha'u iis. Ha'u la'os "manusia 1/2 dewa". Ha'u monu, no monu fali. Taka rabat. Dala fila-fila. Maluk, o sei iha kbiit, no neon kmanek tane fali ha'u maka monu? Nai, iha Ita Boot nia ain hun, atan ha'u hakruuk. Nai, ha'u husu perdaun. Ha'u husu matak-malirin.

*) Ha'u maka ne'e: mosu hanesan babain, ho ha'u-nia isin no klamar tomak--ne'ebe nakonu ho istoria mutin ho metan. Husu boot o simu ha'u, karik o hadomi duni ha'u ho o-nia laran tomak.

*) Ita-nia saudades ba abut, ba ita-nia hun, halo ita la baruk atu haburas ita-nia dikin no sanak.

*) Diak liu lalika tan sunu ahi. Lalika tan rega tan gazolina hodi hatudu katak ita '"jagoan". Hamate ahi ho bee la'os katak ita fraku, la'os katak ita lakon.

AFORISMA DIARIA [24-9-2007] -2

[Ubud, Bali...Oras ne'e iha Kafe Internet ida. Naran Roda Intert Cafe. Lori ha'u-nia laptop, uza avontade. Foin ba iha Salon ida naran Tri Nadi. Tesi fuuk. Tesi halo badak kedas. Uza makina. Panleiru ida maka tesi. Ha'u gosta fuuk badak. Naruk somente halo nakrakat deit. Haree ba la jeitu..Molok ba Salon Tri Nadi, ha'u ba han kalan iha CAFE DES ARTISTES UBUD. Han sasate manu, hemu serveja bintang kiik ida. Sobre meza: aifuan oinoin..Ha'u kabun hamlaha loos. Ohin iha aviaun hosi Dili mai, ha'u han deit maka espageti. La bosu ida. Serveja mos aeromosa lori mai maibe ha'u han hotu tiha tan ona.

Bainhira han kalan ohin, ha'u hanoin fali Apai maka oras ne'e boot dadaun ona. Nia, husu boot, sei la'o tuir ha'u-nia dalan, no ei buka atu husik hela nia ain leut rasik iha nia viajen moris. Ha'u hanoin fali ohin kalan konserteza nia sei buka ha'u. No nia sei konserteza buka mos ha'u aban loron. Ha'u sei hasoru fali nia ho nia inan iha 1 Outubru bainhira Festival Eskritor Ubud nian hotu, no ha'u fila fali ba Kuta.

Oras ne'e ha'u aluga bungalow ida naran Hibiscus 2. Ha'u-nia kuartu iha andar leten. Iha natar laran. Hare tahan matak. Buras. Bee suli. Halo ha'u hanoin fali tempu sei kiik, halai natar ho Papa.. Hein manu iha dadeer.

Viajen ohin hosi Dili mai Denpasar, ha'u toba maka barak tanba kole. Furak atu lee artigu ida ne'ebe Loro Horta kona-ba relasaun Xina ho TL ne'ebe
mosu iha Jakarta Post, edisaun ohin nian. Xina buka prontu hato'o nia ajuda bainhira TL iha momentu ida ne'ebe presiza tebes atu hetan tulun.

Bainhira iha formatura atu ba iha imigarasaun aeroportu Ngurah Rai nian, ha'u hasoru Priscilia, katuas X nia sobrina. Ami dada lia lubuk oan ida. Balu kona-ba nia Mama maka halo parte iha sirkulu literariu ne'ebe ha'u harii.

Ha'u-nia partisipasaun iha Festival Ubud ba dahaat hanesan eskritor Timorense ne'e husu boot sei lori oportunidade diak ida mai ha'u atu hetan buat barak kona-ba mundu literariu. Ha'u konserteza sei hasoru eskritor/a barak-barak hosi rai oinoin. Iha tinan rua liuba, Maun X ho nia kabeen maka mai partisipa. Tuir loloos ha'u mai partisipa Festival ne'e iha tinan liuba maibe la jadi tanba krize politika-militar iha TL. Ha'u mai duni Ubud iha fulan Jullu tinan liuba hodi entrega ha'u-nia manuskritu hanesan dalan ida atu patisipa iha festival tinan ida ne'e nian......]

*) Servisu kreativu hanesan literatura ne'e, ezije totalidade kometimentu hosi ita-nia an rasik. Buat ne'e hanesan mos bainhira ita hala'o tipu servisu seluk iha ita-nia moris. (Dada lia ho Priscilia ohin iha aeroportu, bainhira komentariu kona-ba nia Mama maka dala ruma baruk atu involve an iha tempu kreativu..)

*) Atu sai mediador ida n'ebe diak, la'os buat ida maka fasil. Tanba deit ita tenta atu hakoak ema hotu, ita dala ruma ema sempre dehan katak ita buka haliis tun, haliis sae.

AFORISMA DIARIA [24-9-2007]

[Oras ne'e iha TT Akait. Foin mai hosi XRR. Ba lalais iha ne'eba hosi eskritoriu atu entrgea manuskritu konkonrsu hakerek nian ba Atoi. Mankodo oituan bainhira horiseik dadeer, horikalan no ohin dadeer madrugrada ha'u kuriji manuskritu sira ne'e (hamutuk 29: ba idade 13-19: manuskritu 12, no ba idade 20-30, manuskritu: 17).

Programa RTTL, Anin Naniri edisaun horikalan nian la jadi realiza tanba maluk sira iha tiha ona gravasaun. Ha'u prepara saugati deit horiseik lorokraik.

Horiseik lorokraik ba vizita Mae hamutuk ho Apai. Fo tais feto no kalabaka ida ba Mae hanesan prezente ba Mae nia aniversariu foin lalais. Micha hadau liutiha kalabaka ne'e.

Oras-oras tan ha'u aranka ba Bali atu tuir Festival Eskritor Ubud nian. Sei pasa ferias iha ne'eba semana ida rua hanesan ne'e. ...]

*) Dala ruma ita labele fo deit buat midar ba labarik sira. Presiza mos fo buat moruk. Hodi nune'e sira komesa sinti, desde sei nurak, katak moris ne'e la'os midar deit maibe moruk mos.

AFORISMA DIARIA [22-9-2007]

[Oras ne'e iha fali ona TT Akait.

Hosi tuku 8:30 dadeer ohin ha'u ba Otel Timor. Ohin iha workshop ida kona-ba "Halo Orsamentu Jeneru". Ha'u-nia Xefe numeru 2, Finn ko'alia. Programa ne'e sei remata tuku 5 orsida.
Amor, Apai no Sulasih maka tula ha'u ohin mai Otel Timor. Molok ida ne'e ,ami ba uluk eskritoriu OB tanba ha'u ba foti dukumentu balu ne'ebe iha relasaun ho
Ami deskansa oituan durante oras rua nia laran oras ne'e. Tanba ida ne'e ha'u aproveita tempu maka iha hodi mai atualiza blog sira. Tuku 4 ha'u hahu fali ha'u-nia servisu ho maluk sira seluk hanesan durubasa ba-Tetun/Ingles no Portuges/Ingles.

Tanba deit servisu ohin loron tomak ha'u-nia planu atu ba Manatuto kansela. Figuraun! Ha'u kansela bebeik planu atu ba Manatuto tanba servisu maka la fo fatin.

Mehi hasoru Papa

Ha'u hetan Papa iha fatin ida. Isin diak. Nia hatete katak nia hakarak fali sai padre, tuir dalan Maromak nian.. Ha'u doko ulun deit iha laran. Tanba sa maka Papa hakarak sai fali Padre?

--
Horikalan hamutuk ho maluk:Atoi hosi XRR no mos Cris hosi grupu SIN ami organiza "Kalan Domin no Dame" iha XRR hodi komemora loron Internasional Dame Mundu nian. Tuir lolos ami hahu tuku 7 kalan, maibe maluk sira mai tarde, ami komesa iha tuku 7:45. Programa la'o diak..
Tema ba programa ne'e maka: "Dame iha fuan, Dame iha neon, Dame iha rai laran, Dame iha mundu".

Hosi dadeer horiseik tuku 8:30 to'o tuku 13:00, ha'u partisipa iha selebrasaun Loron Mundial Dame nian iha UNTL, Caicoli hanesan durubasa ba iha diskusaun meza kabuar kona-ba Dame iha TL, no hanesan moderador ba iha programa Konkursu Diskursu Publiku.......]

*) Ajensia seguransa no defeza iha rai ida nian hanesan TL ne'e hanesan loloos mos lutu ba kintal boot ida. Karik lutu ne'e aat, no naksobu, entaun fahi fuik sira mai han mohu, no estraga aihan moris sira hanesan aifarina, fehuk, kotnas, talas, nst. To'o ikus, se loos maka leki? La'os ita hotu?

*) Molok atu hakat ba mundu seluk, se la sala, Apa Katuas hameno tiha ona ita atu labele baruk foti katana ne'ebe nia sikat iha didin lolon dapur nian hodi kadi halo kroat. Hodi nune'e katana ne'e ita bele uza hodi ta ai, hamoos du'ut, ta na'an ruin, no halo buat seluk-seluk tan. Keta mehi atu lakon osan tan hodi ba sosa katana foun iha loja sira hanesan Leader, Lita Store, Land Mark, nst. Diak liu osan maka o mehi atu sosa katana foun ne'e, o uza fali atu gasta ba nesesidade seluk..

*) Ditadu Portuges hatete, "O saber nao ocupa lugar". Buat ne'e han malu loos ho saida maka ema matenek balu hatete, "hetok ha'u hatene, hetok ha'u sinti ha'u seidauk hatene buat ida".

*) Sagrada Eskritura sira relijiaun boot sira nian iha mundu rai klaran (hosi Hinduisme, Budisme, Muslim, Kristianismu, Taoisme nian, nst) sai nu'udar bee matan sira ne'ebe la maran. Nafurin, suli nafatin loron-kalan. Ita sira ne'ebe klasifika an hanesan ema "la'o rai, musafir, wanderer, sole salan" ida, konserteza hamrok, no ita presiza duni atu hemu no horut bebeik bee ne'e no habokon ita-nia kakorok. Atu nune'e ita bele hetan netik matak-malirin. No to'o ikus, ha'u fiar katak ita sei iha kbiit fali atu kontinua hala'o ita-nia viajen naruk ne'ebe ha'u la hatene loos bainhira maka atu remata ne'e.

AFORISMA DIARIA [20-9-2007]

[Foin maka almosu iha Terrace Cafe, besik PN. Durante almosu, ha'u dada lia ho Nelson, Alfredo no Lina. Kona-ba situasun atual. Depois almosu hotu, ha'u ba dada lia ho Lito, ho maluk sira seluk. Nafatin mos kona-ba situasaun atual iha rai laran.

Horikalan ahi mate iha tuku 9:50. To'o kedas loron. Ami nain tolu:Apai, ha'u no Amor toba deit iha sala. Susuk barak.. Toba ladun diak..

Ernesto, Alai nia katuas oan maka ba tula ha'u mai servisu, hanesan horibairuak.

Tuku 9:30 to'o tuku 10:30, iha konferensia imprensa iha salaun konferensia A, UNMIT nian. Hanesan babain, ha'u sai durubasa ba ha'u-nia Xefe, enkaregadu RESJ. Ko'alia kona-ba situasaun seguransa....]

*) Ita presiza hola distansia--semo aas hanesan makikit, hodi nune'e ita-nia matan bele kroat atu observa realidade, ho espiritu ida ne'ebe abranjente liutan. Ita, to'o ikus, atu halo nusa mos, tenke semo tuun fali ba rai fehan, hodi sinti rai nia maran no maran, no konserteza buka tuku rai kutun ruma.

*) Hare hanorin buat barak mai ita tiha ona. Tantu mais fulin, tantu mais hakruuk. Matenek foti an, folin laek. Matenek haraik an, ne'e maka tuir loloos ita buka atu halo tuir.

*) Favor, maluk sira, ita lalika tan halo beik malu ho slogan nasionalismu oinoin, ne'ebe somente deit hamosu manipulasaun. Se ida ne'e maka akontese duni, entaun la'os ona "gerakan pembebasan" maka ita halo, maibe " gerakan pembodohan".

AFORISMA DIARIA [19-9-2007]

[Oras ne'e iha fali ona TT Akait. Foin almosu hotu iha restorante Erli.
Ha'u-nia planu atu almosu ho belun Portugeza, Mara la jadi tanba nia ba tiha aeroportu. Ha'u ba almosu, hasoru Ambasa, nia kabeen Filipa, Aurelio, Xico Guterres ,Aurelio, Helder no mos kolega Singapura ida naran, Mui Ngah ne'ebe ha'u hasoru horiseik kuandu ha'u ba almosu iha Erli. Aurelio, hanesan, gosta goza ha'u. Ha'u dada lia lubuk ida ho maluk Singapura ne'e kona-ba realidade moris nian. Ha'u hatete ba nia katak filozofia Taoismu maka ajuda tebes ha'u hanesan artista atu observa lalaok moris ita ema nian ho klean.

Mama nia tinan ohin. Nia halo 66. Mama ferik dadaun ona. Ninia fuuk mutin la saugati. Parabens Mama! I am proud of you!
Horikalan molok fila ba uma, ha'u iha idea atu hakerek ensaiu ida kona-ba Mama iha nia aniversariu, maibe tanba kondisaun fiziku la permiti ne'e duni planu ida ne'e la realiza horikalan no ohin dadeer. Bainhira to'o iha eskritoriu ohin dadeer san, ha'u telefone kedas Mama, hodi fo parabens ba nia. Ha'u deahn katak se biban orsida lorokraik maka ha'u ba tan Mama sira iha Bekusi. Micha mos telefone, uza Mama nia telefone hatete katak nia hakarak organiza almosu ida ba Mama iha Sabadu mai agora. Ha'u dehan ba nia katak ha'u labele partisipa tanba ha'u atu ba Manatuto vizita Papa nia rate.

Tuku 9 to'o 10 ha'u akompana ha'u-nia Xefe numeru 2 hala'o enkontru ho Ministra Solidaridade foun TL nian, Micato. Ko'alia kona-ba problema dezlokadu sira nian. Orsida tuku 4 sei iha programa "Hanoin Lisuk" iha TVTL, ne'ebe ha'u-ni Xefe no Ministra sei ko'alia.

Molok atu mai almosu, ha'u dada lia ho Mae. Mae telefone antes katak ha'u ba almosu iha Bekusi ka lae. Ha'u haktuir ba Mae liafuan oan sira ne'ebe ha'u hakerek iha ensaiu kona-ba Papa foin lalais, liuliu kona-ba parte ida ne'ebe ko'alia kona-ba lideransa iha familia Barreto Soares no Mama tanis iha rate. Ha'u la kaleur laran dodok, tanis... Hanoin fali Papa nia feton no maun alin sira halo nia tanis. Oras ne'e ha'u la'o hela iha Papa nia ain leut. ....]

*) Bainhira ha'u-nia midar laiha ona hanesan uluk, entaun laiha dalan seluk, anaun ser ha'u tenke hakiduk ba kotuk. Bainhira ha'u hakiduk, hosi dok ha'u hateke o-nia lalaok tomak. Ha'u sei hamoris fali ha'u-nia kbbit nia dubun iha esperansa, hodi nune'e ha'u kontinua fali ha'u-nia viajen naruk. Hanesan mos haas supadeira, bainhira ema supa tiha hotu nia midar, konserteza ema sei soe haas nia papun ne'e. No haas papun ne'e sei deut malu ho rai durante tempu naruk. Rai, anin no loromatan nia nabilan sei fo kbiit liutan ba haas papun ne'e. Udan been mos sei turu, habokon haas papun nia lolon. Nia dubun sei mosu. Nia dubun sei matak. Nia dikin sei lolo. Haas kiik oan ida, la kaleur, sei moris, haburas rai tetuk...

*) Hanesan lia nain, ha'u tenke prontu iha kualker oras deit atu involve iha 'funu espritual'. Ha'u-nia surik maka ha'u-nia lia fuan sira. Husu boot lia fuan sira sei soran ema nia fuan ho neon, no sei to'o ikus haberan ema nia an ho kbiit domin.

***

AFORISMA DIARIA [ 18-9-2007]

[Mai lalais iha Akait, atu hasoru Amor hodi entrega USB ne'ebe kontein dokumentu bisnis nian. Depois mai liu kedas iha TT hodi 'update' blog ne'e. Hasoru Johny, fotografu TP nian ne'ebe mos mai 'internet'. Dada lia lais oituan. Hasoru mos kolega Batak, Binsar, fotografu AFP..

Servisu iha eskritoriu sei barak. Ne'e duni maka ohin dadeer tuku 10 ha'u la ba tuir enkontru Sections Chief nian iha CAS.

Furak loos horiseik ha'u simu kopia Antologia "Terra" lubuk ida iha eskritoriu. Antologia ne'e kona-ba obra literariu Timoroan sira nian balu, inklui ha'u nian mos, no mos maluk eskritor/a Indonezia no Australia nian, ne'ebe mosu iha edisaun bilingual-lian Ingles ho Indonezia. Oras-oras tan ha'u sei hasoru Zesopol Caminha, maluk poeta Timoroan ida fali ne'ebe nia obra mos mosu iha antologia ne'e iha restorante Erli hodi entrega ninian kopia ida...]

*) Husik ba labarik oan sira hili sira-nia dalan atu la'o ba ne'ebe deit iha sira-nia moris.Sira tenke iha liberdade atu hala'o buat ida ne'e.//

*) Ita lalika kria konfuzaun tun, konfuzaun sa'e. Ita dehan katak ita subar an hodi nune'e ema labele haree hetan ita, afinal ita subar deit ita-nia ulun, maibe ita-nia kidun sai hela..

*) Jesus:Rebelde! Jesus, Poeta! Jesus, Artista! Jesus, Revolusionariu! Ha'u hakarak tebes tuir Nia ain leut..

AFORISMA DIARIA [17-9-2007]

[Foin maka almosu hotu iha Akait Bistro. Rai manas. Hasoru Quim ain at iha ne'eba. Nia han hotu ona. Nia krava ha'u osan, maibe ha'u la fo. Ha'u hato'o parabens ba Sr. J.G., ne'ebe halo parte Governu AMP. Furak atu hatene katak programa Governu ne'ebe debate iha PN iha semana liuba hetan aprovasaun ho 41 votu afavor, 23 votu kontra, no votu abstein 0. Ne'e katak, governu foun ne'e bele hakat dadaun tan ona hodi implementa nia programa..Amor ohin mai servisu, haluha lori nia HP. Ha'u maka aluga Zinha sira-nia taksi hanesan babain, lori HP ba ha'u-nia servisu fatin, depois ha'u lori mai entrega ba Amor nia kolega, Henrique bainhira Amor fila ba uma haree Apai..
Servisu tradusaun bou aas. Ha'u sei buka esforsu halo hotu balu ohin.. Iha fim da semana liuba, tenta atu servisu iha uma--halo tradusaun maibe ha'u la konsege halo.....Kondisaun mental no fiziku maka la permiti.....]

*) Inan nia kabun laran: fatin lulik, fatin murak. Iha nia laran, ita hoban an, ita hetan matak malirin. Iha nia laran, ita hahu homan istoria mundu nian.

*) Ita presiza harii alisersa ne'ebe iha kbiit maka'as iha ita-nia moris. Karik la'e, anin hu mai, ita namlele [Hanoin fali Jesus nia lia fuan bainhira nia ko'alia ho Pedro katak Nia sei harii Nia igreja iha fatuk ba'e nia leten).

*) Autobiografia: ha'u-nia segredu moris, ha'u sei la fo sai hotu ba imi. Ha'u bele dehan katak 99 % realidade moris ha'u-nian, imi bele hatene, maibe 1% realidade ne'e ha'u sei falun metin, no ha'u rezerva deit segredu ne'e ba ha'u-nia Maromak no ha'u-nia an rasik.

*) Lalika hakfodak ho kuda ka karau maka fuik. Ita tenke iha pasiensia atu tau masin iha ita-nia liman tanen, hodi fo ba karau ka kuda ne'ebe fuik ne'e atu lambe. Bainhira kuda ka karau ne'e maus tiha ona, entaun fasil tebes ba ita atu tau tali iha karau ka kuda ne'e nia kakorok, no ita dada nia fasil, no nia sei tuir deit ita-nia hakarak. [Konversa ho SES Xiku, ho SED, Julio iha Palasiu Ahukdesan kona-ba problema AR nian].

*) Influensia iha vida literaria ne'e buat ida maka normal. Ha'u labele nega katak ha'u hetan influensia maka'as hosi poeta Libanez, Kahlil Gibran iha ha'u-nia karreira literaria. Importante liuliu maka ita labele sai plagiator "kelas kakap".

*) Ita tenke prontu simu realidade katak ema balu, tan deit sira-nia vizaun kloot no laran la luak, buka atu odiu ita bainhira sira haree ita halo buat diak ba benefisiu ema barak nian.

*) Tempu to'o ona ba TL nia oan sira atu 'bombardeia' idea ba maluk sira iha/hosi rai liur kona-ba lalaok moris nian. Durante ne'e ita Timoroan sira simu barak resin ona idea sira hosi rai liur. Hodi nune'e sei iha balansu troka idea iha mundu intelektual. [Idea ne'e ha'u hato'o tiha ona ba maluk Portuges :JP ho Toze, se la sala, iha tinan liuba. Ha'u hanoin fali ha'u-nia mestre/mentor literariu, Fernando Sylvan nia poezia, " Mensajem do Terceiro Mundo".]