AFORISMA DIARIA [13-3-2008]

[ Semana tolu alias hamutuk loron 21 loloos mak ha'u la mai atualiza ha'u-nia blog sira. Ha'u sinti ba ha'u nu'udar ema ida-ne'ebe "ketinggalan kereta" iha aspetu vida literaria iha mundu 'cyberspace'. Ha'u-nia tempu okupadu barak liu ho vida familiar, no servisu, nst, ne'e duni halo ha'u lakon tiha ona oituan animu hodi mai hala'o atualizasaun ba blog sira.

Apai-nia dezenvolvimentu moris hanesan kosok oan ida iha ha'u no Amor nia leet presiza tebes duni ami-nia atensaun boot. Ha'u tenke halo sakrifisiu mak'as ba nia kresimentu fiziku no mental.

Loromanas. Oras ne'e ha'u iha Global Internet Cafe, Caicoli.. Almosa iha Erli.

Ha'u lori mos nota entrevista sira ne'ebe halo ho poeta kontemporaniu Indianu sira, ne'ebe ha'u imprimi hosi internet. Interesante atu observa sira-nia pensamentu poetiku...

Fulan ida, loron rua ona "Segunda Negra" akontese. Ita laran susar, ita laran dodok, ita laran kanek. Timoroan sira, hanesan ema sarani, hakat, lori sira-nia krus todan, sa'e ba Kalvariu nia tutun....]

*) Lia fuan sira iha liras. Lia fuan sira semo, hadulas universu. Lia fuan sira iha kbiit atu hamamar ema-nia laran, no mos iha kbiit atu hakenek ema-nia laran. Ita hotu nia kna'ar maka atu labele naran hasai liafuan sira, no lekar arbiru deit iha ita-nia moris loro-loron.

*) Keta naran ko'alia tun, ko'alia sa'e. Fatuk sira iha tilun, ai sira mos iha tilun. Katuas ho ferik sira sempre buka fo hatene kona-ba buat ne'e mai ita. Maibe, ita mak dalaruma iha tendensia atu halo tilun diuk ba sira-nia liafuan.

*) Ema Ingles sira hatete, "time is money", no ema Indonezia sira tradus buat ne'e sai, "waktu adalah uang". Tempu ne'e osan mean. Ita labele so'e lekar arbiru de'it. Se la'e ema seluk hili tiha, ita maka sei leki leet.

*) Atu halo di'ak buat ruma presiza tempu naruk, maibe atu halo aat ne'e lalais de'it. Ah, moris ita ema nian ne'e nakonu loos ho paradoksu!

*) Karik ita haree ho didiak, afinal ita-nia moris iha mundu ne'e apenas iha de'it trajedia no komedia.

***