AFORISMA DIARIA [3-4-2008]

[Ohin dadeer tuku 7:15 ha'u ba fali tasi ibun Fatuhada nian--atu hala'o reflesaun. Iha Segunda semana kotuk mos ha'u foin ba iha fatin maka hanesan, maibe la konsege halo reflesaun tanba hasoru malu ho maluk Tomas, ha'u-nia vizinu. Ami dada lia oituan kona-ba situasaun rai laran nian, ne'ebe nakonu ho nia 'zig-zag'. Ha'u preokupa, keta halo "istoria bele repete fila fali".

Lalehan iha tempu dadeer ohin malahuk. Tasi la boot. Laloran baku ba ninin. Maibe tasi been ladun moos. Loromatan sa'e kaleur ona, maibe haree la hetan, tanba subar an iha kalohan leet. Hosi dok ha'u hateke Atauro, no estatua Kristu Rei..Panorama dadeer nian ida-ne'ebe fantastiku. Ha'u haluha lori makina fotografia. Ha'u somente lori de'it gravador ki'ikoan marka Sony. Ha'u grava ha'u-nia lian; deskreve panorama dadeer nian, nst...

Depois ha'u ba tuur iha banku, iha tenda oan ida nia laran, besik luron boot, no iha ne'eba maka ha'u tenta hala'o reflesaun............]

***

*) Armonia no kmanek dame nian sei, konserteza, la haklaken sira-nia knananuk murak bainhira ema na'in rua ne'ebe involve iha konflitu ida sei kontinua nafatin ulun toos, no la haraik an ba malu.

*) Inan nia matan been , ne'ebe suli no turu la maran hosi nia hasan, tanba de'it ita oan sira-nia hahalok kleuk, sai nu'udar avizu forte ida katak buat ne'e hanesan tusan boot ida, ne'ebe ita hakarak ka lakohi, ita tenke selu iha loron aban-bainrua.

*) Hanesan ema fiar na'in ida, ha'u hakarak dehan katak ha'u fiar iha liafuan sira- ne'ebe hatete, "Primeiru Maromak, segundu inan-aman". Ha'u somente repete fali de'it saida maka ema balu hatete ona kona-ba buat ida-ne'e. Inan-aman sira ho Maromak maka, ho kbiit tomak, hatuur ita iha mundu rai klaran. Ita sei sidi, ita sei monu bainhira ita fila kotuk, no lakohi atu rona sira-nia lia murak..

***