AFORISMA DIARIA [23-4-2008]

23-4-208 [ Tuku 11:27 kalan..]

[Oras ne’e Apai ho Amor toba ona. Ha’u sei hakarak lees matan atu refleta, avalia atuasaun loron ohin nian..
Ohin lorokraik tuku 4 ha’u haksolok partisipa iha konferénsia kona-ba “Timor-Leste, Que Futuro?” hanesan oradór ida iha UNTL hamutuk ho konferensista sira seluk: Prof. Barbedo Magalhães, Luis “Takas” Cardoso (eskritór Timorense), Pedro Rosa Mendes (jornalista LUSA), no Sr. Domingos Sousa maka modera sesaun ne’e. Ha’u maka halo intervensaun uluk, ko’alia ho lia-portugés ne’ebé ha’u lee hosi ha’u-nia diskursu mak ha’u prepara tiha ona, no hetan tulun hosi belun, Luis Pinto hodi tradús ba lia-portugés. Debate ne’e han kedas oras rua ho balun. Interesante atu rona komentáriu sira durante sesaun ‘husu no hatan’ nian.]

*) Hanesan nasaun, hanesan povu ida-ne’ebé soberanu ita tenke afirma ita-nia identidade própriu. Ita tenke kaer rasik ita-nia kuda talin. Ita labele husik ema seluk hosi rai liur maka mai manda ita hanesan “cavalo mandado.”

*) Poeta nu’udar ema ida-ne’ebé “takes the road less travelled by”. Tanba de’it ida-ne’e, ema dehan nia ‘ema bulak’, no ‘ema estrañu’ (dada lia ho M.Stahl ohin loromanas durante almosu iha Erli)

*) Keta hakfodak atu enfrenta konflitu iha ita-nia moris iha mundu rai klaran. Konflitu ne’e importante atu hodi hetan dinámika progresu nian iha aspetu hotu-hotu. Karik fatuk ahi la kose malu ho besi kusan, oinsá maka ita sei bele hetan ahi? Ita tenke hatene oinsá jere konflitu maka ita enfrenta. Ne’e sai dezafiu boot ida mai ita.

*) Moris nu’udar luta. Buat hotu la’ós tuun de’it hosi lalehan, tau iha bandeza no oferese gratuitamente mai ita.