Sunday, May 4, 2008

AFORISMA DIARIA [4-5-2008]

[tuku 11:00 kalan]
( Sala familia nian iha Uma Fatuhada.. Apai ho Amor toba ona. Foin lalais Apai toba hakfodak, no tanis. Múzika Ebiet G.Ade nian hosi album “Nyanyian Cinta” akompaña ha’u iha momentu ne’e. Ambiente refletivu.

Ha’u, loron tomak, iha uma de’it. Hamutuk ho Amor tau matan lisuk Apai. Nia ho Zita (ami-nia empregada hosi Oecusse) ba deskansa iha loron Domingu hanesan baibain. Apai, kuandu hamutuk ho ha’u ho Amor ona, halo maña resin. Ami tenta halo tuir nia vontade. Dala ruma ha’u tenta hanorin Apai hodi la halo tuir nia vontade kuandu nia tanis.

Apai fó lisaun barak mai ha’u oinsá maka atu hakiak labarik.He is a ‘great teacher’ teaching me Child Psychology.

Ohin kalan, hahú hosi tuku 6:45 to’o tuku 8:30 ha’u ho Irmaun Augusto ensaiu múzika. Apai gosta mai besik ami hodi rona múzika no hakarak toka tambor. Teo ho Salvador ne’ebé involve iha grupu múzika ne’ebé ami forma semana kotuk la mosu atu ensaiu tanba problema familiar......]

*) Moris ne’e nu’udar funu ida, ita bele dehan hanesan nune’e. Ita presiza atu prepara ita-nia an halo didi’ak hodi sai funu-na’in ida-ne’ebé di’ak, hodi nune’e ita bele manan iha batalla moris ne’e nian. Buat hotu sei la tun de’it hosi lalehan.

*) Sai masin, ema la haree (ita), maibé ema sinti. Masin iha ne’ebé de’it, hosi rai ulun to’o rai ikun, ema sempre buka. Ema koko. Ema lambe. Ema han masin. Bainhira masin laiha, masin la tau, modo hotu-hotu han la gostu. Masin: hamate ita-nia hamalaha, hori uluk, hori otas kedas.

*) Na’i, tanba sá maka tenke ha’u? (Hanoin fali Moises iha foho Sinai.). Tanba sá maka Ó tenke hili ha’u sai Ó-nia mata-dalan hodi hatudu naroman ba maluk sira iha dalan nakukun? Na’i, ha’u ema maksalak. Ha’u-nia lalaok kleuk resin, hanesan Ó rasik hatene. Tuhan, saya tidak pantas Tuhan datang pada saya, tapi bersabdalah saja, maka saya akan sembuh.

*)Ohin ita hateke ba kotuk la’ós katak ita tenke fila fali hanesan loloos ida uluk. Hateke ba kotuk somente ita atu horon fila fali iis pasadu nian ne’ebé murak no kmanek, hodi nune’e, bainhira ita atu hakat ba oin karik, ita sei la sidi, no ita sei la monu hanesan uluk. Atu hakarak ka lakohi, ita, ba dala ida-ne’e, konserteza sei monu no sidi fila fali, maibé iha rai kuak no rai naruk ida-ne’ebé foun.

*) Mama Inan Doben, husik ba! Loron ruma kuandu nia ba kotuk, no ba oin mós la di’ak ona maka nia foin basa nia reen toos no buka nia hun no abut. Maibé, molok nia halo buat ida-ne’e, buat hotu tarde loos ona. Entaun, ha’u sei ho laran luak no laran kmanek hamrik hodi dehan, “Alin, mais vale tarde do que nunca.”

No comments: