AFORISMA DIARIA [28-5-2007]

[Agora ha'u iha ETDA nia sentru treinu iha Fatuhada. Ohin dadeer ha'u mai tuir workshop kona-ba Compat International hanesan durubasa. Tuir loloos ha'u mai tuir mos iha Sabadu liuba, maibe tanba ha'u ba halo fali servisu hanesan durubasa ba reuniaun VRESJ nian hamutuk ho PR Ramos-Horta ho partidu politiku sira iha OB, ha'u la jadi mai. Hau-nia kolega seluk ida maka mai troka fali ha'u. Foin primeira vez maka ha'u mai iha sentru ne'e. Ha'u iha impresaun diak ho kondisaun sentru nian maka furak... Deli Boot, Noi no Mana Zinda sira mai tuir treinu iha ne'e. ....]

*) Loromatan sa'e ona. Ita keta toba resin. Ita tenki, tuir loloos, buka atu hadeer molok loro matan sa'e.

AFORISMA DIARIA [23-5-2007]

[ Foin almosu iha OB. Dada lia oituan ho Jaime da Silva, kolega Manatuto oan ida ne'ebe uluk ami eskola hamutuk iha eskola primaria. Oras ne'e nia iha oan hitu ona. Ami troka impresaun hanesan Manatuto oan...Ha'u mos ohin sinti satiadu no triste tanba foin simu fali informasaun hosi ha'u-nia Xefe, Joel katak ha'u sei la hetan autorizasaun atu ba foti ferias--anual leave tanba razaun administrativu (enkuantu ha'u-nia Xefe Vera foti ferias, ha'u labele sai ba fatin ida. No mos oras ne'e, ha'u maka lori kargu nu'udar OIC).
Figuraun!! Ha'u-nia planu atu ba Australia, tuir Festival Eskritor fulan ida ne'e kala sei kansela hotu..Ha'u la bele halo buat ida....Filha da Mae!!! Ha'u-nia alin Mundu kala hein loos nia sapatu atu sosa ne'e...
Horikalan ha'u simu SMS hosi Mundu katak tanba loron 11 ha'u la update ha'u-nia blog sira, nia mos hanesan leitor ida, nia mate suri.. Ha'u promete ba nia ohin dadeer katak ha'u sei update ha'u-nia blog sira....]

*) Relasaun familiar iha uma kain ida nu'udar feen ho laen ejiji bebeik esforsu atu halo balansu entre 'atensaun ba familia' no 'atensaun ba feen/laen'. Se lakon ona ekilibru, entaun ne'e susar boot.

*) Moris nakonu ho buat maka ita la espera. Ita presiza prepara an atu enfrenta realidade ida ne'e ho fuan ho laran tomak...

*) Ita-nia oan sira maka sei hatutan no haburas ita-nia tradisaun. Hanesan ha'u hatete dala barak ona katak sira maka ita-nia sanak no dikin, no ita maka nu'udar hun no abut.

*) Manatuto hanesan rai klaran, rai husar iha kna'ar boot atu hakoak Loromonu no Lorosa'e. Bainhira parte rua ne'e iha tensaun, manas, no nakali, entaun Manatuto tenki hamrik hodi akalma sira nain rua. Hanesan maluk Nuno dehan, "Lelomonu ga sau, Lelosa'e ga sa'u".

AFORISMA DIARIA [22-5-2007]

[Hafoin loron 11 maka ha'u mai fali atualiza blog ne'e. Foin almosu ho David Ramos Castro, maluk Espanol ida ne'ebe foin lalais ne'e ha'u konese. Nia ema ida maka gosta literatura. JP maka fo konese ha'u ba nia. Ami hasoru malu ba dala uluk iha loron 16-5 bainhira espozisaun ha'u-nia poezia ho pintura hahu hala'o iha Fundasaun Oriente.....Buat barak maka atu hakerek. Ha'u-nia viajen no ferias ba Bali no Java foin lalais ne'e to'o oras ne'e seidauk hakerek....]

*) Poeta/poetiza ho ninia poezia mosu hanesan bee maka turu oitu-oituan, hafura fatuk maka toos...

AFORISMA DIARIA [11-5-2007]

[TT Akait. Tuku 2:09 loromanas. Foin almosu ho Toze iha Alpha ho Omega. Entrega konvite hosi PR XG ba seremonia despidida aban iha nia rezidensia ba Toze....
Horiseik ha'u ba Toze nia aula, fo palestra ida kona-ba "Influensia Literatura Portugeza iha ha'u-nia kareira literaria" iha UNTL. La'o furak. Ha'u hetan permisaun hosi servisu fatin hodi hala'o atividade ne'e.....]

*) Umanidade: klamar ida, isin barak-barak. Hamrik ketak-ketak, hananu hamutuk.

*) Prosesu hakerek poezia: iha asaun iha moris, no poeta sira-nia knaar maka hala'o apenas reasaun ba asaun maka iha tiha ona.

AFORISMA DIARIA [8-5-2007]

[Oras ne'e fila fali mai TT Akait. Almosu ho Toze, Mara, ho kolega sira seluk. Ami rua Toze halo koresaun ba manuskritu poema sira ne'ebe atu publika no hatudu iha espozisaun iha versaun Portuges.....]

*)Movimentu Romantismu iha literatura Ingleza fo kbiit mai ha'u atu esplora fali liutan Timor-Lorosa'e nia murak no kmanek. Ha'u agradese ba Nai katak ha'u iha oportunidade ba iha universidade, no estuda literatura Ingleza iha tinan hirak liuba.

*) Literatura mos iha nia kna'ar importante atu ajuda dezenvolve karakter nasaun ida nian. Ho nia espiritu persuasivu, literatura konvida ita atu luku klean liutan iha tasi realidade moris nian.

AFORISMA DIARIA [4-5-2007]

[Agora iha TT Akait. Amor ba tiha ona uma, haree Apai. Ha'u la almosu ida tanba ohin ha'u foin matabixu iha OB iha 10:45 dadeer, hau sinti kabun sei bosu. Ha'u hemu deit sumu goiava ida iha restaurante Alpha & Omega.
Furak atu observa ema sira maka la'o ba la'o mai: labarik oan sira; feto no mane faan aifuan, bani been, no estudante universitariu sira. Kareta ho motor barullu.. Horiseik la mai halo 'update' ha'u-nia blog sira tanba almosu ho Mara, Toze no Senora Fatima hosi Embaixada Portugal. Iha almosu ne'e, ne'ebe hala'o iha Hotel Timor, ami ko'alia kona-ba projetu kultural--espozisaun ha'u-nia poezia no pintura Yahya nian, no mos publikasaun ha'u-nia livru bazeia ba poezia no pintura sira ne'ebe produz iha tinan 2005 liuba. Toze mos informa mai kona-ba novidade foun-konvite hosi Portugal mai ha'u atu ba tuir feira livru nian ida iha tinan ida ne'e, la hatene loos sa fulan.....]

*)Poeta? Se maka nia? Nia nu'udar "reminder" ida ne'ebe fo hanoin mai ita atu hadeer beibeik hodi hateke 'tun' ho 'sa'e' realidade ita ema-nia moris. Nia ema mehidor? Bele mos ita hatete hanesan ne'e. (thinking of John Lennon's song, "Imagine" wih its line, "You may say I am a dreamer, but.. I am not the only one..)

-PANOROMA POLITIKA TIMOR-LESTE NIAN-

*)Xanana

manu aman mutin/sikat buri, sikat jala

hafetu tuir oras/ la tau tara

molok sarebak/ manu maten ita foti//

--

*) Interesante atu observa slogan "Maubere Tasi" no "Maubere Foho" durante kampana prezidensial iha segunda ronde ne'e.

*)demokrasi timor-leste nian buras. sei nurak. sei lori tempu atu tasak.

*) Vox Populi, Vox Dei, aforismu ida ne'ebe tuan maibe sempre relevante hosi tempu ba tempu. Iha koteksu TL nian, ema barak husu katak povu sei votu tuir nia konsiensia rasik.

***

AFORISMA DIARIA [2-5-2007]

[Fila fali mai iha XRR oras ne'e. Almosu tiha ona iha OB. Dada lia hamutuk ho Ceu no Laila kona-ba politika rai laran ne'ebe iha relasaun ho eleisaun prezidensial..
Semana ida resin ha'u la atualiza ha'u-nia blog sira ne'e tanba ha'u ba tiha ferias. Durante ferias, tempu maka laiha ne'e duni ha'u la konsege atualiza. Hau sei hakerek kona-ba ha'u-nia viajen ferias ne'e iha edisaun tuir mai...]

PANORAMA POLITIKA TL NIAN

1. Agora ita atu tama dadaun ona eleisaun prezidensial segunda ronda. Ema hotu hein katak, eleisaun sei la'o ho susesu.

2. Hosi kandidatu rua ne'e: JRH no LO, ida maka manan mos, ema hotu tenki hakruuk ba rezultadu eleisaun. Maibe, kandidatu ne'e tenki manan ho didiak alias laiha kaska malu. Hodi nune'e, moris nasaun nian sei la'o didiak tuir saida maka ema barak hakarak.

****

*) Istoria pasadu nian sempre sai referensia ba ita ema nia moris. Naran katak ita maka labele baruk atu aprende hosi referensia ne'e.

*) Ha'u sei la toba dukur ho didiak bainhira ha'u-nia ran rasik moris iha terus no susar nia laran.

*) Eskritor/a sira nu'udar koletor/a "fosil" tempu nian. Sira ema bulak ka?

AFORISMA DIARIA [23-4-2007]

*) Tanba sa maka ita sempre halo buat ida iha ultima de hora?

[Agora iha XRR, ansi atu mai sosa buat ruma ba Ikun, no fila ba uma foti dokumentu ruma maka ha'u haluha...]

AFORISMA DIARIA [21-4-2007]

[XRR...Loromanas loos. ha'u foin hosi Foto Diak, Akait hasai foto atu haruka ba Ubud Writers Festival. Antes ne'e ha'u, apai no Amor ba Delta 1, vizita Noi sira. Ami han bakso. Ha'u laiha vontade atu han etu... Depois tiha Amor ba Delta Nova atu partisipa iha seremonia despidida ba ninia Xefe Pai Que maka atu fila ba Portugal la kaleur tan.

Apai boot tan ona. Nia oin, bainhira hamanasa hanesan loloos Zelito no Adei bainhira sira sei kiiik. Nia hatais singlet. Noi maka kous. Noi estima loos nia. Ha'u haksolok haree nia hamanasa..

Iha dader tuku 7 ho balun ohin ami lori hela nia Ama Bati ba Audian. Depois tiha ami ba pasiar iha Arreia Branca. Mata bixu iha ne'eba. Hasai ninia foto lubuk ida...]

*) Ha'u bele bosok ema seluk dala barak,maibe susar ba ha'u atu bosok ha'u-nia an rasik, maski dala ida deit.

*) Ita-nia kakutak iha tendensia atu arogante maibe ita-nia fuan ne'e iha tendensia atu haraik an. Dezafiu boot iha moris maka oinsa ita bele halo balansu ba ita-nia fuan ho kakutak.

*) Inimigu boot liu hotu iha moris la'os ema seluk, maibe ita-nia an rasik. Ita presiza involve an iha funu bebeik hasoru ita-nia inimigu ida ne'e.

PANORAMA POLITIKA IHA TL

*) Dala barak ha'u hatete ba maluk foin sa'e sira ne'ebe otas hanesan ho ha'u katak, ha'u la interese ho sira-nia koor politika. Buat maka importante mai ha'u katak "ami mesak Timoroan, no ami hatais kamiza ida deit: kamiza juventude". Hanesan jerasaun foun, ita presiza hanoin foun. Ita tuir dalan ita-nia maun no bin boot sira nian. Maibe, ita tenki buka evita atu labele halo fali sala ne'ebe ita-nia maun ho bin boot sira halo tiha ona. Konserteza ita sei halo sala iha ita-nia atuasaun politika. Ne'e buat ida maka normal, no umanu. Maibe, diak liu ita sei halo sala foun duke repete fali sala hirak ne'ebe uluk halo tiha ona.

*) Boot sira soran, no han malu, to'o ikus, kiik sira maka terus no susar. Ne'e la'os novidade ida.

*) Edukasaun sivika la'os hala'o lufu lafa deit bainhira atu besik halo ona eleisaun, maibe presiza hala'o iha moris tomak. Ne'e presiza jestuan ida maka diak.

*) Frakeza boot iha TL ne'e maka falta de jestaun ida diak iha aspetu hotu.

AFORISMA DIARIA [20-4-2007]

[Oras ne'e ha'u iha TT Akait. Foin ba mos hasoru Amor iha BNU Akait.
Almosu hamutuk ho Cindy, kolega Amerikana iha restorante Sang Kuring, Mandarin. Han nasi goreng. Ami dada lia kona-ba esensia hakerek hanesan eskritor/a. Buat barak maka ita bele hetan iha hakerek. Hakerek nu'udar terapia, hakerek nu'udar revelasaun, hakerek nu'udar auto-deskobrimentu, sst.
Konferensia imprensa iha ha'u-nia servisu fatina kansela.

Iha dadeer iha servisu fatin dada lia ho Irmao Augostu kona-ba edukasaun. Ami hamanas malu ho idea progresivu sira atu hodi kontribui dezenvolvimentu umanu iha rai Timor-Lorosa'e. Ha'u mos fo hatene ba nia kona-ba ha'u-nia enderesu blog sira. Nia haksolok ho buat sira ne'ebe ha'u halo hanesan eskritor, no dehan katak buat sira ne'e fo inspirasaun ba nia.

***

*) Tamba deit domin ne'ebe o haklaken, ema balu la gosta o. Sira konsidera o hanesan ema ne'ebe hamosu perigu ba sira. Tanba ne'e duni, sira buka hasees tiha o..( Ha'u hanoin fali Jesus, Martin Luther King Jr, Romero, Ghandi, XG, sst.)

PANORAMA POLITIKA IHA TIMOR-LESTE

*) Lider balu sofre saida maka ema bolu "post-power syndrome" maibe, tanba sira nia "matan delek", sira rasik la sinti no lakohi rekonese.

*) Furak atu halo analiz ba Timor-Leste nia problema sira hosi aspetu espiritual, psikologiku, no filozofiku. Ne'e tanba ha'u-nia "background" hanesan poeta ida.

****

AFORISMA DIARIA [19-4-2007]

[XRR. Tuku 1:40 loromanas....

[Ha’u ohin la almosu ida. Hemu deit sumu—hudi no haas. Akompana Mana Ceu, Joao no Laila sira almosa iha RC.

Depois ne’e ha’u mana Ceu dada lia kona-ba panorama politika iha rai laran. Povu barak ona ho retórika politika. Sira hakarak mudansa.Tuir mai, nota oan balu ne’ebé ha’u hakerek durante sira almosa:

*) XG: hala’o “Perestroika” no “Glasnot” TL nian. Tanba ne’e, ema balu konsidera nia hanesan ‘the enemy from within’.;

*) Partidu CNRT ne’ebé oras ne’e mosu nu’udar reasaun ba asaun sira ne’ebé durante ne’e iha. Ho nia espiritu “rekonstrusaun no buka atu hakoak ema hotu” CNRT sei, sein dúvida, atrai ema barak nia atensaun atu hodi halo mudansa polítika iha rai lulik ida ne’e, ne’ebe ita hotu bolu naran Timor-Lorosa’e ka Timor-Leste.

AFORISMA DIARIA [18-4-2007]

Sekuensia Poetika:

*) Iha Mae nian kabun laran, ita oan sira luut an durante fulan sia nia laran. Ita hahu hetan hahan isin no klamar nian iha ne'eba. Mae nia kabun laran, fatin lulik. Fatin ita hotu nian.

*) Ita halo planu, Maromak maka sei tetu, hanesan saida maka hatete iha Biblia. Loos duni, Nai! Ita Boot maka boot liuhotu ka'er ha'u-nia abut moris nian.

AFORISMA DIARIA [17-4-2007]

[Agora ha'u iha fali ona Xanana Reading Room. Horiseik ha'u sosa livru lima iha ne'e. Mesak livru Ingles deit.
Ha'u foin fila hosi Delta 1, lori hela serveja VB kaixa tolu ba Noi atu faan.
Taxista oan ida ne'ebe tula ha'u ne'e ema Suai oan ida, hosi Tilomar. Naran Miguel Pires. Nia hasee ha'u, "Keta Senor maka reza iha TV ne'e ka?". Ha'u hatan ba nia katak, "Sim. La'os reza maibe reflesaun...". Nia dehan ha'u-nia liafuan sira ne'ebe mosu iha reflesaun iha TVTL ne'e kona loos nia fuan ho neon. Liu-liu bainhira ha'u hatete katak, "tantu mais ita halo, ita sinti katak ita seidauk halo. Iha buat barak tan maka ita presiza halo.".

Adino nain rua maka ohin ajuda ha'u lori hela serveja kaixa tolu ne'e ba hasa'e iha taxi. Ami nain tolu dada lia antes ne'e durante almosu iha Recreation Centre. Ha'u la han buat ida tanba sei bosu, ne'e duni ha'u sosa deit sumu hudi no haas marka Springvalley.

PANORAMA POLITIKA TIMOR-LESTE NIAN

[ohin bainhira ha'u akompana adio nain rua almosu, ha'u hakerek liafuan oan ruma iha ha'u-nia nota tuir mai:]

[Ema barak hakarak haree mudansa politika iha rai laran.

Ita bele kompara hanesan iha kopu rua maka tidin hela iha meza leten.

Kopu ida iha tina ona sinal. Kopu ida fali sei foun hela. Ita balu ulun toos la halimar, hakarak nafatin hemu bee iha kopu ida ne'ebe iha tiha ona sinal ne'e. Ha'u bele dehan katak ne'e somente ema bulak maka halo hanesan nune'e. Ne'e parese manduku mi tiha ona sira-nia matan, halo sira-nia matan delek, hodi sira la haree no hatene momoos halo diferensa entre kopu ne'ebe iha sinal no ida ida ne'ebe foun. Maibe atu halo nusa moos, ema barak kala sei hili kopu foun atu hodi hemu bee..]

*) Labele kanteen! Matenek ne'ebe o iha, buka atu fahe ho maluk sira. Ne'e maka furak!

AFORISMA DIARIA [16-4-2007]

[Foin han hotu loromanas nian iha OB, no ha'u aranka mai liu TT Akait ne'e atu 'update' ha'u-nia blog sira.
Ha'u-nia oin halai oituan....
Iha fim semana liuba, ha'u halo hotu barak liu hamutuk ho familia iha uma hodi deskansa. Ha'u-nia planu atu servisu--halo tradusaun ba relatoriu Ekipa Sertifikasaun Eleitoral nian mos la realiza tanba ha'u-nia vontade atu servisu ladun iha.

Iha Sabadu, 14-4 lorokraik ha'u,Amor no Apai sai ba pasiar ho kareta Vitara metan. Iha Lesidere, beseik Hotel Turismo nia oin, ami nain tolu para kareta hodi apresia paizajen tasi ibun Dili maka furak. Antes ne'e ami ba hatun Bati iha Audian. Ha'u hakerek nota diaria ho lian Ingles deit, toka ho muzika Brazil nian--album Beleza Tropical. Udan subiska oituan ne'e duni ami la konsege la'o halimar iha tasi ibun.

Iha Domingu, 15-4 lorokraik ami ba Delta, Noi sira. Hasou Mae sira iha ne'eba.
Kalan mehi lubuk ida. Mehi ida maka ne'e: Ema hodi fatuk atu baku ha'u iha dalan ninin ida.
--
*) Sai inan-aman ba ita-nia oan sira ne'e nu'udar responsabilidade boot. Labarik sira-nia dezenvolvimentu depende ba ita inan-aman sira. Bainhira sira hetan susesu iha moris, ita inan-aman sira haksolok, maibe sira hetan susar, ita mos laran susar. [Oras ne'e ha'u iha oan mane oan ida. Oinsa loos maka ha'u bele eduka nia to'o ema boot atu sai ema ida?]

AFORISMA DIARIA [13-4-2007]

[Tuku 1:25 loromanas. Oras ne'e ha'u iha Xanana Reading Room (XRR). Mai iha ne'e dala barak ona...Ha'u gosta mai iha ne'e, haree livru tuan sira ne'e atu sosa. Karun oituan. Kada livru tuan kusta kedas dolar 3.

Iha tinan rua ka tolu liuba hau sosa livru lubuk ida.

Sei furak liu bainhira iha kapital Dili ne'e iha biblioteka publiku hanesan XRR nian balu tan. Hodi nune'e fatin hanesan ne'e bele kria espasu aprendizajen diak ida ba ema Timoroan sira, no ema rai liur, maibe liliu ba labarik foin sae sira.

Ha'u preokupa oituan tanba tradusaun relatoriu Ekipa Sertifikasaun Eleitoral ONU nian ba ninia kintu relatoriu ba lian Tetun seidauk remata deit. Ha'u sempre hetan interupsaun hosi servisu tradusaun no interpretaasun seluk, ne'e duni ba tradusaun ida ne'e ladun iha progresu siginifikante. Husu boot ha'u bele haka'as halo hotu molok ha'u sei foti ferias badak (ORB), ne'ebe tuir planu ha'u sei foti iha loron 23 fulan-Abril...]

[*)Natureza ne'e matenek/sabiu. Nia haklaken tiha ona ba ita filozofia moris nian. Saida maka ezije hosi ita maka oinsa ita bele internaliza didiak filozofia ne'e, no aplika iha ita-nia moris loron-loron.]

Ohin Sulasti, Apai nia babysister ba Atambua atu trata nia pasaporte no atu estende nia vistu. Bati maka ba toba kalan rua ona ho ami hodi atu haree fali Apai.

AFORISMA DIARIA [12-4-2007]

[TT Akait....] Wah, tan deit preokupa ho eleisaun prezidensial no asuntu vida sira seluk, ha'u haluha lakon loos kona-ba Pai nia loron mate no hakoi.

Horikalan Ikun maka haruka SMS mai ha'u fo hanoin fali. Posa, ha'u bele haluha ne'e! Ikun hatete, " manu, have you forgot that 2day apa nia loron hakoi". Tanba duvida ho data horiseik nian; ha'u hanoin katak horiseik ne'e dia 10-4, ne'e duni ha'u hatan fali Ikun nia SMS hodi dehan, " oh, my god, i completely forgot dear! today is papa's loron mate and not loron hakoi.tanx for reminding me, dear. mu." Nunee tiha Ikun fo fali resposta, " loron hakoi. hau sei iha catatan. papa mate tgl 10 dec. 2003 hr rb.".. Ha'u mos fo fali resposta, " sim, agora maka ha'u foin hanoin. Hau hanoin ohin dia 10. Ah, nusa maka bele haluha hanesan ne'e. Apa konserteza triste."
Ha'u mos, hanesan babain haruka SMS ba bin no alin sira iha papa nia loron mate, buka haruka kedas SMS tuir mai: "OHIN PAPA NIA LORON HAKOI. HAU HALUHA LAKON. IKUN MAKA SMS FO HANOIN. ITA LA TAU AIFUNAN TAN. PAPA HAMUTUK HO ITA NAFATIN."

Kontajen votu eleisaun prezidensial hatudu provizoriamente horiseik katak Lu-Olo maka primeiru, RH segundu no Lasama terseiru. Agora ita hein katak sei iha segunda ronda eleisaun prezidensial, ne'ebe tuir planu sei hala'o iha loron 8 fulan Maiu.
Anunsiu eleisaun prezidensial mos fo sai tiha ona hosi PR katak sei hala'o iha dia 30-6-2007...]

Horibairuak kalan ha'u konsege hasoru malu kolega Japoneza Meg Kagawa. Nia nee ne'e kolega Hanayo nia kolega mos. Dada lia meia ora hanesan ne'e iha otel audian. Hahu agora nia sai ha'u-nia mutual friends hamutuk ho Hanayo. Nia mos introduz ha'u ba profesor sira seluk ne'ebe halo parte iha delegasaun observador eleisaun hosi governu japoneza. Ha'u tenta atu buka kontaktu ho sira kona-ba ha'u-nia estudu aban bairua iha Japaun, karik iha posibilidade, iha area estudu konflitu no dame...]

*) Amizade hariku no hamanas ita-nia fuan ho neon. La'os lori tempu hira maka ita halo bele ne'e maka importante maibe oinsa.

*)Esperansa nu'udar riku soi ita ema nian ida maka ita labele lakon. Se lakon ona esperansa, ne'e katak ita laiha ona futuru..

AFORISMA DIARIA [10-4-2007]

[TT Akait...
Eleisaun prezidensial hala'o horiseik ho hakmatek iha TL laran tomak.

Horiseik dadeer tuku 7:15 hanesan ne'e, ha'u ho amor hakat ba iha estasaun votasaun iha Eskola Primaria 6 Fatuhada. Ema ladun barak iha tempu dadeer.

Iha tuku 12:00 loromanas ohin, ha'u akompana ha'u-nia xefe sira hala'o konferensia imprensa. Topiku ohin foka ba realizasaun eleisaun. Katuas AK ho FRN maka ko'alia.
Ha'u atua ho auto-konfiansa, hanesan baibain.

Horiseik tuku 3 lorokraik mos hosi parte unmit hala'o konferensia imprensa--foka kona-ba realizasaun eleisaun.

Iha tempu paskoa, hahu hosi Sexta Feira Santa ha'u deskansa barak liu maka iha uma. Ha'u ba hariis tasi iha Sexta dadeer, depois iha Sabadu ba, ho amor, Apai Bekusi--vizita mae. Iha Domingu, ha'u ba misa iha Igreja Aimutin, no hasoru Zinha sira iha ne'eba ho labarik sira. Depois ha'u ba vizita Noi maka moras. Nia ulun ne'e moras fali ona hanesan uluk.

Tenta atu estika Adei ho Nini maka la'o dalan kleuk iha sira-nia vida adolesensia. Ha'u-nia kakutak moras....

Ha'u almosa iha Akait Bistro foin lalais ne'e. Hasoru Lucia Lobato ho Joe Goncalves. Dada lia oituan kona-ba AR.Ami fo konmentariu kona-ba AR, ne'ebe mosu iha programa Metro Realitas Metro TV horikalan: 00:30.

Povu TL hakarak haree mudansa iha rai laran. Tuir kontajen votu provizoria, RH maka domina hela votu sira.

*) Kna'ar poeta ne'e saida loos? Poeta nu'udar ema ida ne'ebe hetan kna'ar atu halo rezumu kona-ba realidade moris nian, no depois espresa buat ne'e iha nia obra sira. Nia nu'udar observador/a moris nian, ne'ebe hamoris nia "radar konsiensira" durante oras 24 nia laran.

POEZIA MENSAL III [Corpo & Sangue de Cristo]

CORPO & SANGUE DE CRISTO

1. Nia subar an iha Paun no Tua

2.Ha'u hamlaha, hamrok, no liman ain kole

3. Ha'u hakat ba han no hemu

4. Ha'u hetan matak malirin

---

Abril 2007

AFORISMA DIARIA [5-4-2007]

[Loron sia tiha maka ha'u mai atualiza blog ne'e tanba ha'u tenta atu halo buat ne'e iha semana liuba, internet iha TT Akait ne'e maka sempre avaria no ema maka nakonu hela deit...

Panorama politika TL nian oras ne'e tama ona iha loron final kampana eleisaun prezidensial...
Iha insidente balu... En jeral, tuir informaaun maka fo sai, eventu kampana la'o diak to'o oras ne'e.

Hanesan iha Kinta babain, ohin tuku 12:00-13:00, ha'u akompana ha'u-nia Xefe boot sira hanesan durubasa iha konferensia imprensa....Barak liu foka kona-ba eleisaun prezidensial maka sei atu haal'o Segunda oin, 9 Abril 2007.

Ita hotu hein katak buat hotu sei la'ao diak iha loron eleisaun......]

*) Lia fuan ne'e kroat: bele hamaus ema nia fuan laran, no bele hakanek. Ne'e duni, hanoin uluk lai maka ita hasai lia fuan ruma, no labele hasai liu tiha maka ita hanoin...

AFORISMA DIARIA [27-3-2007]

Situasaun Polítika no Justisa

[Ha’u hakerek nota ne’e iha eskritóriu. Kuaze dadeer ne’e, ha’u foka liu lee jornal—akompaña situasaun polítika iha rai laran duke halo servisu tradusaun. Kintu relatóriu foin Ekipa Sertifikasaun Eleitoral nian to’o mai tan. Ne’e katak iha loron hirak mai ne’e, ha’u sei preokupa loos halo tradusaun ba dokumentu maka komplikadu oituan ne’e.
Foin dada lia ho Mariano ho Augostu kona-ba situasaun rai laran ne’ebé relasiona ho kampaña prezidensiál. Dada lia moos kona-ba kestaun justisa. Ha’u hatete ba sira katak ha’u la haksolok haree ‘performance’ instituisaun justisa nian ne’ebé la ho loloos implementa rekomendasaun relatóriu KII nian.
Ha’u deskreve katak buat ne’e hanesan ‘ita falun hela naan doiis iha zeleira laran. Loron ruma naan dois ne’ebé falun metin ne’e sei rebenta, no halo zeleira ne’e sei sai iis dois la halimar, no to’o ikus zeleira moos sei la aproveita.’
Kampaña eleitoral ba kandidatu prezidensiál nain walu hahú tiha ona iha Sesta, 23-3 liubá. Ita haree took se loos maka atu sai Prezidente foun hodi ukun iha tinan 2007-2012?
Oras ne’e, kandidatu sira iha sira-nia diskursu kampaña promete buat oinoin. Ha’u hein katak sira-nia promesa sira sei sai la’ós deit promesa iha tempu ikus mai ne’ebé nunka kumpri.
Buat hotu sei depende ba rezultadu eleisaun prezidensiál nian, ne’ebé sei atu hala’o iha loron 9, fulan-Abril tinan 2007.
Se deit maka atu sai presidente iha tempu mai agora, nia tenke buka oinsá para atu hakotu tiha krize polítika militar ne’e. Ne’e katak, nia tenke buka oinsá dada sai tiha aitarak rohan oan ne’ebé naktabar metin iha ita-nia ain tanen. Se la’e susar boot, no ita sei dansa deit iha fatin. Povu kiik maka sei kontinua terus tinan bai loro…..]

*) Sai matenek, hanesan mós sai masin ne’ebé subar an iha modo sira-nia leet; ema la haree ho matan, maibé ema sinti ita-nia meer.

*) Sai matenek hanesan mós sai lilin kiik oan ida, ne’ebé naroman, leno nakukun maka falun metin.

AFORISMA DIARIA [26-3-2007]

[Ha'u mai fali 'update' blog. Ha'u-nia ulun moras oituan. Ohin almosu ho Charline, kolega Franseza oan ida ne'ebe ha'u servisu hamutuk durante atuasaun arte ba dame iha tinan kotuk iha Dili. Nia hakarak hetan informasuan liutan kona-ba poezia Timor-Leste nian. Molok nia mai, ha'u han uluk ona....
Fin da semana:Sabadu ho Domingu ha'u pasa deit iha uma hodi deskansa. ]

*) Saude ita ema nian nu'udar osan mean. Kuidadu halo didiak. Ita labele halo buat seluk ho didiak, se karik ita-nia saude-tantu mental no fiziku, la permiti.

AFORISMA DIARIA [22-3-2007]

[Oras ne'e iha TT Akait. Foin han hotu, no lorin hahan mai Amor iha nia servisu fatin, BNU Akait....]

*) Iha mundu ne'e, iha buat barak maka ita la konsege deskobre hotu, to'o deit ita mate alias tama fali ba rai kuak, no filafali ba rai rahun.

*)Esensia 'hakerek' nian maka ne'e: katak ema hotu ne'e nu'udar hakerek nain, tuir kapasidade ida-idak maka nia iha.

*)Xave segredu moris nian iha hela ita-nia oin. Maibe, dala ruma ita matan delek atu haree tanba ita preokupa ho buat seluk hirak ne'ebe tuir loloos ita lalika preokupa.

AFORISMA DIARIA [20-03-2007]

[Oras ne'e ha'u iha TT Akait. Mai fali iha ne'e atu atualiza ha'u-nia blog ne'e. Ha'u tenta atu atualiaza iha loron hirak liuba iha eskritoriu, maibe susar oituan tanba blokeadu hosi IT.
Ohin ha'u hakarak hatama diaria loron 16-3 nian ne'ebe ha'u hakerek tiha ona no pasa tiha ona ba USB.

Foin lalais ba iha Foto Diak atu fase foto Ina nian sira ne'ebe haruka hosi Cuba iha tinan liuba. Ha'u foin maka transfere mai USB no lori mai fase.]

---
[ha'u sei buka atu hatama ha'u-nia nota diaria loron 16-3 nian ne'ebe ha'u salva tiha ona iha USB:
--
16-3-2007

[Tuku 7:53 kalan ona, iha eskritóriu.
[Ohin Mundu nia tinan. Halo tinan 26. Susar oituan atu kontaktu nia, katak Ikun liuhosi SMS horikalan. Nia oras ne’e iha Surabaya, ba halo kamping. Ha’u sei buka email deit nia ohin kalan ne’e.
Kleur tebes duni ona maka ha’u la kontaktu nia. Nia fuan moras, konserteza.

Surat ha’u-nian ba Mundu liu hosi email maka tuir mai ne’e:

---------
Alin Mundu maka ha’u hadomi,

Kleur duni ona maka Manu abandona, la kontaktu Mundo.

Uluk nanain, hakoak boot ba Alin. Parabens! Tanba ohin halo tinan 26. Mane klosan tan deit ona.

Manu hakarak aproveita Mundo nia loron aniversáriu, hodi hato’o deskulpa ba Manu nia lalaok sira durante ne’e. Mundo dehan katak Mundo sinti Manu dook liu ona hosi Mundo. Dala ida tan, deskulpa!

Ha’u hakarak ita dada lia nafatin iha tempu ikus mai liu hosi email.

Ina hatete katak Mundo ho Ina iha korespondensia diak.

Hanesan informasaun ba Mundo katak foin lalais ne’e, ha’u loke ha’u-nia website privadu. Bele haree iha enderesu tuir mai:
-------
-www.lianainlorosae.blogspot.com
-www.dadolinlorosae.blogspot.com
-www.dadolin.blogspot.com
--------------
Ha’u tenta hakerek ha’u-nia sentimentu no pensamentu iha blogspot hirak ne’e. Hau hein komentáriu.

Maka ne’e deit lai.
Ha’u hein resposta ho laran tomak.

Hakoak boot hosi Manu doben,
ABE
----
*) Sai filózofu ida ba iha ó-nia moris tomak, maibé iha ó-nia filozofia sira-nia leet, buka kontinua atu sai nafatin hanesan ema bain-bain nian ida!

AFORISMA DIARIA [15-3-2007]

14-3-2007

--Kuaze Semana Tolu La Atualiza Blog—

[Eskritóriu UNMIT. Hakerek ho komputadór foun. Tuku 7:05 kalan.

Ha’u foin maka dada lia ho staff UNMIT nain rua hosi Swesia iha kafetaria PX. Ida ofisiál Polisia ONU naran Carina Nithander, no ida fali ofisiál Seguransa naran Ingegerd Karlsson. Foun-foun ha’u sinti ofendidu oituan bainhira Ingegerd ne’e husu ha’u se karik ha’u ha’e hatene ko’alia Inglés ka lae. Ha’u hatete katak, konserteza sim, se lae, oinsá ha’u bele servisu ho ONU.

Ami dada lia buat barak kona-ba situasaun seguransa iha rai laran, múzika ABBA, no ha’u-nia esperiénsia vizita sira-nia rain iha tinan 1995 hamutuk ho Aloz, sst.

Carina hatete katak Timor-Leste iha paizajen furak, no diak ba investimentu turismu. “It is a beautiful country..”. Ha’u hatete ba nia atu, kuandu situasaun normal oituan ona iha tempu ikus mai, vizita parte seluk Timor-Leste nian hodi aprezia ninia beleza.

Kuaze semana tolu ha’u para tiha hodi atualiza ha’u-nia blog ida ne’e. Ha’u baruk atu hakerek. Vontade laiha liu depois loron tomak servisu. Kole loos. To’o uma han hotu tiha, haree televizaun oituan, no lakaleur toba ona.

Situasaun seguransa mós la permiti ba ha’u ho maluk staff UNMIT sira seluk atu fila kalan iha semana hirak liubá. Foin horikalan maka servisu Taxi UN nian normaliza fila fali ninia operasaun. Ha’u fila uma maizumenus tuku 8:30 kalan.

Ha’u triste ho situasaun iha rai laran. Ha’u hakarak deit katak fuan kanek povu Timor-Leste nian sei la kanek liután. Iha parte ida ita hakarak ema hotu atu kumpri lei ho orden, maibé iha parte ida ita hakarak katak Estadu mós rona halerik no preokupasaun sosiedade sivil nian no povu en jeral kona-ba situasaun ne’e.

Alfredo maka oras ne’e sai nu’udar alvu hosi FSI, halo ha’u laran triste.

Ha’u-nia kolega feto metan ida hosi Afrika hatete katak “he is fighting for the poor..Let’s hope that everything will be alright..”

Kalan mehi oin-oin iha semana hirak liubá. Maibé dadeer hadeer mai, haluha hotu. Ha’u arepende oituan tanba la buka atu hakerek.

Maski hanesan ne’e, ha’u tenta buka atu akapta buat ne’ebé ha’u sinti no hanoin liu hosi ha’u-nia notes maka ha’u sempre lori ba mai.

Servisu iha eskritóriu maka nunka mais hotu deit ne’e, porezemplu tradusaun relatóriu Ekipa Sertifikasaun Eleitoral nian ba Tetun ladauk hotu, halo ha’u dala ruma baruk. Ha’u hahú tradusaun kuartu relatóriu Ekipa ne’e nian iha loron 26-2. Tanba ha’u sempre hetan servisu tradusaun seluk maka dalaruma urjente, entaun tradusaun ne’e mós sai abandonadu..

Iha tuku 4 madrugada, loron 6 fulan ida ne’e, naokteen tama uma Fatuhada, naok sasan lubuk ida, inklui ha’u-nia paspor ONU nian. Apai maka sai ami-nia anju da guarda hodi fanun ha’u ho Amor. Ha’u deskonfia ema viziñu maka halo azneira sira ne’e. Esperiénsia ida maka órivel! Foin akontese bad ala uluk iha ha’u-nia vida. Sorte be ,naokteen sira la etraga ha’u ho Apai ho nia inan.

Dalaruma, ikus-ikus ne’e, ha’u sinti katak ha’u-nia kapasidade hanesan tradutór/intérpretu, invez ba oin, maibé marka hela pasu iha fatin deit, no hakiduk fali ba kotuk. Buat ne’e halo ha’u “stress” oituan]

*) Kontrola ita-nia an la’ós buat ida ne’ebé f’asil.

*) Hosi pontu da vista optimismu nian, ita bele dehan katak krize ne’ebé TL oras ne’e hasoru nu’udar parte “the pain of growth as a nation”. Maibé presu maka TL selu ba buat ne’e, karun la halimar! Hanesan nasaun foun ida, TL hanesan mós labarik oan ida maka foin aprende la’o. Labarik oan ne’e sama kois, no monu. Nia monu, tidin maka’as la halimar. Tempu maka sei sai nu’udar aimoruk murak atu kura labarik oan ne’e nia isin ne’ebé moras.

*) Fiar ba katak, “at the end of the tunnel, there will be always light”.

15-3-3007

[Tuku 6:47 lorokraik. Iha eskritóriu. Figuraun, horikalan la konsege aktualiaza ha’u-nia blog ne’e tanba buatamak IT sira blokeia ha’u-nia asesu ba ha’u-nia blog.Ohin dadeer ha’u tenta mós nafatin hela deit.
Maibé ha’u buka dalan seluk. Ha’u tenta ohin loorokraik loke fali ho komputadora seluk, no ha’u iha susesu hodi halo asesu ba ha’u-nia ‘blog’ atu aktualiza.

Ha’u-nia ‘maag’ moras fali ona iha loron hirak liuba. Dadeer san hadeer mai, no bainhira atu ba hariis mai servisu, ha’u-nia laran sae, no atu muta-muta. Ne’e tanba ha’u maka laiha disiplina. Han naran-naran fali ona. Ha’u tuir loloos tenki evita labele han aimanas no buat sin-sin.

Durante konferensia imprensa semanal iha ha’u-nia servisu fatin ohin, ha’u sinti ha’u iha kbiit no vontade. Iha semana liuba ha’u araska oituan.

Ikus-ikus ne’e, ha’u sinti katak ha’u-nia kapasidade hanesan durubasa fraku tan deit, no la’o hela deit iha fatin.

Depois de konferensia, ha’u, Cesar hosi Kyodo News no José Belo hosi AFP ba almosu hamutuk iha Star Food. Ami dada lia lubuk ida kona-ba situasaun polítika iha rai laran. Ami preokupa ho situasaun atual, no hein katak eleisaun sira mai ne’e sei, pelumenus, resolve krize maka oras ne’e Timoroan sira hasoru ne’e. Ha’u hatete ba sira katak, ema ida hanesan ha’u sei kontinua sai idola ida ne’ebé ‘bulak’ ba katuas Xanana. Nia karisma hanesan líder, ba ha’u, sei bele hamaus povu maka oras ne’e sei laran tanis. Ha’u konta mós ba sira kona-ba ha’u-nia ensaiu ida ne’eb’e ha’u hakerek kona-ba katuas X bainhira ha’u iha Portugal iha tinan 1998-1999.

Se la sala, ha’u-nia konversa ho sira nain rua hanesan dala rua ona ho ida ne’e. Ida uluk hala’o iha tinan liuba iha Acait Bistro.]

Reflesaun oan ruma kona-ba situasaun atual TL nian

*) Uluk Alatas dehan problema Timor-Leste nian, hanesan mós fatuk kiik oan ida iha sapatu laran. Agora, haree ba situasaun ida agora, ha’u bele dehan katak hanesan mós aitarak oan ida iha ita-nia ain tanen. Se ita la kuidadu didiak atu hasai aitarak oan ne’e hosi ita-nia ain tanen, ita-nia ain laran sei kanek boot, no kria pus. Pus ne’e sei reventa, no to’o ikus, labele ona, entaun, ita-nia ain tenki hetan amputasi. No ita, sei tinan bain loro, sei la’o ho ai tonka to’o deit ita mate.

*) Ita Timoroan sira maka bele resolve ita-nia problema iha uma laran rasik. Ema seluk hosi liur mai, somente mai ajuda deit ita.

***

AFORISMA DIARIA [22-2-2007]

[Tuku 8:22 kalan, iha eskritóriu. Foin han kalan hotu iha kafetária PX—karil naan manu, no hemu serveja botir ida. La hatene marka saida. Dada lia oituan ho Mn Luzia, kona-ba kualidade edukasaun iha Kolejiu Soibada, Ossu, not sst.

Ha’u haksolok atu hatene ohin loromanas katak ha’u bele asesu fali ona ba ha’u-nia ‘blog’ sira. Ne’e katak ha’u la presiza tan fali ona osan ekstra atu ba iha internet Timor Telecom nian. Horiseik deit durante kuaze minutu 45, ha’u gasta $1.50. Husu boot katka buatamak sira iha IT la blokeia tan, hodi nune’e ha’u bele iha asesu livre ba ha’u-nia blog sira.

La hatene ohin kalan ha’u bele fila ba uma ka la’e. Horikalan ha’u toba deit iha eskritóriu tanba situasaun seguransa la permiti ha’u atu fila. Amor hatete horikalan katak ha’u, diak liu, toba deit ona iha eskritóriu. Ha’u mós tuir deit ritmu ne’e.

Udan ta’u maka’as ohin lorokraik ida ne’e. Horiseik mós hanesan ne’e. Ha’u aproveita tempu maka iha ne’e hodi halot sasan sira iha ha’u-nia meza servisu. Toka ho muzika isntrumentália, ne’ebé ha’u gosta. Mn Luzia mós halo ninia sasan.

Bainhira halot dadaun namanas sasan sira maka rungu-ranga iha gaveta meza nian, ha’u hetan fali nota oan ida ha’u haruka ba JRH hanesan ha’u-nia felisitasaun ba nia aniversáriu iha dia 26-12-2003. Memória servisu iha misaun UNMISET mosu fali ona iha ha’u-nia kakutak. Nota ne’e ha’u hakerek hanesan tuir mai:

------
Dili, 26 Dezembru 2003

Maun Zé Ramos-Horta maka ha’u respeita,

Ohin Maun halo tinan 54. Parabens! Husu boot Maun iha kbit nafatin atu hakat ba oin—hala’o moris ne’e hanesan individu ida no mós hanesan lider ida rai Timor-Lorosa’e nian.

Hanesan prenda oan ida ba Maun iha loron aniversariu ohin, ha’u hato’o poezia oan ida ne’ebé ha’u hakerek bainhira ha’u labuk iha tasi balu ne’eba. Maka ne’e:

-IN THE SPACE OF SUBLIME TRUTH-

I am free to fly!
I am free to sing!
I am free to dance!

Dala ida tan, “Many Happy Returns!”

Shalom! Hakoak boot,
ABÉ BARRETO SOARES
-----

Ami nain rua Mn Luzia mós depois dada lia oituan kona-ba situsaun Timor-Leste atual ne’eb’e nakonu ho violénsia. Ami iha idea han malu kona-ba oinsá atu kura moras psikolójika ne’ebé alin oan juventude sira sofre. Sim, sira presiza atensaun . Sira presiza domin. Domin sei halakon buat hotu.

[Amor foin haruka sms mai ha’u hatete: “Pai hau tauk los o fila ne? diak liu toba iha ktr ona.” . Ha’ u mós telefone kedas nia hodi hatete katak ha’u sei toba iha deit ktr ona ohin kalan… (tuku 8:40 kalan oras ne’e) ]

[Ha’u toma nota tiha ona kona-ba eventu horiseik no horikalan nian. Ha’u sei husik aban ka iha fin da semana maka ha’u sei hakerek barak kona-ba buat hirak ne’e. ….]

*) Atu komprende didiak realidade moris nian, ita presiza iha hanoin klean no iha fuan ne’ebé boot. Buka tama iha maluk “the haves not” sira-nia moris, hodi nune’e ita bele sinti oinsá maka sira sinti no hanoin.

*) Ita-nia istória umanidade nian nakonu ho ran, rungu-ranga iha fatin-fatin iha mundu rai klaran. Furak ba ita atu aprende, hodi nune’e ita sei labele repete fali hahalok sira ne’e iha tempu ikus mai.

[Tuku 8:57. Foin simu sms ida hosi Mize Sarmento hatete (ha’u sinti nia foin haree dadaun programa TVTL ne’ebé desde Outubru 2006 fó sai ha’u-nia reflesaun poétika iha kada Kinta kalan):

“He lalika halo bebeik poezia/dadolin iha tv, hare ba fahe fos rai manatuto nian ruma mai ami han, puisi la halo ami bosu ha….ha..”
(20:50;27/22-2-2007).

Ha’u hatan fali sms hodi dehan,
“Oi, hau hatene katak hau la bele fo hahan isin nian maybe hahan klamar nian. Hehehe..”
(20:53:32/22-2-2007)

AFORISMA DIARIA [21-2-2007]

[Tuku 13: 12. Agora dadaun iha Timor Telecom, Akait...Mai uza internet foin ba dala uluk iha fatin ne'e. Ha'u mai prenxe ha'u-nia "diariu" ne'e iha ne'e tanba iha ha'u-nia eskritoriu ha'u agora labele iha asesu tanba buatamak sira iha IT blokea hotu. Figuraun! Ha'u hatene buat ne'e horiseik lorokraik bainhira ha'u tenta atu asesu ba ha'u-nia blog ida ne'e. Horikalan ha'u hatete ba ha'u-nia Amor katak agora ha'u sei mai vizita bebeik Timor Telecom atu hodi 'update' ha'u-nia 'blog' hanesan ema lian nain ida......]

[Agora situasaun seguransa tantu mais pior...Stock foos mos menus. Ema agora hamalaha. Horikalan kareta ONU no mos Governu nian sai nu'udar alvu..Ema tuda vidru sira ahlo rahun..]

[Ha'u foin maka 'update' fali ha'u-nia 'blog' ne'e tanba desde Sabadu, 17-2 liuba ha'u okupadu loos ho servisu ho vida familiar...]

*) Stomach cannot wait, ema Ingles sira hatete. Buat hotu bele hein, maibe ita-nia kabun susar. Ita labele halo buat ida, bainhira ita-nia kabun hamalaha.

AFORISMA DIARIA [15-2-2007] 3

[Bainhira hariis dadeer iha tuku 8:10 hanesan nune’e….]

*) Susar ba ita hakoi matak deit lia loos pasadu nian. Klamar lia loos pasadu nian kontinua xateia ita bebeik, kontinua reklama atu hatudu nia an mós iha palku moris nian.

[Major Alfredo Reinado tama kategoria ida ne’ebé? “A rebel with a cause” ka “a rebel without a cause?” ]

Tuku 9:37 dadeer.

*) Lei karma sei kontinua vale to’o deit mundu rai klaran ne’e nabeen tiha.

[Tuku 12:56 loromanas. Jardim Palasiu Governu oin. Deskansa oituan iha ne’eba hafoin tiha almosu.]

*) Buat diak ho aat nu’udar fenomena rua maka sempre halo parte ita-nia moris. Lalika hakfodak!

[Han hotu iha Obrigado Barracks. Sosa hahan ba ema 2: Deli Boot ho nia kolega feto oan ida, ne’ebé oras ne’e hala’o dadaun estajiu iha Vila-Verde. Hasoru sira iha besik restorante Tropical Bakery…]

[Tuku 1:32 loromanas. Hafoin tiha toba oituan, tuur iha kadeira jardim nian. Motor no kareta barullu, la’o liu….Rona mós mane klosan oan balu dada lia, goza malu….]

*) Ita-nia inimigu maka ita-nia an rasik. Oinsá maka ita buka konkista inimigu ne’e? Ita sempre involve an iha funu konstante ida—funu hasoru ita-nia egoismu. Yes, we are called to be the ‘rainbow warrior’. The real war is actually the spiritual one—the war within.

[Tuku 2 loromanas. Ha’u haksolok simu disionáriu tolu (Porto Editora); rua hanesan (Portugés-Portugés), no ida fali (Portugés-Inglés) hosi Irmão Acacio, ne’ebé servisu iha Embaixada Portugal. Ha’u hakarak mós ida bé (Inglés-Portugés)..]

AFORISMA DIARIA [15-2-2007] 2

*) 3 + 1 = Independénsia

Iha kontestu luta ba ukun rasik an iha tinan 24 nia laran liuba, ha’u hamosu “rumus” ida tuir mai:

3+1 = Independénsia

-Xanana hamanas ahi funu nian iha ailaran;
-Mario Carrascalão book iha administrasaun poder okupante;
-Bispu Belo, hanesan bibi atan hakilar maka’as bainhira asu fuik mai tata
bibi oan sira;

no

-Ramos-Horta iha rai liur mobiliza opiniaun públika internasionál katak buat ruma la’o la loos iha rai laran.

To’o ikus, ita hotu-hotu hakat ba referendum iha fulan Agostu tinan 1999, no determina ita-nia destinu polítika rasik hanesan povu ida atu hetan ukun rasik an.

****

*) Keta tetak aisar kesak halo rahun, tanba karik nune’e duni, entaun fo’er iha odomatan oin ne’ebé bou aas ne’e atu dasa oinsá loos?

*) Situasaun krize halo ita enfrenta realidade dilemátiku.

*) Ho forsa eksterior maka ka’er ita-nia seguransa iha rai laran, entaun ita-nia ‘kuekas’ no ‘kalsiña’ sira nia koor oinsá-oinsá ema hatene momoos.

*) Atu dehan ema ida traidor ka assuwai’s, hosi pontu ida ne’ebé lai ita haree buat ne’e?

*) Pozisaun eskritór/a sira nian sempre hamutuk ho sira ne’ebé konsideradu hanesan “the powerless, and the voiceless.” Karik misaun ida ne’e maka sira la kumpri, diak liu sira sai tiha hosi formatura hanesan “men/women of letters”.

*) Buat hotu-hotu sei remata, sei iha nia rohan; “ada awal, ada pula akhir”.

****

AFORISMA DIARIA [15-2-2007] 1

[Eskritóriu. Tuku 6:54 lokraik ona. Ha’u-nia servisu la barak ida ohin loron. Ha’u ba akompaña Ekipa Sertifikasaun Eleitoral ONU nia enkontru iha CNE nia eskritóriu iha Mascaranhes, hosi tuku 2:30 to’o kedas tuku 4:30 lokraik. Iha enkontru ida tuir mai fali ho ONG sira, ha’u-nia servisu hanesan durubasa, sira la presiza ona tanba reprezantante sira ne’e ko’alia Inglés hotu deit.

Ha’u haluha atu hakerek iha nota diaria ida ne’e kona-ba notas sira ne’ebé hakerek iha loron 12-2.

[12-2-2007… tuku 8:50 dadeer, bainhira Amor tula ha’u mai servisu, ha’u nota didiak graffiti ida ne’ebé ema balu hakerek iha loron hirak liuba iha didin lolon, besik loja padaria Aru, iha Kolmera. Grafiti ne’e, haklaken hanesan ne’e:

“XANANA PSHT”

Ah, ne’e propaganda polítika baratu ida.

---
[Nota diaria: 13-2-2007]

*) “Simplicity is the best policy,” ema Inglés sira hatete. “Cemerlang dalam berpikir, dan sederhana dalam penampilan”, kolega Felisberto Amaral hatete iha Yogyakarta, iha tinan 1980-tal. Simplisidade ne’e buat furak ida. Hatudu an, lokok an, se kuandu laran mamuk, ita atu manan saida?

*) Ita labele halo buat hotu iha mundu. Ita tenke sukat ita-nia kapasidade atu halo buat ida. Se la’e, ita maka bele sei frustadu tinan bailoru iha moris.

*) “O saber não ocupa lugar “ koresponde loloos ho saida maka ema hatete, “kuandu mais ita aprende, tantu mais ita sinti ita seidauk aprende buat ida.”

[Kalan boot ona. Tuku 11:31…iha kuartu estudu ha’u-nian iha uma Fatuhada, bainhira hein hela Nini hakerek karta ba Ina iha Cuba..]

*) Moris ne’e nakonu ho kontradisaun. Ha’u la hatene tanba sa maka alin balu la konsege haree beleza iha relasaun diak ho Mama?

[Fatuhada, 15-2-2007. Tuku 00:30. Hafoin tiha ha’u ho Amor hala’o serimonia nu’udar feen ho laen nian. Apai toba dukur.]

*) Inan ho Aman terus no kole tebes duni ba oan sira, maibé dala barak inan maka terus no kole liu hotu. [Ha’u lee buat ne’e ba Amor, no nia konkorda ho lia fuan sira ne’ebé ha’u hakerek. Depois ha’u sai mai sala, kontinua hakerek nota sira tuir mai ne’e..]

*) Amor hatete, “menjadi ibu itu memiliki kenikmatan tersendiri, [yang tidak bias dijelaskan dengan kata-kata”.

*) Buat hotu sira iha mundu ne’e inter-ligadu. Hanesan rede labadain nian.

*) Kolega Marcelino dala ida hatete, bainhira ami sei iha Yogya, frekuenta iha universidade, katak “ pengalaman itu penting, tapi harus diriringi perenungan.” Ha’u hatan ba nia hanesan ne’e,” Jadi, hanesan mós ita regula aparellu rádiu. Ita so bele rona emisora rádiu ho didiak bainhira ita dada /afina didiak antena rádiu ne’e.”

*) Todan Estadu nian sei Kaman bainhira uma kain ida-idak iha nasaun
ida bele ona iha kbiit atu lori rasik nia naha todan.

*) Ita Timoroan sira mehi atu haree Timor-Leste sai rai ida ne’ebé prósperu iha tempu ikus mai. Atu to’o iha ne’eba, ita tenke prepara an didiak, loos kala’e?

*) Ha’u gosta tebes filozofia Xina nian—Taoismu: “Ying & Yang” . Ita haree katak, afinal das kontas, realidade moris ne’e, ita bele habadak ba deit símbolu rua ne’e. Buat hotu iha mundu presiza balansu.

*) After all, as what the Beatles said, “all we need is love……"

POEZIA ATUASAUN 1: "SANAK BARAK, SULI BA IDA"

INTRODUSAUN


Poezia ruanulu sira ne’e ha’u uza hodi involve an iha atuasaun poezia iha sidade Dili, iha fulan Maiu tinan 2005, ho tema “SANAK BARAK, SULI BA IDA”.Ha’u ho ha’u-nia belun, pintor Indonezia, Yahya Lambertz maka atua hamutuk poezia hirak ne’e. Nia halo pintura ho estilu espresionista bainhira ha’u lee poezia hirak ne’e ho lian tolu: Indonezia, Tetun no Ingles.

Nu’udar esperimentasaun ida iha ami-nia atuasuan ida ne’e. Ami hetan antuziasmu diak hosi audiensia sira.

Ha’u hein katak poezia sira ne’e, iha tempu badak sei mosu iha forma livru.

Ha’u hein loos komentariu literariu ne’ebe kritiku ba ha’u-nia obra hirak ne’e.

K’manek literariu,

Abé Barreto Soares

Dili, 15 Fevereiru 2007


--------------------

MANU DAME NIAN

Ai, manu falur murak, manu dame nian
O iha ne’ebe?
Ai, manu falur murak, manu dame nian
Maka iha kbit semo as tebes
O iha loos ne’ebe ona?
Ai, manu falur murak, manu dame nian
Atu semo mai
Rani iha ne’e, rani iha ai hali bo’ot ida ne’e nia leten
Maka mahon furak
Ho aisanak Oliveira
Maka naktabar metin
Iha o nia ibun tutun
Ai, manu falur murak, manu dame nian
Ha’u la tahan ona atu hein fali
Hodi rona o nia knananuk Jerusalem nian maka ksolok no furak tebes!
---
2003-2005


KRUZ MAKA AMI TULA IHA KABÁS

Ami hakat, lori kruz
Iha dalan klaran, ita monu, no monu fali

Iha Kalváriu nia tutun,
roman nabilan haman naha odan maka ami lori
La ho laran tomak
---
2005

IN MEMORIAM *) SERGIO VIEIRA DE MELLO

Bandeira rin ida ita bo’ot harii
Iha rai Lafaek maka maran no la bokur

Anin hu’u maka’as
Bandeira maka hasa’e

Ita bo’ot fó kontinensia

Ita bo’ot hakiduk

Ita bo’ot mós hakmatek iha ninin
---
2003-2005

*) Eis Xefe misaun ONU iha Timor-Leste, UNTAET hosi tinan 1999-2002 (matebian), ne’ebé mate iha Irak (tamba bomba) iha fulan Agostu 2003.

**)Tuir ainanoik rai Timor ne’e transformasaun hosi lafaek ida.


BAGHDAD KANEK NAKLÉS

Baghdad kanek naklés,
Baghdad monu tun, k’bit laek!
Baghdad laran baruk, hariis ho ran!

Baghdad nia kanek, ita hotu nia kanek!
---
2003-2005

BAYONETA IDA TIDIN HARII

Bayoneta ida tidin harii!


Kasihan bei lafaek,
Isin monu ba rai, ibun nakonu kaben mutin,

Bei lafaek nia ibun bok aan tun, bok aan sa’e:
“ha’u sala sa?
sala ha’u nia saida?”

---
2002-2

BATINA MUTIN

Batina mutin
Rai rahun kaer
Batina mutin ran kafuak naktabar:
Hasán oferta sakrifisiu

Batina mutin oras ne’e,
ema tolok rahun,
Batina mutin oras ne’e
Ema lees rahun,
Ema sama
No ema so’e tiha
---
2005

LÁGRIMAS DO XANANA (XANANA NIA MATAN BEN)

Xanana nia matan ben,
Manas no na’isi

Nakfilak aan sai mina manas


Hamamar kanek bubu
---
2002

PONTE KAIS DILI

Fatuk ba’e, fatuk ahu ruin,

Laloran tasi maka ki’ik, ahi oan sira nia naroman,
Hada’u malu atu hakotu lia, marka sira-nia pozisaun:
Ha’u maka ne’e, iha ne’e ha’u eziste
---
2002


HA’U MAKA FATUK KI’IK ITA BO’OT TUDA
(Meditasaun Rai Nakaras Nian)

“wainhira moris nia instrumentu múzikal tomak sei atu toka, maka Ita Bo’ot nia liman mós sei atu hamusu knananuk domin nian.”
Rabindranath Tagore

Ha’u maka nu’udar fatuk ki’ik ne’ebé Ita bo’ot tuda ba iha bé kolan mos furak ida

Ha’u mout ba bé kidun

Teki-tekis husik hela laloran ki’ik, neneik-neneik hakbesik ba bé kolan ninin

Loron matan nakaras
haklakekn nia nabilan,
rei bé kolan nia ibun kulit

Laloran k’ik maus
hamosu furin
Laloran ki’ik maus
neneik-neneik halakon sira-nia aan
---
2002-2005

IHA FOHO OAN SIRA- NIA LETEN MAKA MARAN

Kruz sira nabilan
Iha foho oan sira nia letan maka maran

Ran matak suli,
Habokur rai fehan

Dubun foun sira mosu buras,
Haklaken morin lalehan
---
2005


DEZEMBRU TINAN HITU-NULU RESIN LIMA (PARTE 1)

Dili nakedar
Dili laran tauk

Dili laran rua-rua
Atu hakt ba oin

La’o tuir ain fatin liberdade nian

---
2002-2005?


DEZEMBRU TINAN HITU-NULU RESIN LIMA ( PARTE 2)

Ha’u-nia diginade ema sama
Ha’u nia dignidade ema kesi metin ho aljema

Ha’u hateke
ho tauk-tauk

Ha’u atu ko’alia
sai la sai
---
2002-2005?

*)NICOLAU LOBATO

nakukun kesi metin ami
nakukun falun metin ami

ita bo’ot maka naroman leno borus
ita bo’ot maka naroman doko harahun

ho neon metin ami hamarik
ho neon metin ami hakat ba oin
ho neon metin ami simu

anin furak nanirin

---
2003-2005?

*) Lider rezisténsia Timor-Leste nian,ne’ebé mate iha funu laran hasoru tropa Indoné zia iha tinan 1978.



PAPÁ

Papá la’os anju. Papá nia faru
nakonu ho tahu. Papá monu taka rabat

Husu ita lolo perdaun
---
2003-2005?

*)MANATUTO

manatuto: ha’u nia abut
tuba metin ba rai

ha’u nia sanak sira lolo buras

ha’u nia dikin sira prontu atu nani,
hakat tuir ba mundu rai klaran nia kintu ho kantu

---
2004-2005

*) Ha’u nia Papá nia moris fatin.


SETEMBRO NEGRO

Uma rin sira hamarik hela
Uma rin sira rahun namakari

Hamosu testemuña sira maka monok,
Haklaken istória sira laran susar nian
---
2004-2005


LISBON: SEKILAS SKETSA
(LISBON: A SKETCH AT GLANCE)

terik mentari
membakar wajah kota

[rindu dendam
berebut ucap,
berebut cakap,
berebut pentas]

mondar-mandir wisatawan
mencari nikmat

[aku:pemulung fosil-fosil jaman kita; I am the collector of the fossils of our era,
aku, warga buana melancong tak berujung pangkal;I am a citizen of the world; wandering around without any destination]

tak kencang bertiup angin
sejuki wajah kota yang semakin menua

[timor-lorosa’e yang hancur lebur
laksana seekor pheonix mengepak-kepak sayap-sayapnya
dari dekapan sisa-sisa abu,
dan terbang lagi,
sangat meninggi
menerobos batas-batas cakrawala; timor-lorosa’e was completely destroyed, completely crushed,
like a pheonix clapping its winds from the rest of dust, and flying again really high]

sore beranjak tiba
seorang bocah cigano
mengamen dengan akordion mungil
meminta belas kasih
anjingnya kurus kering
setia menemani


[ah, tamba sa maka sempre iha lakuna entre ema riku no ema kiak sira? tamba sa? why is it that there are always gaps between “the haves”
and the”haves not”? why?]

di praça do comercio
tampak ada tertulis di dinding tembok; in praça do comercio, there was a graffity on the wall saying,
“MORTE AO IMPERIALISMO!
CLINTON, GO HOME!

[rupanya Pam Sam
dan tetek bengeknya
tak mendapat tempat disini; it seems like Uncle Sam and his various kinds of things are not welcome here]

fado beralun, sayup-sayup terdengar
dari mulut wanita setengah baya, bergigi ompong
menyambut senja,
sebentar lagi turun
selimuti
wajah kota lisbon ; fado was heard from a distance, sung by an old lady, being toothless
welcoming the evening
which soon came, covering the face of Lisbon
----
2000-2005


HA’U MAKA BIBI ATAN, IMI MAKA BIBI OAN SIRA

Ha’u maka bibi atan
Imi maka bibi oan sira

Kolen todan fai imi nia fuan ho neon
Kolen todan tuda hamate imi

Iha ne’e, ha’u hein imi atu hakat mai

Iha ne’e, ha’u hein atu hamaus imi-nia kolen todan maka mosu la oras-la oras
---
2005

HA’U –NIA NONOK

Ha’u-nia nonok
Ema interpreta oin-oin

Ha’u-nia nonok
Nu’udar deit protestu ida:
Ha’u lakohi ema bobar ha’u metin
---
2005

ERNESTO “CHE” GUEVARA

Fitun Latina
Nabilan iha rai sabutar


Fó roman ba dalan leut sira
---
1997-2005

ENSAIU LITERARIU 4-ARKIVU

(KOMENTÁRIU KONA-BA JOSÉ BORGES ALIAS TOZÉ NIA KRÓNIKA SIRA)

Hosi *)Abé Barreto Soares


Foin lalais oan ne’e, ha’u simu ho haksolok konvite ida hosi Belun José Borges alias Tozé liu hosi e-mail atu hakerek netik komentáriu oan ruma kona-ba krónika sira ne’ebé nia hakerek kona-ba Timor-Leste, no nia viajen hosi Portugal ba Timor-Leste.

Oras ne’e dadaun bainhira hakerek komentáriu ida ne’e, ha’u mai pasa ha’u-nia ferias iha Bali ho ha’u-nia kaben ne’ebé oras ne’e ko’us hela kosok oan ida iha nia isin alias isin rua fulan neen ona.

Hafoin tiha lee hotu horiseik loromanas belun Tozé nia kolesaun krónika sira ne’ebé nia haruka mai iha pixina ibun BaliSandy Cottages nian, ha’u iha lia fuan oan ruma atu hato’o maka tuir mai ne’e:

-Hanesan eskritór,Tozé buka atu haktuir mai ita ninia viajen fíziku no metafíziku. Nia konvida ita atu hala’o viajen hirak ne’e ho nia. Nia konvida ita atu luku kle’an iha mundu Timor-Leste nian, ne’ebé nia rasik hetan tiha ona esperiensia durante nia tempu badak hela Timor-Leste hanesan profésor universitáriu ida iha Universidade Timor-Lorosa’e.

-Durante nia tempu ne’ebé badak iha Timor-Leste, nia konsege tama oituan iha mundu imajináriu Bei Lafa’ek (Avô Crocodilo) nian. Nia konsege hasai netik fotografia oan balu hosi nia krónika sira ne’e. Nia konsege pinta imajen balu Timor-Leste nian ho nia lia fuan sira. Ho nia lia fuan sira ne’e, Tozé aprezenta nia an hanesan ’viajante, fotógrafu no pintór poétiku’. Hanesan Timoroan ida ne’ebé gosta halimar iha ambiente literáriu, bainhira lee Tozé nia krónika sira ne’e, ha’u sinti ba hanesan hetan kolan poétiku ida ne’ebé moos furak. No, ha’u la baruk atu haksoit tun ba iha bee kolan ne’e nia laran, no nani avontade. Ha’u sinti fresku.

Atu oituan ka barak, Tozé, ho ninia kbiit ne’ebé nia iha, haka’as an pinta tiha ona imajen Bei Lafa’ek nian, no hatudu tiha ona mai ita. Ha’u hein katak nia sei la baruk atu pinta tan imajen Bei Lafa’ek nian iha tempu ikus mai ho nia lia fuan oan sira nee’ebé furak. Ha’u fiar katak nia sei halo buat nee’e tanba ha’u haree katak Tozé ne’e nu’udar ema ida ne’ebé hamalaha no hamrok atu halo bebeik esplorasaun iha mundu imajináriu.

Ha’u-nia amizade ho nia hanesan ”men of letters” foin maka hahú foin lalais iha tinan ida ne’e. Husu boot fini amizade ne’ebé ami kuda tiha ona ne’e sei buras iha tempu ikus. Maski ami foin maka hatene malu, maibé ha’u sinti katak ami nain rua hatene malu kleur ona. Ne’e tanba ami komunga óstia ida deit hanesan ’men of letters” –óstia poétika.

Ikus liu ha’u hakerek hatete katak, ”It is not how long we make friends that it counts, but it is how”, loos ka la’e Belun Tozé?

***
Kuta, Bali, 20 Jullu 2006

*)Poeta/Tradutór/Intérpretu

AFORISMA DIARIA [14-2-2007]

Loron Valentinu, Ba Ha’u, Loron Bain-bain

[Tuku 7:30 kalan. Iha eskritóriu foun. Foin muda mai iha ne’e ohin lorokraik tuku 3. Foun-foun ha’u muda hosi ha’u-nia kuartu 104, no ba hamutuk ho maluk tradutór/interpretu sira seluk, ho lideransa ha’u-nia Xefe, Vera Mixtro iha edifisiu K-4 Room 2-3 iha loron 25-1, se la sala.

Ha’u-nia ulun fatuk maka moras ne’e lakon hafoin tiha ha’u ho João da Silva ba han tiha soto ayam ida iha Tropical Bakery, restorante ne’ebé ladok hosi ha’u-nia eskritóriu. Ami ba han maisumenus tuku 6:40 hanesan ne’e. João han ‘nasi uduk’.

Ami dada lia kona-ba orasaun, kona-ba sasan oinoin tan.

Bainhira atu han dadaun, Odilia maka ohin tuur kaleur ona iha ne’eba hatete, “Wah, Hari Valentine begini, bareng sama pasangan ke…”.. Ha’u hatan, “ah, bagi saya, setiap hari pun hari istimewa..”.

*) Ba ha’u, hala’o orasaun ne’e maka bainhira ha’u hanoin kona-ba halo diak ba maluk sira.

*) Iha moris, ita sempre enfrenta “muda hosi fatin ida, ba fatin ida seluk”. Ita, dala ruma, la sinti kona-ba buat ne’e.

[Ha’u haree ema balu, tanba deit tuir moda atu selebra loron Valentino, husik sira-nia an mout iha ‘mood selebrasaun nian maka, dala barak, laiha substansia liu’….]

*) Diak liu ita uza tátika “zig-zag” bainhira hakat liu mota moris nian maka nia bee tun makaas, hodi nune’e ita sei la mout.

***

Esperiensia: Mestre Diak iha moris

[Ohin dadeer, tuku 8:45 molok atu tama eskritóriu, ha’u dada lia lalais oituan ho alin oan rua: Agostinho ho Atanasio maka oras ne’e servisu nu’udar durubasa hamutuk ho tropa Asutralianu sira. Atanasio dehan, “Maun ita presiza ‘pengalaman’ iha moris, se ita laiha ‘pengalaman’, ne’e susar”. Ha’u hatan katak, “ema dehan katak, esperiensia ne’e mestre diak liu hotu iha moris. Presiza ita halo balansu entre edukasaun tolu ne’e: formal, informal no non-formal.” Ha’u promete ba sira katak, ha’u sei hatama pontu konversa ne’e iha nota ‘blog’ ida ne’e. Atanasio mós oras ne’e, ha’u konvida lee ha’u-nia ‘blog’.

Iha loron hirak liu ba, ami nain tolu mós dala lia kona-ba panfletu ilegal ida ne’ebé oras ne’e sirkula hela iha Dili, ne’ebé buka atu estraga imajen Xanana nian. Iha konkluzaun konversa ne’e, ha’u hatete, “husik ba tempu maka to’o ikus fó sai, no tetu buat ne’ebé loos no sala.”

Ha’u haksolok haree labaraik klosan nain rua hanesan sira, ne’ebé enerjétiku hala’o servisu, buka vida, prepara loron aban maka sei to’o tan mai, ho nia mutin ho metan, ne’ebé seidauk hatene loos.

***
[Tasi Ibun Kampung Alor, ohin dadeer, tuku 6:55. Iha Fatu Ahi tutun, ita haree loron matan nabilan furak. Tasi atu maran. Hakmatek loos. Tasi been moos furak.]

*) We can’t keep on living a lie.. Kebohongan, bagaimanapun, suatu saat akan ketahuan..

[Meditasi Laut….]

*) Ita bele harii altar ida halo metin ba beibeik iha ita-nia fuan ho neon. Iha altar ne’e, ita sunu ahi oan lilin domin. Husu boot ahi oan ne’e leno fatin sorin-sorin, ne’ebé nakukun.

[Rona tasi nia lian!.. Rona tasi nia bisu-bisu.. Rona tasi nia halerik….]

[Tasi… Ha’u hanoin aisasik iha Manatuto, ne’ebé ema halimar bainhira ema ruma mate. “Ferik ida hahaek loron, hahaek kalan. Saida maka ne’e?”

[Bainhira meti maran, sei kiik iha Aiteas, Manatuto, ha’u hadeer sedu deit, ba kaer ikan oan no tasi kutun seluk. No ba kee barata. Dala ruma Bati ho Zinha maka gosta halai tuir ha’u. Barata mesak boboot. Lori ba uma, daan, halo modo hodi han ho sasoro….]

*) Keta haluha, [hanesan Timoroan] katak ita ne’e sai hosi hun ida deit.

[Bainhira tasi sa’e ona, ha’u mós hakail. Ikan ronkador no koku maka gosta han kail. Dala ida ha’u hakail bainhira tasi sa’e iha meti laran. Hetan ikan oinoin. Haksolok loos.]

[Tasi—iha kbiit tomak, fase nia ibun halo halo momoos.

Tasi—iis matak. Laloran baku ba ninin. Rai henek bokon.]

Tasi, hanesan ha’u hatete tiha ona fila-fila, halo ha’u la baruk atu akompaña nia ritmu, no rona ha’u-nia fuan hananu, “ what is the purpose of living in this Earth?”

[Ita-nia ain leut ita husik hela iha rai henek bokon nia leten. Laloran baku mai tasi ninin, hamoos tiha ita-nia ain leut sira ne’e. ]

***

AFORISMA DIARIA [13-2-2007]

*) “Mori took mate, mate took mate nahatik,” Ama Eve dala ida hatete ho Galole. Se la sala iha Aiteas, iha tinan 1980-tal. Ha’u haree ba katak, Ama Eve, ho nia simplisidade pensamentu, hakarak espresa deit katak, diak liu ita lalika mangame tun, mangame sa’e atu hala’o moris ne’e.

[Ohin loromanas ha’u ba han loromanas iha Bekusi. Hasoru Mana Zinda, Bati, Noi, Enty ho sira seluk iha ne’eba. Sira ajuda tula sasan ha’u-nian maka rai hela iha uma Usindu III. Sasan bou loos iha sala vizita.

Mama maka fadigadu loos halot ha’u-nia ropa sira no sasan sira seluk.
Entre sasan sira ne’e, apa nia sasan mós iha.]

[Data ba eleisaun Prezidente Repúlika fó sai tiha ona katak sei hala’ o iha loron 9 fulan Abril 2007. Ha’u rona katak ema kuaze nain sia maka aprezenta an ona atu sai kandidatu. Ida maka katuas João Carrascalão, Prezidente UDT.

Prezidente Xanana hakarak deskansa ona. Iha loron 24-1 liuba, ha’u hakerek nota kiik oan ida, bainhira refleta kona-ba figura Xanana nian, hanesan tuir mai:

--LIA FUAN PREZIDENTE IDA NIAN –

/Tempu to’o ona, ha’u tenki hakiduk/

/Hodi fó fatin ba ema seluk/

/Ha’u kumpri ona
Ha’u-nia mandatu—
Ukun tuir Lei Inan haruka/

/Hosi dook, ha’u sei tuur hateke
Hosi besik, ha’u sei tuur rona/

/lala’ok moris nasaun sai loos oinsá/

---

*) Ha’u admira ema Japonés sira. Depois Funu Mundial II, sira hamrik fila fali hosi rahun uut, no hadeer, hodi hadi’a fali sira-nia rain. Ohin loron, ema hotu hatene katak Japaun sai ‘jigante’ ida iha mundu, kuaze iha aspetu barabarak. Nia segredu saida? La seluk, la leet: servisu maka’as. Timor-Leste mós tenke tuir ezemplu diak ida ne’e.

AFORISMA DIARIA [12-2-2007]

*) Ha’u-nia inan nu’udar ha’u-nia mestra boot ida iha ha’u-nia moris. Nia nu’udar fundu ba ha’u-nia inspirasaun. Nia nu’udar bee matan, ne’ebé nunka maran. Nia hanorin tiha ona mai ha’u kona-ba oinsá atu tahan hasoru susar iha moris.

[Mama buka atu rona bebeik ha’u-nia programa poezia liu hosi RTL ho títulu Anin Naniri iha Domingu kalan kada fulan. Nia jestu ida ne’e fó motivasaun liu mai ha’u atu ativa liutan iha mundu literáriu. Dala barak mós ha’u tenta lee lia murak hirak ne’ebé ha’u hakerek liu hosi telefone ba nia bainhira ha’u iha eskritóriu ona.]

*) Ha’u-nia Papa, bele dehan, nu’udar 'Maromak nia bibioan' ida. Nia fó nia an tomak hodi halo sakrifisiu ho nia mate. Nia mate tiha maka familia boot rua—Barreto no Soares diak malu fali, hafoin tiha iha tinan barak nia laran at malu.

AFORISMA DIARIA [11-2-2007] 2

DILI LA HAKMATEK, DILI TAUK, ATU HAKAT PASU BA OIN, HASORU LORON ABAN

(Diáriu lia nain nian ida)

[Tasi Ibun Palasiu Governu oin. Rai atu nakaras ona. Tuku 6:40. Ema mai hola anin iha jardim. Ha’u mai ho kareta Vitara metan. ]

[Azinha, Bati, Mana Zinda, nia oan sira no mos ho Enty atrapalladu tanba ema rungu-rungu iha Usindu III ohin tuku 4 lorokraik. Agora sira evakua ba Noi sira iha Delta I. Sira labele ba tau aifunan hamutuk ho ami iha Santa Cruz iha loron hakoi Papa nian..]

[Apai—Habas-Teo foin ba dala uluk ami lori ba rate. Nia tanis tanba manas. Micha, Alai ho labarik sira mai ho Mama to’o uluk rate. Mama dehan ohin Cece halo tinan 8 loloos.

[Ohin dadeer ami (ha’u,Amor, Habas ho Sulasti) ba pasiar iha Arreia Branca. Ami matabixu iha Cash Bar. Manas halo Apai la tahan…]

[Ohin loromanas, durante oras rua nia laran, kolega Bernardino rua-rua ajuda ha’u tula sasan ha’u nian hosi eskritóriu ba uma Fatuhada…]

[Loron hirak liuba, ema tau tiha ona lampu tranzitu iha kruzamentu iha dalan boot sira iha Dili. Ha’u triste atu haree maluk sira—ho taxi no motor la respeita sinal tránzitu bainhira lampu, tuir loloos sira para…]

[Laloran tasi. Kareta barullu. Obras hadi’a jardim iha Palasiu nia oin seidauk hotu…

[Tuku 6:50 lorokraik

[Ha’u hasai foto balu ho ha’u-nia kamera. Ha’u goza ha’u-nia “solitude” iha ema rame sira-nia leet.

[Ohin iha loja Lita ha’u hasoru Mana Armandina Gusmão, nia oan feto Priscilla no mós nia katuas oan, Gil Santos. Ami dada lia oituan kona-ba planu atu publika hamutuk livru poezia. Nia hasee Hahas ho nia inan. Nia dehan, Habas hola barak liu nia inan nia oin…]

[Tuku 6:53…

Loromatan mean. Atu monu dadaun. Ha’u dúvida atu hasai foto…

[To’o ikus ha’u hasai duni. Dala rua. Tuku 6:56.. Iha sorin besik, ha’u rona ema feto ida ko’alia ala ema Kupang..]

[Konflitu iha Timor-Leste nunka mais hotu deit. Ikus-ikus ne’e, konflitu mosu entre arte marsial sira. La hatene iha tempu besik mai ne’e, sa konflitu tan maka atu mosu?

Agora konflitu entre ema Lorosa’e no Loromonu para ona.

[La hatene, Timor-Leste ne’e hetan kastigu ruma ka?]

Langit Barat merah jingga
Lembayun……

[Dili oras ne’e la hakmatek. Dili tauk.. Dili nakdedar. Atu hakat pasu, la hakat…..hasoru loron aban.

[Ha’u triste haree mós labarik foin sa’e sira maka sidauk iha konsiensia kona-ba “kebersihan lingkungan”. Ha’u haree sira hemu hotu tiha, aqua fatin mamuk so’e arbiru deit iha jardim laran. Ah, figura triste!....]

[Bainhira loos maka Dili oan sira bele iha lalais konsiensia kona-ba “kebersihan lingkungan”? It is a long way to go, my friend!...]

***

[Uma Fatuhada, tuku 11:34 kalan ona..depois haree filme “Akibat Kawin dan Hamil Muda”…..]

*) Ita tenke la bele buka deit atu tolan buat midar, maibé mós tolan buat moruk moris nian.

*) Tein etu, tein halo didiak. Tenke ho kuidadu, se la’e etu sai fali sasoro.

*) Arependimentu sempre mai ikus…

AFORISMA DIARIA [11-2-2007] 1

--Papa Nia Loron Mate--

[Tasi ibun Fatuhada-Marconi. Besik Tuku 7 ona. Foin halai oituan iha rai henek leten. Molok atu mai tasi, ha’u buka halimar, dada lia ho Habas ala bebé.Papa nia loron mate horiseik. Tinan tolu fulan rua Papa la’o hela ami oan sira, hakat ba mundu seluk.Hanesan fulan-fulan, hafoin Papa mate, ha’u buka halo nota reflesaun kona-ba Papa no haruka ba alin mane no feton sira. Ba fulan ida ne’e nian, ha’u haruka tiha ona horikalan. Nota ne’e ha’u hakerek iha loron tolu liuba. Maka ne’e:

IN MEMORIAM PAPA SEBASTIÃO/ papa/matadalan/ hatudu hela sinal/ “hosi nakukun, ita hetan naroman/

Papa: abut ida maka tuba rai metin.

Horikalan ha’u simu komentáriu hosi Tiu Padre:

“Unidas na oração ao Senhor pq meu cunhado irmao descanse em
Deus e intercede por nos.”

[Tuku 7:13. Loromatan sa’e ona, hosi nia subar fatin. Agora nabilan
malorek….]

[Tuku 7:40. Ha’u tuur iha aihun mahon ida, besik ró ai ida, pinta koor
mean. Ró ne’e rai baku fila. Seidauk halo hotu….]

*) Iha “Sagrada Eskritura” relijiaun boot sira iha mundu ne’e, ita hetan
buat buat barak kona-ba sabedoria moris nian. Keta baruk atu lee, no buka
atu refleta kona-ba testu hirak ne’e.

[Tasi Ibun X-tu Rei. Tuku 8:20 dadeer. Ho Amor, Habas, no Sulasti, ami-
nia babysitter.Sira mai tula ha’u ho ami-nia kareta metan, Vitara, ne’ebé
foun-foun ami sosa, nia koor matak.. Ami lori mákina fotografia, maibé
la konsege sosa rolu, ne’e duni la hasai foto ruma….]

*) Labarik sira nu’udar ita-nia riku soi. Sira maka sei hatutan no habelar ita hotu nia moris iha nasaun Timor-Leste, ne’ebé livre no independente.

AFORISMA DIARIA [10-2-2007] 2

[Fatuhada. Tuku 11:39 loro manas. Uma oin. Rileks iha ai hun mahon. Foin primeira vez, rileks hanesan ne’e depois fulan hirak nia laran mai hela iha Fatuhada, besik banin sira.. Rona mós ho muzika hosi album Tracy Chapman nian, “Telling Stories”.]

*) Beleza moris nian mosu barak-barak iha ita-nia leet. Dala barak ita maka matan delek resin atu apresia beleza sira ne’e.

*) Psikólogu sira dehan katak, múzika ne’e ita bele uza mós hanesan terapia hodi kura moras mental.

[ Habas—Apai-Teo, ha’u-nia oan mane, ne’ebé moris iha loron 31-10-2006 gosta rona múzika instrumentalia. Dala ida ha’u toka múzika instrumental ne’eb’e sentimental oituan, nia rona, nia laran dodok, no nia atu tanis sala-sala…]

[Tasi ibun Palasiu Governu nia oin. Tuku 4:56 lorokraik ona. Anin furak. Ha’u tuur iha banku jardin ne’ebé foin halo. Ema barak mai tuur iha ne’e, hola anin. Lakaleur, ha’u haree Adei, Noi nia oan mane, ne’ebé mós nu’udar ha’u-nia oan sarani mai hola anin ho nia kolega. Ha’u maka hasé uluk nia. Nia la haree hetan ha’u. Nia mai kedas kumprimenta ha’u, no tuur iha ha’u-nia sorin kaleur oitaun. Bainhira halo hela reflesaun, ha’u mós buka atu fó oituan moral ba nia…]

*) Slogan ne’ebé hatete katak “paz sei laiha karik laiha justisa” oras ne’e dadaun relevante tebes ho situasaun iha Timor-Leste ne’ebé enfrenta hela krize ne’eb’e seidauk to’o rohan deit ne’e. Oras ne’e, povu hein hela tebes kona-ba justisa.

[Poeta Pablo Neruda, ne’ebé mosu ho nia obra sira—ode, kanta. Nia reprzenta mundu Latinu…]

[Illa Ataúro hateke moos. Kareta, motor lian. Múzika lian, rona hosi dok. Lahatene, ema konsertu karik iha Kampu Demokrasia….]

*) Ho imajinasaun eskritór/a sira buka atu esplora ita ema nia moris, ne’ebé nakonu ho mutin ho metan.

AFORISMA DIARIA [10-2-2007] 1

[9-2-2007..Obrigado Barracks…….]

*) Xanana, Ramos-Horta, Bispo Belo no lider seluk-seluk Timor-Leste nian mesak sei labele halo milagre hodi kria dame iha rai laran. Ita hotu hamutuk hanesan Timoroan, maka bele halo buat ne’e.

[Bainhira iha eskritóriu, rona liu kolega Moises fó hela moral ba nia membru familia ida hosi konversa telephone iha tuku 9 kalan…]

*) Bainhira ita boot ona, ita tenke sai ema ne’ebé independente.

*) Vida ne’e nu’udar luta ida ne’ebé sei la para bainhira ita sei dada iis iha mundu rai klaran.

[Farol, Mercusuar, 10-2-2007. Tuku 7:39 dadeer. Hafoin la’o hosi tasi ibun Fatuhada-Marconi nian….]

“Tasi: Símbolu Liberdade”

Ha’u gosta tebetebes pasa tempu mesak-mesak iha tasi ibun. La’o iha rai henek leten ne’ebé bokon. Liuliu iha dadeersan molok loromatan atu mosu, no mós iha lorokraik bainhira loro atu monu dadaun. Laloran kiik baku ba tasi ninin. Halo nia lian. Hanesan orkestra ida: orkestra natureza. No mós ha’u gosta apresia tebes beleza “solitude” nian, bainhira ha’u tuur iha rai henek maran leten, hateke tun ba tasi.

Dala barak ona maka ha’u mai iha tasi ibun Dili nian, hala’o buat maka ha’u temi iha leten desde ha’u fila mai rai doben,Timor-Leste hosi mala’e nia rain iha tinan 2000, hafoin tiha iha tinan lubuk ida nia laran “labuk hodi buka loke neon ho fuan”.

Tasi nia hakmatek, fó hakmatek ba ha’u-nia fuan ho neon.

Tasi loke ita-nia neon. Loke ita-nia orizonte. Tasi, ba ha’u, nu’udar símbolu liberdade. Iha sorin-sorin, ita hateke luan, ita hateke dook. Ba leten, ita hateke lalehan.

Tasi mós bele sai nu’udar terápia diak ida ba ita-nia moras mental bainhira ita mai halo reflesaun iha ita-nia solitude.

Ha’u foin ba dala uluk haree tasi nia oin bainhira iha tinan 1975 sama ain iha Manatuto hosi Fohorém. Fofoun haree tasi, ha’u kan lahalimar atu loron-loron deit hariis. Maibé, ha’u-nia Papa ho Mama bandu ha’u atu labele ba bebeik tasi, se la’e bele mout. Sira sei trauma ho ha’u-nia maun boot, Zeca nia mate iha tinan 1972, monu iha pixina Colegio Infante Sagres, Maliana nian.

Furak atu hatene katak eskritór balu ne’ebé, iha sira-nia obra, uza elementu tasi nian. Purezemplu, poeta Libanéz, Kahlil Gibran ho nia livru Sand and Foam, novelista sira Amerikanu, Ernest Hemingway ho nia livru The Old Man and the Sea, no Herman Merlville iha nia livru Mobby Dick. Sira konvida ha’u atu tuir sira-nia dalan leut. La hatene, ha’u iha kbiit ka la’e atu hodi halo buat ne’e.

Ko’alia kona-ba tasi, ha’u mós labele haluha atu temi kona-ba movimentu literáriu Romantismu. Movimentu ne’e mosu ho nia slogan, “Back to Nature”, atu oituan ka barak, fó influenza tiha ona mai ha’u iha ha’u-nia kareira literária.

Tasi nu’udar elementu natureza nian, buka atu fanun ita ema bebeik hodi labele haluha katak

” ita ne’e mai hosi rai rahun, no sei fila fali ba rai rahun”.

******

AFORISMA DIARIA [9-2-2007] 2

[Dadeer tuku 6:59, loron 8-2-2007, atu ba tasi ibun Marconi-Fatuhada nian. Foin ba fali tasi hafoin fulan hira la ba. Fresku. Iha ambiente diak atu halo reflesaun.]

*) Ita-nia pasadu, husu boot, sai beibeik lisaun mai ita.

*) Tuir relijiaun ida hanesan mós ita hakat sa’e ba foho lulik ida. Ita-nia objetiu ida deit, ne’e maka oinsá ita bele konsege sai ba foho ne'e nia tutun. Balu sa’e hosi parte Norte, balu hosi Sul, balu hosi Osidente no balu hosi Oriente. Ita ida-idak iha esperiensia úniku atu konta ba malu bainhira ita to’o ona iha foho tutun.

*) Ha’u-nia belun Abilio no Mariano dala ida haktuir mai ha’u, bainhira konta kona-ba sira-nia professor filozofia Filipina nian ida nia lia fuan, katak “ bainhira iha ona kazamentu entre ita nia fuan ho neon, entaun milagre mós sei mosu”.

*) Tio Orlando, ne’ebé uluk tempu Portugés servisu ho Papa hanesan “guarda-fio”, bainhira ami nain rua, halao viajen hosi Semarang mai Dili iha fulan Outubru tinan 1989, fahe lia fuan murak tuir mai, “pouco com Deus é muito, muito sem Deus é nada” [oituan ho Maromak ne’e barak, barak la ho Maromak ne’e mamuk].

*) Madre Tereza hosi Kalkuta nia lia fuan osan mean ne’ebé ha’u sempre uza iha ha’u-nia reflesaun kona-ba kiak maka tuir mai,”The most terrible poverty in the world is not that people do not have food to eat, clothes to wear and houses to live in but the feeling of being unwanted.”

[Tasi Ibun Marconi-Fatuhada, tuku 7:02 dadeer, loron 9-2-2007:… Laloran tasi baku.Laloran boot oituan. Tuur iha ró ai leten pinta ho koor azul ida. Hateke ba tasi ibun. Hateke hetan Ataúro. Lalehan malahuk. Loro matan sa’e ona. La nabilan furak…..]

*) Atu oituan ka barak, ita hotu sempre rai segredu. Segredu hirak ne’e, balu ema deskobre hetan. Balu kontinua falun an metin nafatin to’o deit ita mate. Ita ho ita-nia Maromak deit maka hatene.

*) Ha’u hakarak hatete katak diak liu ita sai hanesan masin. Maski ema la haree ita, maibé ema sinti ita-nia prezensa, ne’ebé naktabar no subar an iha hahan sira-nia leet.

*) “Ami-nia aman la hela riku soi mai ami, maibé nia rai hela deit liman fuan sanulu mai ami, [hodi ka’er servisu atu hatutan moris]”, Tia Rosa, Avo Laku (Papa nia tiu kiik) nia oan iha loron ida hatete bainhira ha’u sei kiik, hela iha Manatuto.

*) Xave importante ida atu loke odomatan hodi tama ba iha sala susesu moris nian maka hala’o jestaun diak.

*) Moris nasaun ida nian, ha’u bele dehan, hanesan mós ita afina viola talin neen. Talin ida-idak iha nia lian rasik. Talin sira ne’e sei kria armonia ida maka furak bainhira ita la afina tuir padraun ton nian ne’ebé iha. No ema ida ne’ebé atu toka viola ne’e mós tenke ema ida maka hatene toka. Karik la’e, ita sei la rona múzika maka ho armonia, maibé barullu maka sabraut tun, sabraut sa’e deit.

[Iha Kafetaria Obrigado Barracks nian, hein hela atu han kalan. Tuku 6:52 lorokraik. Ha’u husu tiha ona “pork sausage”. Bainhira ohin hakat ba iha counter atu husu hahan, ha’u hasee liu deit alin Micha ho nia kolega, Afrikanu, Awat maka tuur dada lia, no hemu hela….].

*) Moris ne’e estrañu. Dala barak, entre maun-alin, feton ho naan sira rasik, haree malu matan la moos. Ha’u bila an, la hatene tanba saida. Papa ho nia maun alin ho feton sira, dala barak, haree matan la moos. Oras ne’e, moras aat ida ne’e da’et hela ami oan sira. Ha’u husu boot deit katak ami oan sira sei la hada’et moras aat ne’e baa mi-nia oan sira.

*) Eskritór/a sira buka bebeik atu rona saida maka ema Portugés sira bolu “voz interior”. Buat ne’e maka orienta sira bebeik atu hodi hamosu obra ne’ebé kreativu, no bele doko ema nia fuan ho neon.

*) Hanesan eskritór ida, ha’u gosta tebetebes tuur iha ema barak nia leet, purezemplu iha restaurante ka iha kafetária. Ne’e momentu ida ne’ebé furak la halimar ba ha’u atu buka luku klean iha mundu imajináriu literáriu nian. After all, a writer is a single fighter.

[Eskritóriu Unidade Tradusaun, UNMIT bainhira atu hatama dadaun ona aforisma hirak ne’e. Tuku 08:09 ona…]

*) Hanoin beibeik ba katak “mensana in corpore sana”!

AFORISMA DIARIA [9-2-2007] 1

*) Kna’ar eskritor/a ka hakerek nain sira maka halibur fali realidade moris nian ne’ebé namlekar rungu-ranga, no nune’e tiha sira orna fali ho didiak iha palku moris nian. Agora, depende ba ita hanesan leitor/a sira atu intrepreta fali obra sira ne’e ho ita-nia interpretasaun rasik.

*) Poeta/lia nain nu’udar kantór fuan laran nian. Sira hananu, no kontinua hananu to’o sira lian mós maran. Dala barak, ema la rona. To'o sira mate tiha ona maka ema foin hakfodak buka atu hatene liu kona-ba sira.

AFORISMA DIARIA [8-2-2007]

*) Buat sasan ne’ebé iis dois, maski ita rai subar to’o iha ne’ebé deit, maibé loron ruma ema sei horon.

*) Kona-ba sasan hirak ne’ebé ha’u la hatene, diak liu ha’u nonok, taka ha’u-nia ibun, duke ha’u nakdedar an ko’alia, maibé laiha substansia ruma.

*) “Hanesan povu kiik, ami husu boot deit katak ulun boot sira sei la kari raihenek ba ami-nia matan.”, Tiu katuas ida hatete.

POEZIA MENSAL II

*) MATE
Labele matan been turu/
Ha’u la ba ida/
Ha’u iha ne’e nafatin/
Hamutuk ho imi/
Tara mehi sira/
----
Fevereiru 2007

*)Orijinalmente, poezia ne'e ha'u hakerek ho lian Indonezia.

AFORISMA DIARIA [7-2-2007]

[Nota aforisma sira tuir mai ne’e nu’udar kontinuasaun hosi nota sira ne’ebé ha’u halo durante viajen ba Manatuto, iha loron 5-2-2007.]

*) Lia midar, lia murak, lia osan mean haklaken barak tiha ona iha ita-nia dalan moris bainhira ita halo viajen naruk ida ne’e.. Saida maka ita presiza atu halo maka buka atu halibur no halot no orna didiak iha ita-nia pensamentu no sentimentu.

*) Demokrasia katak sa? Demokrasia katak ita konkorda atu diskorda malu.

*) Hala’o demokrasia hanesan mós ita kaer manu oan ida iha ita-nia liman tanen rua: bainhira ita loke liman halo belar, manu oan ne’e sei semo lakon, no bainhira ita buti metin ita-nia liman, manu oan ne’e sei dada iis la diak, no sai mate deit.

*) Haraik an la’ós sai ata ba ema seluk. Haraik an nu’udar virtude ida.

*) Edukasaun tulun ita atu kore ita-nia an hosi nakukun oinoin, ne’ebe falun metin ita. Maibé ita tenki hanoin katak karik la lori nakukun, ita sei la hetan matenek.

*) Fatuk ho ai iha tilun. Keta naran ko’alia tun, ko’alia sa’e.

[Notas hirak tuir mai, ha’u hakerek bainhira hola anin iha jardim tasi ibun palasiu Governu nia oin, tuku 2:30 loromanas, loron 5-2-2007]

*) Buat hotu iha moris ne’e iha nia sasukat rasik tiha ona. Midar liu ladiak. Moruk liu mós ladiak. Hanesan mós kafé no xá maka ita hemu. Susu been mós hanesan nune’e; bee barak liu, ita hemu, ita kabun moras, no susu been barak liu, ita hemu, ita kabun moras.

*) Hanesan artista ita deve barak ba situasaun rungu-runga. Normalmente, iha situasaun sira rungu-ranga maka artista sira hetan maka’as inspirasaun atu hamosu sira-nia obra. Absurdu, loos ka la’e? Maibé ne’e realidade.

[Iha Tropical Bakery, hein hela atu han kalan. Han sop sapi. Tuku 8 ona; 5-2-2007.]

*) Iha mundu globalizasaun ohin loron, ita presiza buka oinsá atu prepara ita-nia an atu sai didiak nasionalista ida, no iha tempu maka hanesan sai internasionalista ida.

[Iha portaun prinsipal Obrigado Barracks. Tuku 9:35 kalan. Hein hela shuttle bus atu fila ba uma.]

*) Atu sai intelektual ida, ita presiza iha laran badinas atu halo pergunta ba bebeik. Presiza kadi bebeik tudik análiz, hodi nune’e ita bele observa didiak realidade moris ne’e nian.

[Bainhira dadeersan tuku 8 resin, loron 6-2-2007, iha kareta leten, aranka ba servisu, hetan boleia hosi Amor-Iam. Ami dada lia.]

*) Atu ko’alia buat ida, ita tenki hanoin uluk maka ita foin ko’alia tanba keta halo, to’o ikus, ita rasik duni maka lambe fali ita-nia kabeen.

AFORISMA DIARIA [6-2-2007]

[ Nota: aforisma sira ne’e ha’u hakerek durante ha’u-nia viajen ba Manatuto, akompaña ha’u-nia xefe sira, hala’o enkontru ho autoridade sira iha ne’ebá iha loron 5-2-2007]

*) Moris no mate kontinua sai mistériu boot hori uluk kedas to’o oras ne’e.

*) Bele dehan katak nu’udar buat ida maka estremu bainhira ha’u dehan katak, diak liu ha’u halo belu ho ema ateista ida ne’ebé iha domin boot ba umanidade duke ho ema relijiozu ida ne’ebé dehan katak fiar tebes ba Maromak maibé nia moris la halo tuir saida maka Maromak nia ukun fuan haruka.

*) Ha’u-nia Papá loron ida hatete, “ Hosi nakukun maka ita sei hetan naroman”.

*). Keta ansi no nakdedar resin atu halo belu ho ema ida. Buka uluk lai atu hatene didiak ema ne’e nia aitahan oin nusa lai.

*) Ita sidi dala ida, ka dala rua hanesan ne’e iha moris, nu’udar buat ida maka normal. Maibé karik ita sidi bebeik mós, ha’u hanoin ne’e hatudu ona katak ita beik teen, no baruk teen.

*). Domin nu’udar lian universal ida, ne’ebé ita la presiza atu traduz ba lian sira seluk.

*) Bainhira ó foin sa’e: mane klosan ka feto raan, keta baruk atu trasa ó-nia mehi oinoin, no buka atu alkansa mehi sira ne’e, tanba aban bain rua ferik no katuas ona, ita sei la arepende barak.

*) Entre realismu idealismu, no pragmatismu, ha’u hili liu maka pragmatismu. Pragmatismu katak, “ plan your work, and work your plan.”

AFORISMA DIARIA [5-2-2007]

*) Labarik sira nu’udar kriatura inosente. Ita tenki buka atu hatudu ezemplu diak ba sira. Ho sira-nia kapasidade ne’ebé sira iha, sira tenta grava buat tomak hotu ne’ebé sira haree, sinti no hanoin.

*) Realidade mundu ne’e la’ós komposta deit hosi buat sira ne’ebé ita bele haree, maibé mós ho sasan hirak ne’ebé ita la haree hetan ho matan.

AFORISMA DIARIA [4-2-2007]

*) De faktu katak iha funu laran durante tinan hirak liubá, ita labele nega katak ita iha mata-dalan ida ne’ebé dada ita maka’as atu hakat ba ukun an. Maibé mata-dalan ne’e mós labele hanoin, ho ulun toos, katak nia mesak deit maka halo buat hotu hodi ita, to’o ikus, kore an hosi tali opresaun kolonial nian ne’ebé bobar metin ita, iha tinan 1999.

*) Istória sei la baruk atu hakerek realidade tomak nia mutin ho metan objetivamente. Ita deit maka dala barak, iha tendénsia, tanba deit ita-nia interese balu, buka atu kria fali konfuzaun barak-barak.

AFORISMA DIARIA [3-2-2007]

*)Matan moris ho neon nain ho ema ida ne’ebé hakbesik ó no haktuir ba ó kona-ba maluk sira seluk nia hahalok aat, tanba ema ne’e mós sei kan atu haktuir ó-nia hahalok aat ba maluk sira seluk. Maluk ne’e hanesan mós lori bani been iha nia liman sorin, no lori buat moruk iha nia liman karuk. Ita bila aan, la hatene atu simu loos maka ida ne’ebé.

*) Ita dala ruma iha tendénsia atu ko’alia buat boot-boot deit, maibé ita haluha tiha ona katak buat kiik-kiik sira mós iha poténsia atu kontribui ba ita-nia moris diak iha mundu rai klaran.

*) Atu halakon kiak ne’e susar, maibé ita so bele deit hamenus. Iha sosiedade ne’ebé deit, presiza klase média ida ne’ebé iha kbiit, hodi nune’e klase ne’e sai jambata atu hatutan entre ema riku no ema kiak sira.

AFORISMA DIARIA [2-2-2007]

*) Kilat lia nain nian maka lia fuan. Ho lia fuan, nia tiru fuan no hanoin. Nia hein katak nia tiru ne’e kona borus loos, hodi nune’e ema sira bulelu iha konsiénsia ba an rasik.

*) Atu hanorin ema atu sai matenek, dalan diak ida atu hanorin maka liu hosi ita-nia ezemplu rasik.

AFORISMA DIARIA [1-2-2007]

*) Inan nia kabun laran, nu’udar fatin lulik ida. Ita oan sira luut lisuk iha fatin ne’e iha fulan sia nia laran. Iha fatin ne’e, ita hetan matak-malirin, iha fatin ne’e ita hetan kbiit molok ita hakat sai mai liur, hola anin fresku iha mundu rai klaran.

AFORISMA DIARIA [31-1-2007]

*) Susar tebes ba ita atu rekoñese ita-nia sala, no dala barak ita gosta liu atu hatudu liman ba ema seluk. Ita haluha tiha ona katak, bainhira ita hatudu liman fuan ida ba ema seluk, ita-nia liman fuan tolu hatudu hela mai ita.

*) Haraik an maka bele halo ita iha kapasidade atu haree borus konfuzaun tomak iha ita-nia moris.

*) Lider loloos ne’e maka ema ida ne’ebé sai mata-dalan ba maluk sira ne’ebé la’o hela iha nakukun laran.

*) Lider loloos ne’e maka ema ida ne’ebé sai hanesan bibi atan diak ida ba ninia bibi oan sira.

*) Lider loloos ne’e maka ema ida ne’ebé sai mahon; hanesan mós hali hun boot ne’ebé fó mahon ba ema botu bainhira ema tuur ka hamrik iha nia okos, no hola hela anin freska bainhira loromanas.

*) Moris nu’udar funu konstante atu mantein ekilibru. Ne’e maka nu’udar arte moris nian.

*) Bainhira ita moris iha mundu ne’e, ita sempre involve an iha funu entre buat diak kontra buat aat. Fofoun buat aat sempre halakon buat diak, maibe to'o ikus, atu halo nusa mos, buat diak sempre manan. Ne'e la'os novidade foun ida.
---
*) Inan-aman nia lia fuan: lian osan mean. Halot halo didiak.

*) Ita ema la’ós tuur-tuur boot kedas ona. Kala iha ema balu maka hakiak no tau matan ba ita to’o ita boot. Foti matan hela ba ema sira ne’e bainhira ita hetan moris diak ona.

*) Loron aban, sedu ka tarde, sei to’o tan mai ita. Mai ita prepara an atu hasoru loron aban ho fuan no laran tomak.

*) Ó-nia moris folin laek bainhira ó la fahe ho ema seluk.

*) Keta haluha ema maka uluk hamaran ó-nia matan been bainhira ó tanis iha uma tatis tanba monu ba susar.

*) Mama nia lia fuan: “Bainhira ha’u sei moris, ema uma leten (Mama refere ba Ama eve sira) maka ha’u lakohi imi oan sira nega sira-nia favor. Maski aban bainrua ha’u iha ona mundu seluk mós, ha’u sei haree tuir imi-nia lalaok.

*) Keta lokok an resin. Lokok an folin laek. La manan buat ida.

*) Dala barak Mama dehan, “ Karik ha’u-nia aten ne’e maka ha’u bele ko’a ba imi oan sira, ha’u sei bele halo buat ne’e. Maibé, pena maka ha’u labele halo buat ne’e. Ha’u husu deit atu imi oan sira atu han iha ha’u-nia bikan laran, hodi nune’e imi-nia aitahan sei bele hanesan ho ha’u-nian."

AFORISMA DIARIA [30-1-2007]

*) Domin hahú hosi uma laran. Nu’udar buat ida maka ipókrita bainhira ita haree ema matak leet ida maka diak liu hotu duke ita-nia maun-alin no bin-alin rasik sira.

*) Bainhira aat malu ho maun, alin, bin sira, ita dala ruma, iha tendénsia (ho hirus ka raan nakali) atu “nega” katak sira ne’e la’ós ita nia raan rasik alias sai hosi kaut ida deit (kaut ne’ebé ita-nia inan ho aman human hela tiha ona). Ita bele halo buat ne’e, maibé istória sei la nega.

*) Katuas ho ferik sira dehan fila-fila, “ Atu halo buat ida, hanoin mós katak loron aban sei iha. Ne’e la’ós masin be meer kedas, no aimanas be manas kedas. Buat hotu ne’e la’ó neneik.”.

*) Ita ema ho ema maka haree malu, la’ós sasan maka foin halo ita haree malu.

*) Lalehan , ha’u bele dehan, eziste duni iha rai ne’e bainhira ita halo tuir ukun fuan tuir mai: “hadomi ema seluk hanesan ita-nia an rasik.”

*) Karik ema ku’u ó, ó sinti moras, ó tenke buka oinsá para atu lalika ku’u uluk ema.

KORESPONDENSIA LITERARIA III

Introdusaun

Ho maluk Timoroan sira ne'ebe gosta halimar iha fatin halimar literaria nian, ha'u mos halo korespondensia hosi e-mail, liu-liu hosi SMS.
Foin lalais mos ha'u dada lia fali ho Zinha Viegas liu hosi SMS.

K'manek,
Abe Barreto Soares

---
ABE: XANANA/matan dok,/hateke borus/ nakukun maka falun metin// 18:15:43//28-1-2007.

ZINHA: Xanana abut metin/abut namkari/keta koko tesi kah ke'e/tanba abut ne bele hadulas hale'u ita an rasik// 22:15:48//28-1-2007.

KORESPONDENSIA LITERARIA II

Introdusaun

Iha 28-1-2007 kalan, ha’u haruka SMS ba Selma kona-ba poezia.

ABÉ: moris poeta nian ida nu’udar selebrasaun ba buat sira baibain iha moris. poeta ne’e nu’udar “koletór fosil sira tempu nian”. [ha’u haruka SMS ne’e ho lian Inglés ho Indonézia]: life of a poet is the celebration of ordinary things in life. s/he is a “pemulung fosil-fosil jaman”. 19:08:04 // 28-1-2007.

SELMA: poezia nu’udar ‘sentimentu’ iha periodu tempu nian ida. [nia haruka resposta ho lian Indonézia]: puisi adalah ‘rasa’ di dlm sebuah masa. 20:44:56 // 28-1-2007.

****

REFLESAUN IV: "INAN FETON DOBEN HARII DAME"

INAN FETON DOBEN: “WE MATAN, SULI LORON, SULI KALAN”

( *) Reflesaun kona-ba Feto iha Harii Dame


Ko’alia kona-ba inan, la seluk, la leet, ita ko’alia kona-ba ita-nia hun, ita ko’alia kona-ba ita-nia abut rasik.

Se karik la ho inan nia prezensa, oinsá maka ita bele mosu, oinsá maka ita bele eziste, no bidu ho laran haksolok iha ita-nia planeta Rai nia palku leten, no rai fehan sira?

Hamutuk ho ita-nia aman sira, ita-nia inan doben, kous hasai ita ho laran no neon tomak, hosi Nai Maromak nia kadunan, ho neras domin. Nia kous ita, nia lori ita mai hatuur tan iha abad mundu rai klaran ne’e nian. Nia la kole, foti matan, hateke ita buras, nia la kole haree ita, lolo ita-nia dikin, rani iha fatin-fatin.

Inan nia terus, sura labele. Inan nia kole, inan nia kosar been, selu labele, to’o deit ita tama fali ba rai kuak, alias fila fali ba rai rahun.

Hanesan inan ida ne’ebé tau ita iha mundu rai klaran, nia la husu buat barak mai ita. Hanesan inan ida ne’ebé terus barak tiha ona mai ita, nia husu deit, atu ita hato’o hikas fali ita-nia domin tomak ba nia. Hanesan inan ida ne’ebé fó an tomak ba mate atu sosa ita-nia moris, bainhira nia tanis, nia hakarak tebes duni atu ita la baruk, hamaran lisuk nia matan been maka suli.

Inan nia domin, domin rohan laek! Inan nia domin, domin lalehan. Inan nia domin, domin hori otas, domin hori wain nian kedas.

Inan sira nu’udar bee matan, ne’ebé suli loron, suli kalan. Bee matan oan ne’e mós, moos nabilan tebes, no furak la halimar. Kanek bubu sira ne’ebé ita iha, ho bee, ita buka atu tuhik. Kanek bubu sira ne’ebé ita iha, ho bee, sei sai diak.

Ho domin tomak ne’ebé nia hato’o mai ita, nia kria armonia, ho domin tomak ne’ebé nia haklaken, nia kria dame, ho domin tomak ne’ebé nia haburas, nia kria hakmatek iha ita-nia uma laran.

Inan nia prezensa iha mundu rai klaran, ho frajilidade tomak ne’ebé nia iha, nia fó sai nia lian. Nia lian: lian osan mean, nia lian: lian laran maus, nia lian: lian laran dodok, dala barak sempre hananu, iha espasu lia loos nian maka sublime.

Timor-Leste, rai doben, rai murak, nu’udar ita Timoroan sira hotu nia inan. Nia maka hahoris ita. Nia maka fakar ran tanba ita-nia moris.
Hodi sá loos maka ita sei selu nia kole? Oinsá loos maka ita buka atu tau iha neon bebeik kona-ba nia terus no susar?

Timor-Leste nia kanek, Timor-Leste nia tanis, ita hotu nia kanek, ita hotu nia tanis.

Timor-Leste oras ne’e dadaun tanis, matan been suli, Timor-Leste oras ne’e laran kanek, no laran dodok. Nia hamalaha no hamrok ba justisa.

Justisa nu’udar aitarak ida maka oras ne’e tu’u hela iha ita-nia rain doben nia ain tanen.

Ita keta halo ita-nia inan terus liután!
Ita keta halo ita-nia inan susar liután!
Ita keta halo ita-nia inan matan been suli liután!

Mai ita ba hamaus fila fali ita-nia inan doben!
Mai ita ba hakoak fila fali ita-nia inan doben!
Mai ita ba hamaran fila fali ita-nia inan nia matan been!

Hodi nune’e ita sei la sidi, hodi nune’e, ita sei la monu iha tempu ikus mai. Karik la’e, ita sei hetan malisan, karik la’e ita sei hetan susar.

Mai, mai, ho neon diak, no aten barani, dada sai aitarak oan ida ne’ebé tuu maka’as iha ain tanen ita-nia inan doben nian.

Mai, maluk sira hotu, mai ita ba hamutuk! Se karik la’ós ita, sé tan maka atu halo, sé karik la halo agora, bainhira tan maka ita sei prontu?

Dili, 27 Janeiru 2007

Abé Barreto Soares

*) Reflesaun oan ne'e grava tiha ona iha Sabadu, 27 Janeiru hosi TLMDC ba programa radio RTTL. Ha'u hetan informasaun katak reflesaun ne'e sei fo sai la kaleur tan. Durante gravasaun iha ha'u-nia uma iha Fatuhada, ha'u improviza oituan.

ISTÓRIA BADAK I

Introdusaun

Istória badak nu’udar ramu literatura nian ida ne’ebé ha’u foin maka hahú atu esplora. Ha’u iha idea barak durante ne’e maibé susar loos ba ha’u atu hakerek tanba ha’u la domina téknika hakerek istoria badak.

Istória badak ida tuir mai ne’e, nu’udar ha’u-nia istória badak ne’ebé ha’u foin hakerek ba dala uluk iha ha’u-nia kareira literária. Ha’u hetan inspirasaun hakerek istória oan ne’e, hafoin tiha lee istória badak eskritór Indonézia nian naran, Cecep Samsul Bahri ho títulu, “Sunset” iha fulan Dezembru tinan 2005, no ha’u tenta traduz tiha ba lian Tetun. No mós ha’u hetan motivasaun atu hakerek istória oan ne’e mai hosi ha’u-nia alin ikun, Bety nia badinas iha mundu literária. Ha’u agradese barak ba sira tanba motivasaun maka ha’u hetan.

Ha’u hein katak ha’u sei iha tan motivasaun atu hakerek istória badak iha tempu ikus mai.

Dili, 29 Janeiru 2007

Shalom,
Abé Barreto Soares

******

HAKAT HAMUTUK, HASORU LORON ABAN

Iha tasi ibun sira nain rua tuur iha ai hun mahon natoton ida, hodi hateke ba tasi. Sira tuur iha kain Bali kor verde ida nia leten ne’ebé ohin sira lori mai tau iha sira nia kareta sedan azul oan ne’e nia laran. Lalehan nabilan furak. Husi dok sidade Dili haree hetan. Tasi la boot ida; laloran kiik maus, baku ba tasi ninin, kria ambiente ida maka dame no hakmatek. Furak atu haris tanba tasi been mós moos kapas. Ida mane mós stel dadun hela ninia CD Player maka liga ba speaker kabuar kiik rua, marka Sony, toka múzika Ebiet G.Ade nian ho titulu, “Aku Ingin Pulang”.Nia halo lian ladun boot ida, natoton hela deit ba sira nain rua maka atu rona.

Kuaze fulan hira ona sira la mai pasiar iha tasi tanba okupadu ho buat seluk. Se la sala desde fulan Junu tinan liu ba. Oras ne’e fulan Maiu 2005. No sira nain rua mós ikus-ikus ne’e baruk atu mai tasi. La hanesan uluk ona bainhira sira nain rua sei foun-foun tuir malu . Uluk sa ina, Sabadu-Sabadu ona kuandu ida mane ne’e la servisu, ou se la’e Domingu ona, entaun sira nain rua bibi ain ba tasi la falta. Ne’e sa termasuk jatah tiha deit. Sira-nia fatin maka Arreia Branca ne’e ou se la’e Kristu Rei neba.Tasi ibun iha Dili ne’e iha ne’ebé tan, paling-paling maka fatin rua ne’e ona.

Ida feto ne’e, ho kalsa jeans azul maka nia lulun to’o iha nia ain kabun, hatais bluza kor mutin, hamrik, hakat ba tasi ninin, habokon nia ain ho tasi been, la’o dok oituan hosi ida mane ne’e.

“Amor, o hakarak hariis agora ona ka?”,

“Biar orsida deit.. Ha’u sei hakarak lee oituan lai. Depois hein loro manas oituan mós.”, ida mane hatan, no nia komesa toba haklena ona iha kain Bali nia leten. Rai henek musan balu namakari iha hena ne’e nia leten tanba ida feto ne’e foin lalais la’o, nia sinelus halo rai henek katik tama sa’e mai tan hena ne’e.

“Amor mós hakarak haris?”

“Hakarak, maibé roupa hariis nian mós la lori ne’e. O ida be ansi atu mai tasi, hanesan funu atu tama ne’e, halo ita baruk…”. Ida feto ne’e kontinua halimar ho tasi nia laloran maus, kiik ne’ebé baku ba ninin.

Ida mane ne’e foin maka atu kesi hela hammock ba ai. Nia hakarak atu toba iha hammock leten, depois maka nia atu lee nia livru poezia rua ho titulu: “ Penunggu Makam “, poeta Benir Budiman nia obra, Kubur Penyair”, poetaTjahjono Widarmanto nian, no mós kolesaun cerpen obra poeta Sitor Sitomorang nian, ho titulu “Salju di Paris” maka ohin nia lori mai hotu.
Ambiente ida ohin hakmatek kapas ne’e derepente deit lakon, la hatene ba ne’ebé. Motor bebek lubuk ida maka la’o liu ba Kristu Rei halo barullu la halimar. Tanba knalpot sira hasai tiha. Labarik joven oan sira maka estilu meninu bonitu; balu tula sira-nia doben oan sira be, la diak loos, husik husar sira ne’e sai-sai hela, no inus sira ne’e tuu ho brinkus, hanesan loos ema India sira, iha motor kotuk.. Motor sira-nia lian barullu halo ita-nia tilun oan sira ne’e atu nakfera deit. Ema sira ne’ebé sofre kurasaun sa, lalika rona kedas barullu ida hanesan ne’e, se la’e bele mate hamrik iha fatin deit.

Ida mane ne’e, tau kalsaun azul, kamizola Bali, kor mean, komesa toba ona iha hammock leten, no hahú lee livru “Kubur Penyair”. Ida feto mós hakat mai besik ida mane ne’e.

“ Amor, fó mós buku ida mai ha’u atu lee ka? Sa maka o maka toba gaya-gaya lee, ha’u hanesan fali ayam potong ida, memble hela hanesan nune’e deit. “, ida feto ne’e husu.

“Ne’e. O lee maka buku cerpen ne’e deit.”, ida mane hatete hodi lolo livru “Salju di Paris” ne’e ba ida feto.

Sira nain rua mós okupadu lee livru sira ne’e. Ida feto ne’e tur ona iha kain Bali nia leten maka ohin sira nahe ne’e, uza oklu minus oan ne’e hodi lee cerpen ida ho titulu “Cinta Pertama”. Kuaze meia hora hanesan ne’e, ida feto ne’e hatete ona,

“Amor, o hateke mai lai. O hakarak hatene? Kolega sira iha ha’u-nia kantor ne’e konta loos ita nain rua nia vida. Sira nia ibun para boot. Mesak ibun komadre deit. Hakarak mete hotu ema seluk nia vida. Sira dehan ona, “Possa, Nur Afni ne’e sorte kala laiha liu pá.. Hetan fali mane ida be katuas liu fali nia. Pokoknya sira la cocok liu sa…Não me digas, mane iha Dili laran, ne’ebé idade natoton hanesan ho nia ne’e kala laiha liu ona, no sira hatete buat seluk-seluk tan. Ha’u maka baruk atu konta sa. Ha’u rona fali buat ne’e hosi Mana Hermenegilda. Nia maka iha Sexta semana ne’e konta fali mai ha’u molok ami atu ba makan siang iha restorante Menado.

“Foun-foun ha’u rona ne’e, Amor, é pa, hau-nia ran sira ne’e atu sa’e deit ona to’o hau-nia kakutak sa.. Filha da puta, pa!.”, ida feto ne’e kontinua ko’alia ho nervozu oituan, no oras-oras nia hadi’a nia oklu minus oan ne’e iha nia matan.

“ Mesak munafik tan-tanan deit o nia kolega sira iha kantor ne’e, Amor… Ha’u sa baruk! Ha’u la pusing liu. Husik ba! Biarlah anjing-anjing betina itu menggongong, kan kafilah tetap berlalu?!”

“To’o tempu diak ida, Amor, kuandu ha’u rona to’o bosu didiak ona hosi Mana Hermenigilda ho sira seluk tan maka ha’u sei ba sakalele deit sira. Sira halimar ho ema seluk. Sira halimar ho ha’u sa, entaun sira buka ona sira-nia mirik. Ha’u mós baruk ho ema sira be la hatene an, gosta halo sanak tun sanak sa’e sira-nia ibun oan ne’e. Maibé, hitung-hitung, EGP!. Emangnya gue pikirin! Yang penting kan ha’u la ba kamat sira-nia laen oan sira ne’e.”

Loro manas dadaun tan ona. Sunu ita-nia isin sira ne’e mutuk oituan. Maibé mala’e mutin sira sa gosta habai an hanesan naan maran iha loron manas hanesan ne’e. Ida mane ne’e bok an hodi dehan,

”Amor, ha’u hariis lai ba!. Ne’e ka?”

“Ok, Amor, hariis ba. Maibé ha’u sa hakarak kontinua lee lai cerpen
oan sira ne’e.”.

Ida feto ne’e mós foti sabraka tanjerina fuan ida hosi plastik metan laran, no loke ona, no han oituan-oituan. Depois nia so’e naran-naran sabraka kulit sira ne’e. Nia ladun peka oituan ho lingkungan, no nia so’e deit sabraka kulit sira ne’e iha rai henek leten. Ida mane ne’e haree nia namorada soe sabraka kulit naran-naran, hosi dok, nia hatete ona,

“Amor, Amor…. Keta naran so’e foer hanesan ne’e ka! Orsida ema
dehan saida ba ita ona…..”

“Eis, ema hatene sa! Ema balu sa…sok-sok jadi aktivis lingkungan hidup maka ne’e….”, nia hatete hodi goza, maibé nia sinti an, no foti sabarak kulit sira ne’e tau iha fatin lixu marka HABURAS ne’ebé la dok hosi sira-nia fatin piknik ne’e.

Ida mane ne’e komesa hariis ona. Bee malirin kapas. Oras-oras nia luku an ba iha tasi kidun. Depois nani halimar ba klaran, no fila hikas lalais fali mai ninin. Depois nia tuur iha rai henek leten. Lolo nia ain rua halo loloos. Rileks pokoknya.. Laloran tasi maka baku--baku nia ain kabun sira maka sei nakonu ho rai henek musan. Nia tuur hateke ba tasi. Orizonte maka luan, loke tebes nia fuan ho neon. Nia sinti iha liberdade. Sim, tasi ne’e simbólu liberdade nian duni. Ambiente iha tasi maka furak ne’e halo nia teki-tekis hanoin fali nia tempu uluk bainhira nia sei eskola iha SMA, nia ho nia kolega sira mai halo piknik iha fatin ida ne’e, dala tolu ka dala haat ida hanesan ne’e. Tempu SMA tempu ida maka furak la halimar. An unforgettable memory. Momentu sira iha SMA ne’e maka inspira kantór sira hanesan Chrisie hakerek múzika “ Kisah Kasih di Sekolah”. No ohin loron múzika oan ne’e sai tiha ona sound track ba sinetron ida ne’ebé mosu iha kanal TV Indonézia nian, se la sala ,” ANTV” ho nia titulu maka hanesan. Iha momentu ne’eba ida mane oan ne’e gosta loos atu namora ho nia adik kelas ida, maibé nia la konsege namora tanba feto oan ne’e haree katak ida mane ne’e idade sei kiik, no mós seidauk iha tan jeitu duni atu namora hanesan kolega mane sira seluk. Feto oan adik kelas nee oras ne’e ho ninia inan aman sira iha ona metropole Lisboa ne’ebá. Nia ba kedas iha fulan Setembru, tinan 1990. Nia foti Fakuldade Medisina, Universidade Coimbra. Parese kala nia akaba tiha ona nia estudu oras ne’e. Ida mane ne’e mós hanoin fali poezia oan ida ne’ebé uluk iha tempu SMA nia hakerek ho titulu.,” Pasir Putih Dalam Kenangan”:

“ saat gitar bersenandung oleh petikan jemariku/
suaraku turut bergetar/hati kecilku menangis/ pandang mata dilayangkan pada alam Tim-Tim yang kering gersang/aku teringat masa lalu, masa depan jua/terasa bagaikan aku terbang dalam alam fantasi//

Nia bahasa Indonesia maka ladun moos. Bahasa Indonesia ida be labarik remaja Timor nian uluk maka seidauk lancar loos ne’e sa, hatene deit ona ba.

“Suut!!!!!…. Heeeee, Amor!!!. Melamun saida?”, ida feto la’o mai hosi kotuk kili ida mane ne’e nia kabun sorin kwana, ne’ebé desde ohin tuur kalma, luku klean iha ninia mundu imajináriu.

“La’e ida. Ha’u la melamun buat ida.. Maibe ha’u merenung…”

“Ehhh! Bosok sa, Señor Yoshua!… Merenung ka merenung!”

“Tebes sa, ha’u merenung…La fiar ha’u too ona. Ha’u sa la obriga
ema ida atu fiar!.”

“Amor, o haris hotu lai maka hau hakarak atu kontinua ho ita-nia
konversa.”

“Konversa ida ne’ebe fali tan ona?

“Sei iha kaitan ho ida ohin ne’e sa!”

“Ah, ha’u baruk. Yang itu-itu aja!”

“La’e ida ne’e berita foun ida fali ona.. Ha’u haluha ohin atu konta
mós ba o, Amor!”

“Ok, ok!!! Husik lai, ha’u hariis dala ida tan lai, ne’e ka Amor!….”

Mala’e feto foin sa’e oan ida, isin kapas looos, ho bikini deit hori ohin, la’o hela ba mai. La kaleur nia ba sadere nia an iha ai hun mahon furak ida, tuur lee hela nia livru novel, Ernest Hemingway, Laureadu Prémiu Nobel ba Literatura iha tinan 1952 nia obra ,”The Old Man and the Sea”. Pode ser mala’e feto ne’e Australiana ida tanba nia aksen ne’e ita rona ba hanesan loloos Inglés Australia nian bainhira nia koalia ho nia namoradu ne’ebé mai hariis tasi ho nia.

****
Ida mane ne’e hariis. Nia luku fali ona. Kleur oituan. Ema sira mai tan, mai tan. Tasi ibun kuaze ema nakonu. Maibé labarik sira maka barak. Feto, mane. Depois tiha, ida mane ne’e halo sinal ba ninia namorada oan ne’e atu foti ninia kamera maka tau iha ninia pasta metan atu hasai nia foto.

“Ok, Amor, ha’u kontinua ho ita-nia konversa. O hatene saida, kolega feto sira ne’e dehan mós katak, ‘Nur Afni ne’e tuir-tuir buatamak ne’e tanba osan, pangkat ho jabatan sa. Ita sa la fiar, se la nune’e, tesi tiha liman!…Ou keta ida mane ne’e lori maninga karik, se maka hatene?”

Ida feto ne’e tur iha kain Bali. No ida mane nee’ tuur iha ai sanak boot ida.Tanba nia kalsaun bokon, nia lakohi tur iha kain ne’e nia leten. Nia foti toalla azul ida ne’ebé seidauk fase kuaze semana ida ona, bobar iha nia isin lolon. Ida mane ne’e rona ho atensaun tomak, maibé nia lakohi fó komentáriu ba gosip murahan sira hanesan ne’e.

“Ha’u baruk rona. O fó deit maka sabraka ne’e mai ha’u para atu han
sa!….”, ida mane ne’e hatete.

Sira nain rua mós muda sira-nia tópiku konversa. Agora sira koalia fali maka kona-ba sira nain rua nia futuru rasik. La hatene loos bainhira maka sira deside atu tama ba iha uma kain alias tama iha vida casal. Momentu romántiku hanesan ne’e, halo sira nain rua hanoin fali múzika kantor Indonezia nian ida seluk-- Iwan Falls nian ,”Kemesraan”. Sala maka loron matan seidauk monu., no rai mós seidauk besik atu nakaras. Se la’e ida karik maka ne’e, kala paas loloos.

“ Kita jalani aja dulu hubungan kita ini, Amor…”, ida mane ne’e hatete, tenta fó laran metin ba ida feto. Ida feto mós hatan kedas,

“Ita ema halo planu, Sayang ,maibé buat hotu kan Maromak maka sei
tetu, los kala’e?”

Sira nain rua nia kabun oan ne’e mós namakili dadaun ona. Ohin mai tasi ne’e sira la lori hahan ida. Sira diside orsida atu ba han deit iha Rumah Makan Pantai Laut iha Kolmera. Sira mós hakarak duni ba han iha neba: han ayam goreng lalapan ,no hati ampla. Kleur duni ona maka sira nain rua la ba han iha restaurante Cina katuas Javanés nian ne’e. Katuas ne’e relijiozu tebes. Buat kiik boot, nia sempre temi maka Maromak, Maromak deit.

Tasi mós komesa maran dadaun. Maré baixo, ema Portugés sira hatete. Ema lubun boot ida maka bou loos iha tasi laran. Hariis. Balu halimar ho bola. Balu tebe bola iha tasi ibun. Mala’e ho Timor sira kahur malu deit. Labarik sira be ohin barak-barak ne’e, balu duni malu hela. Sira mane molik, la tau kalsa ida, no labarik feto oan sira ne’e oituan deit maka hatais bikini. Maioria hatais kalsa ho kamizola deit.

Maré baixo hanesan ne’e konvida ema atu refleta liután kona-ba moris ninia lalaok, katak “life has its ups and downs.”. Sira nain rua mós fiar katak sira-nain rua nia moris sei la ses hosi buat ne’e, sei sa’e –tun, sa’e-tun. Naran katak maka sira nain rua ne’e lian ida, laran ida deit--hakat hamutuk, prepara, hasoru sira-nia loron aban, maka sei nakonu ho teka-teki.

******

Dili, Dezembru 2005