AFORISMA DIARIA [26-6-2008]

[Global Internet, Caicoli bolu fali ona ha'u atu mai atualiza ha'u-nia blog sira. Tempu la'o lalais loos. Hakfodak agora semana rua ona maka ha'u seidauk atu atualiza blog sira. Okupadu tebes servisu no vida familiar no atividade ekstra sira seluk halo ha'u kuaze laiha enerjia no tempu atu tuur dada lia iha 'cyberspace'.

Idea sira barak maka mosu, no reflesaun lubuk ida maka ha'u halo tiha ona iha fulan ida ne'e nia laran, no ha'u tenta toma nota hotu ona iha ha'u-nia notes ho titulu "Notes of A Musafir".
Ha'u agradese ba Na'i, matebian sira no uma lulik ne'ebe fo kbiit tebes mai ha'u hodi halo reflesaun klean kona-ba ita ema nia moris. Ha'u hatene katak ha'u-nia leitor sira, liu-liu ha'u-nia alin Mundo la tahan ona atu hein hodi akompana ha'u-nia 'gejolak jiwa' hanesan ema 'man of letters' ida.....]

*) Ami haree kbiit tolu kedas hadulas hale'u o, Belun. Kbiit Na'i nian, matebian sira nian no kbiit uma lulik nian. No o mos hatete mai ami atu lalika hakfodak, no atu lalika foti an, no lokok an. O mos dehan teni, se karik imi lokok no foti imi-nia an, kbiit sira ne'e semo sai tomak hosi im-nia isin lolon no klamar.

*) Hanesan eskritor alias lia na'in ida ha'u tenke mantein bebeik ha'u-nia independensia no jestu kritiku atu oinsa maka ha'u bele observa halo loloos lala'ok moris ita ema nian ne'ebe nakonu ho midar no moruk. Se ha'u la halo ida-ne'e, entaun ha'u lakon ona vizaun hanesan "manusia periferi".

*)Susar ba ita atu hadomi duke odiu, susar ba ita atu foti duke fo, no susar ba ita atu harii duke harahun (hanoin fali liafuan ha'u-nia xefe boot kona-ba Jackie Chan, ator kong-fu Xina nia lia fuan, ne'ebe oras ne'e vizita TL ).

*) Husu boot mensajen Jackie Chan nian: disiplina, respeitu no unidade, ne'ebe hato'o liuhosi diskursu no 'spanduk' sira lubuk ne'ebe tara iha Dili laran ne'e la saugati de'it alias tama hosi tilun sorin, no sai borus fila fali iha tilun sorin seluk.

*) Respira tempu pasadu hanesan ita respira ar iha ita-nia moris loron-loron hosi segundu ba segundu. Maibe oin nusa atu halo buat ne'e se ar sira-ne'e hetan hotu ona poluisaun? Ha'u sei hatan hodi dehan katak, di'ak liu ita purifika poluisaun sira-ne'e liu hosi ezersisiu espiritual: yoga, meditasaun, kontemplasaun, nst.

*) Reflesaun sakral triangular ba 'kebajikan teologis' : fiar, domin no esperansa. Domin maka boot liuhotu. Ha'u folin sa teni, karik domin maka la sai nu'udar pontu sentral ida iha ha'u-nia moris loron-loron nian?

**

AFORISMA DIARIA [11-6-2008]

[Karama Public Library, Karama, Darwin, NT. Tuku 12:03 PM]

(Dada lia fali.Durante ne'e, liu-liu iha fulan Maiu nia laran, ha'u okupadu demais ho servisu no buat seluk, to'o ikus ha'u tenke 'abandona' duni hodi atualiza ha'u-nia blog sira.

Oras ne'e ha'u iha Darwin. Pasa ha'u-nia ferias (ORB= Occasional Recuperation Break). Mai hosi Dili desde Sesta liuba, 6-6. Orsida tuku 3 PM ha'u semo fali ba Dili, sa'e aviaun ONU nian.

Durante ORB iha Darwin, ha'u deskansa ho didi'ak. Hela iha Mito, Tiu Mundo nia oan nia uma. Vizita maluk sira, dada lia lubuk. Ha'u hetan lisaun barak. tempu di'ak mai ha'u atu refleta kona-ba esensia moris.

Ha'u haksolok hasoru Mito nia oan sira. Sira mos haksolok hasoru ha'u. Ha'u-nia laran dodok, matan been suli, haree sira ohin loron moris buras... Ha'u hanoin fali Tiu Mundo nia oan sira maka uluk terus iha Sisi, Fohorem. Mae haruka subar ajuda ba Tiu Mundo. Mae ho Tiu Mundo hanorin mai ha'u kona-ba esensia verdadeiru moris nian. They have taught me the great essence of brotherhood and sisterhood.

Ha'u haksolok haree Nina Moniz ho nia oan sira. Labarik sira halo belu di'ak ho ha'u. They are great friends. From them, I learned a lot about love, innocence, caring, chidhood,etc...

Ha'u haksolok hasoru Tia Veronica. She is---a great Guru-- in my poetical career. A great shaman....]

*) Saude--mental no fiziku--iha ita ida-idak nia liman. Presiza kuidadu di'ak. Saude nu'udar ita-nia osan mean. Diak liu prevene moras duke kura.(mais vale prevenir do que remediar.)

*) Labarik sira: ita-nia matan musan, ita-nia tee rohan, ita-nia raan. Sira hatutan esensia moris, "ita mai hosi ne'ebe, ita oras ne'e iha ne'ebe, no ita atu ba loos ne'ebe."

*) 'Fatuk lalian' iha tolu. Fatuk lalian tane ita-nia identidade espiritual TL nian (ita fiar Maromak, matebian no uma lulik). Karik fatuk lalian rua de'it, ita-nia sanan sei haliis, no bele bele halo bee nakfakar. No ita-nia mehi atu nono bee mos to'o ikus la sai realidade.

***