AFORISMA DIARIA [21-2-2008]

[Global Internet Cafe...Rai loro..Kalohan mutin taka oituan lalehan. Kareta no motor la'o... Estudante sira la'o ba, la'o mai.. Ai tahan matak..Anin hu.. Luron sei bokon...

Udan tau maka'as loos horikalan to'o fali ohin dadeer tuku 7:00. Udan no anin. Uma oin sira bee nakonu.. Iha fatin balu parese bee sa'e tan uma.. Ema sira okupadu loos iha dadeer san hamoos baleta kuak iha uma sorin maka intupidu.

Iha fatin balu iha territoriu laran, kondisaun konserteza sei hetan impaktu maka'as hosi udan tau maka'as ida ne'e.

Ita preokupa ho kondisaun iha kampu dezlokadu sira. Maluk sira kala aguenta ho udan been, no kondisaun bokon iha tenda lona sorin-sorin.....]

*) Afinal atu sai rai ida-ne'ebe hamrik raisik alias ukun rasik nia an la'os buat ida maka fasil. TL hanesan loloos kosok oan ida ne'ebe foin hakat atu la'o. Krize atual ne'e halo TL monu, tidin kidun. TL tenke hamrik fila fali, hakat ba oin, hodi hasoru naroman tempu nian.

*) Sa valor moris nian maka ita sei iha tan, se karik espiritu amizade nian ne'ebe loloos ita la buka ona atu kuda no haburas bebeik?

*) Moris sei lakon nia sentidu se karik ita, hanesan ema sira ne'ebe hala'o moris ne'e, lakohi tan ona atu buka hola distansia hodi halo reflesaun klean kona-ba moris nia esensia, ne'ebe nakonu ho buat hirak maka ita la espera.

*)Nu'udar ema fiar na'in, ita abut la metin, ita sei sai hun la dikin bainhira ita kotu ona ho ita-nia Nai Maromak.

*) Poeta/lia na'in: ema "solitariu" ne'ebe buka atu "solidariu" ho ema seluk. Nia ema mehidor ida. Nia nu'udar ema ne'ebe moris iha fronteira entre mundu real no mundu imajinariu. Nia hakarak tau nia an hanesan ponte entre mundu rua ne'e. Nia ne'e ema estranu?

*) Keta matebian no lulik rai ida ne'e nian babeur ona ita karik, tanba ne'e maka ita la buka atu hamutuk hodi kesi metin aisar, hodi nune'e ita bele dasa fo'er iha uma laran, maibe tetak rahun tiha aisar kesak sira ne'e, no halo namkari?

AFORISMA DIARIA [20-2-2008]

[Global Internet Cafe, Caicoli. Rai nakukun. Lalehan malahuk..Udan kala orsida tan tun...]

*) O dudu ha'u ba didin lolon, no nune'e tiha o lori surik naruk atu sona tan ha'u. Ha'u buka dalan atu defende ha'u-nia an ho kbiit tomak ne'ebe ha'u iha, tanba ha'u hatene katak ha'u iha perigu nia laran. Depois o dehan katak ha'u ema bulak, no laiha konsiensia kona-ba konseitu dame nian?

*) Bainhira iha kuzineiru barak resin ne'ebe tein modo oin ida deit, entaun modo ne'e sei lakon tiha nia sabor. Ita mos laiha vontade atu han modo ne'e.

*) Tanba deit ha'u-nia riku soi, ema halo ha'u no ha'u-nia maluk sira hanesan loloos "modo masin". Ha'u-nia emar barak maka seidauk matenek, entaun ema aproveita situasaun ida ne'e hodi "hanehan" ha'u ho maluk sira seluk ho maneira oin-oin. Laiha dalan seluk ba ha'u no ha'u-nia maluk sira, anaun ser buka atu funu hasoru tipu neo-kolonialismu ida hanesan ne'e ho kbiit tomak maka ami iha.

*) Rai boot ne'ebe iha kbiit maka'as sempre iha tendendsia buka atu domina rai seluk. Buka hakarak atu sai hanesan "polisia"--tau matan ba ema. Naturalmente, rai boot ida ne'e sei sinti la hakmatek, bainhira rai ne'e haree rai seluk, liu-liu rai ki'ikoan sira, ne'ebe buka atu mantein sira-nia militansia.

*)Mundu globalizasaun mosu mai iha ita-nia oin, hodi "bani been" iha nia liman kuana, no lori "veneno" iha nia liman karuk. Ita maka tenke matan-moris, neon na'in hodi hatene kona-ba realidade ida ne'e, atu nune'e ita sei laran monu ba nia lasu.

****

AFORISMA DIARIA [18-2-2008]

[Global Internet Cafe. Rai nakukun. Lalehan la moos. Ha'u foin almosu lalais iha Alpha & Omega.

Familia Soares oras ne'e hasa'e namanas hela bandeira metan tanba Tiu Xico, Tia Kiik nia katuas oan Maromak bolu tiha ona iha Sabadu, 16-2 lorokraik. Ha'u rona notisia ne'e iha Sabadu kalan ona. Horiseik feton sira no alin Enty maka ba Manatuto hodi hato'o sentimentu pezame. Ha'u labele ba hamutuk ho sira tanba ha'u okupadu ho servisu pesoal ne'ebe iha relasaun ho programa radiu, no kondisaun fiziku Apai nian maka ladun di'ak.
Ha'u tenta ajuda trata surat mate nian ne'ebe atu haruka hosi Manatuto ba Kupang, hodi nune'e Abela (Tia Ki'ik) sira bele mai.

Programa radiu "Anin Naniri" iha RTTL -edisaun 17-2-2008 la'o ho diak. Foin ba dala uluk ha'u grava programa n'e desde ha'u kaer programa ne'e iha tinan 2000. Ami nain tolu: Apai, amor no ha'u maka ba estudiu halo gravasaun iha tuku 6:30 to'o 7:40 kalan. Ami tenke fila sedu tanba kondisaun estadu sitiu. Iha uma, hosi tuku 8 to'o 9 ha'u tuur rona fali programa ne'e. "Not bad!", ha'u hatete iha laran.

Ohin Amor nia aniversariu, halo tinan 30. Ha'u laiha buat diak ida atu fo ba nia hanesan prezente ida. Husu boot ami-nia relasaun domin kontinua metin liutan ho idade avansadu ne'ebe oras ne'e ami iha.....]

*) Timor-Leste: rai lafaek, rai lulik. Ita hotu nian, hanesan Timoroan. Ita-nia inan sira-nia raan fakar iha nia fohon bainhira sira hahoris ita. Keta halo rai lulik ida ne'e tanis resin!

***

AFORISMA DIARIA [16-2-2008]

[Global Internet Cafe, Kaikoli...Ha'u foin fo hotu aula Ingles ba estudante sira hanesan baibain iha Sabadu. Aula la'o diak, ho partisipasaun estudante nain 18. Ami ohin ko'alia kona-ba "Krize 2006". Ohin ha'u hahu iha tuku 1, fo mid-term test ba estudante 2 ne'ebe seidauk tuir. Hotu tiha ha'u ba lalais Terrace Cafe. Hasoru kolega, XG ne'ebe uluk ami hamutuk iha SMAN I iha ne'eba. Ami dada lia lalais kona-ba situasaun atual iha rai laran. Depoisde ne'e, ha'u hahu fali aula iha tuku 2.

Ha'u-nia kondisaun fiziku ladun diak ohin loromanas molok atu hakat mai atu fo aula. Estomagu provoka fali ona. Oin halai oituan.

Ha'u toba tarde loos horikalan. Sei buka atu lee, refleta.......

Horiseik kalan, ha'u ho kolega Michael ajuda fo ami-nia servisu durubasa nian ba iha programa RTL kona-ba seguransa. Ha'u ladun sinti komfortavel ho aranju sira iha estudio, ne'e duni halo ha'u susar oituan atu rona ho didiak saida maka lokutor ko'alia, no ha'u halo durubasa direta ba lian Tetun, no sai iha radiu. Tanba estadu sitiu ne'ebe Estadu impoen, entaun ami hetan eskoltu hosi polisa NU bainhira ami fila ba uma ida-idak nian....]

*) Mundu ne'ebe ita hela ba ne'e sempre repete azineira sira, no to'o ikus hamosu raan nakfakar. Ita mos sai bila an. Ita laran taridu. Ita mos luku klean iha tasi pergunta nian oin-oin. Bainhira loos maka sirkulu visiozu sira ini remata?

***

AFORISMA DIARIA [15-2-2008]

[Global Internet Cafe maka sai nu'udar fatin mai ha'u ikus-ikus ne'e atu atualiza ha'u-nia blog sira hanesan saida maka ha'u hatete tiha ona.

Rai nakukun. Udan anin oituan. Ha'u foin ba almosu iha Alpha-Omega ne'ebe Alai servisu iha ne'eba. Han lalais. Hakerek, refleta.....profundamente....

Horiseik lorokraik depoisde almosu, ha'u uza barak liu ha'u-nia tempu hodi observa kobertura media kona-ba atentadu vida PR RH nian. Ne'e duni ha'u-nia servisu durubasa nian la la'o tuir planu ne'ebe ha'u trasa.

Ha'u fila uma sedu hosi servisu tuir kondisaun seguransa maka oras ne'e iha, desde iha loron 11-2.

Insidente 11-2 ne'ebe xoke tebes aten no fuan nasaun TL ne'e kontinua provoka ema atu husu, tanba sa maka buat ne'e sai nune'e? Ha'u iha konversa klean kona-ba asuntu ne'e ho Tio Boot bainhira ha'u almosu iha Bekusi hamutuk ho nia, Mae no Mana Zinda iha Kuarta, 13-2. .... ]

*) Timor-Leste hakat ba oin ho kanek (todan) iha nia lolon. Nia kanek sei lori tempu naruk atu kura. Kanek maka atu di'ak, derepente mosu tan fali kanek foun iha kanek tuan nia leten..Timoroan sira rasik duni maka tenke uluk nana'in harii ulun hodi kura kanek sira ne'e.

*) Poeta: ema ida ne'ebe buka halo konkluzaun moris nian iha liafuan sira ne'ebe badak.

***

AFORISMA DIARIA [14-2-2008]

[ Rai nakukun.Udan atu tau. Oras ne'e ha'u iha fali ona Global Internet Cafe, Caicoli. Molok atu ha'u tama mai iha ne'e, ha'u haree sinal iha odomatan hatete, "open 24 hours". Ha'u deskonfia katak tanba situasaun seguransa foin lalais nian maka obriga ba Internet Cafe nia nain hodi loke nia servisu internet durante oras 24, hodi nune'e fo asesu ba jornalista atu hala'o sira-nia servisu.

Mundu tomak hakfodak ho atentadu atu hamate vida PR RH nian iha Segunda, 11-2, no mos atake ba PM XG hosi grupu armadu AR nian . Ha'u simu xamada telefone hosi maluk ida servisu iha governu kona-ba insidente rua ne'e iha maisumenus tuku 8:15 molok ha'u atu ba dadaun ona servisu.

Hanesan mos ho maluk sira seluk, ha'u sinti triste tebes ho situasaun ne'e. Ha'u konsege hakerek poezia haat horiseik kalan. Tenta atu halo refleta ho klean, tanba sa maka buat hotu sai nune'e? Poezia ida maka ha'u hakarak fahe iha blog ne'e maka tuirmai, ne'ebe ha'u hakerek ho lian Indonezia:
---
REQUIEM ANAK BANGSA/benih permusuhan cukup lama tertanam/anak-anak bangsa saling menikam/anak-anak bangsa saling berhantam/gumpalan darah segar pun kembali bercecer/butir-butir air mata haru pun kembali bercucur//

Ha'u tenta haruka poezia rua, inklui ida ne'e ba maluk lubuk ida. Ha'u hetan komentariu balu.

Desde Segunda, 11-2, iha konferensia imprensa hosi ha'u-nia servisu fatin dala tolu to'o horiseik, ko'alia kona-ba situasaun atual. Ha'u akompana ha'u-nia ulun boot sira hanesan durubasa. Ha'u ko'alia sidi-sidi oituan iha konferensia imprensa sira ne'e.

Ohin iha tuku 11:00-12:30, ha'u fornese ha'u-nia servisu durubasa nian ba enkontru ha'u-nia xefe boot ho partidu politiku sira. Depoisde ne'e, ha'u ba almosu lalais iha Tropical Bakery...

Sabadu, 9-2 ha'u hala'o ha'u-nia atividade hanorin Ingles ba estudande UNTL sira hanesan baibain.

Iha Domingu, 10-2, English Conversation Club ne'ebe ha'u forma ho estudante UNTL sira hala'o nia atividade ba dala rua iha kampus UNTL. Estudante rua mosu, no ami hala'o ami-nia atividade ho antuziasmu.

Papa nia loron mate iha 10-2 marka ho ami nain 3-Apai, Amor ho ha'u-nia vizita ba rate. Ami ba sunu lilin iha Avo Feto nia rate iha tuku 6:20 PM hanesan nune'e. Iha kalan, ha'u haruka mensajen tuirmai ba alin sira:
-
IN MEMORIAM PAPA SEBASTIAO MARUBI/ita toba dukur/nia fanun ita/hadeer/hodi buka tuir nafatin/hun maka se, abut maka se/nia laran maus, nia laran midar/haklaken matak-malirin//...............]


*) Ema ne'ebe halo diak ba ema barak, sempre hasoru realidade katak ema balun haree nia ho matan ikun deit alias hakarak haree nia vida ne'e badak iha mundu rai klaran.

***

AFORISMA DIARIA [08-02-2008]

[ Ha'u mai fali ona Global Internet Cafe, Caicoli hanesan baibain hodi atualiza ha'u-nia blog sira. Almosu iha Erli tarde oituan. Hasoru Seba, Aze, Tom, Alex, Zesopol iha ne'eba.

Ha'u-nia atuasaun iha servisu interpretasaun iha enkontru koordenasaun iha edifisiu STAE nian kona-ba siklu eleitoral ohin iha tuku 10:15-12:00 ladun optimal tuir saida maka ha'u hakarak. Ha'u sidi-sidi oituan.

Figuraun! Ohin dadeer madrugada entre tuku 3 no 4 hanesan ne'e na'okteen tama uma Fatuhada. Iha tuku 5 resin maka ami foin hatene bainhira Mingas sai mai dapur, haree odomatan kotuk dapur nian nakaloke hela. Ha'u deskonfia ema ida mai na'ok ne'e hela iha ami-nia vizinu. Nia maka pode ser tama na'ok iha uma Fatuhada iha fulan liuba. Apai nia salera nono bee no kokakola kaixa tomak no kaixa sorin balu lakon.

Horikalan ha'u toba tarde loos tanba sei lee no halo reflesaun no rona muzika hosi Madredeus, Yanni, no Ben Harper.

Horiseik ha'u tuir reuniaun "town -hall" nian ne'ebe ko'alia kona-ba HIV/SIDA. Enviada Espesial SJ NU nian ba HiV/SIDA iha area Azia no Pasifiku maka mai ko'alia nu'udar oradora prinsipal. Ha'u toma nota balun ba nia ko'alia no dada lia lubuk oan ida ho kolega feto oan hosi Fiji ne'ebe servisu iha seksaun DU.

Ha'u-nia atuasaun iha servisu interpretasaun durante konferensia imprensa semanal ne'ebe ha'u-nia Xefe Boot ko'alia no mos Enviada Espesial HIV/SIDA nian maka ko'alia, la'o furak. Ha'u la sidi.

Horikalan molok ha'u fila ba uma hosi eskritoriu, ha'u hala'o 'internet surfing" ba TEFL, ha'u hetan situs ida maka furak. Furak se karik ha'u iha opotunidade foti "on-line course" ida ne'e. Let us see! .......]

*) Ita rua bele hamutuk iha uma kain ida hanesan feen ho la'en, maibe nu'udar individu, ita iha espasu moris nian ne'ebe keta-ketak. Ita nain rua labele obriga malu atu "tenke sai ema ida deit". Ne'e nu'udar buat ida maka sei nunka akontese. Saida maka ita bele halo maka kria armonia entre ita nain rua, hodi nune'e ida nain rua sei "hananu" hamutuk, hamosu atuasaun duet nian ida ne'ebe ideal tebes.

*) Sa autoridade moral maka ha'u sei iha tan, se karik ha'u rasik la atua iha ita-nia moris ida ne'e ho maneira ida ne'ebe diak, alias moralmente aseitadu?

*) Matenek ha'u buka hetan iha fatin-fatin iha mundu rai klaran. Matenek loke ha'u-nia neon no ha'u-nia fuan. Matenek ne'ebe ha'u hetan sei folin la'ek se karik ha'u rai deit ba ha'u-nia an, no la fahe ba maluk sira seluk.

*) Poeta sira apenas nu'udar dirijente iha "orskestra simfonia moris nian". Sira konvida ita ho laran luak atu "kanta" ho sira. Ita prontu atu hatan ba konvite ne'e ka?

***

AFORISMA DIARIA [6-2-2008]

[Agora ha'u iha fali ona Global Internet Cafe, Caicoli atu atualiza ha'u nia blog. Ha'u la almosu dauk tanba ha'u-nia kabun sei bosu. Ohin ha'u matabixu tarde loos--han manutolun sona, koto no ham iha Cafetaria OB.
Ha'u ba sedu eskritoriu (Amor maka tula hanesan baibain) ohin dadeer iha tuku 7:45 tanba ha'u ho kolega, Marco tenke ba akompana ami-nia Xefe Boot, AK iha reuniaun altu nivel kinzenal iha Palasiu Governu, ne'ebe hala'o iha tuku 8. Enkontru lakaleur deit. Ha'u-nia atuasaun ohin diak liu oituan kompara ho atuasaun sira iha reuniaun sira uluk liuba.

Horiseik loromanas la konsege atualiza ha'u-nia blog iha TT Akait tanba sistema maka variadu. Ha'u somente lee deit. Antes ba Akait, ha'u ba almosu iha Erli. Hasoru Nuno ho Mada. Ami dada lia kona-ba lalaok hakiak oan. Ha'u hatete ba sira katak hakiak oan ne'e buat furak ida, maibe aumesmu tempu nu'udar buat ida 'xatu'. Ha'u dehan tan katak ha'u tenke aprende oinsa maka atu sai aman diak ba ha'u-nia oan mane mesak, Apai maka oras ne'e halo ona tinan 1 fulan 3.

Horiseik tuku 3-5 lorokraik hamutuk ho ha'u-nia kolega, Michael akompana ami-nia Xefe Boot iha reuniaun ida ho NGO Forum. Ha'u-nia atuasaun diak, maibe sidi-sidi oituan. Michael enkoraja liutan hodi dehan katak ha'u-nia atuasaun ne'e eselente. Ami nain 2 nu'udar ekipa diak iha ami-nia fornesimentu servisu hanesan durubasa....]

*) Se ita dehan katak hosi rai ulun to'o rai ikun, tasi feto, tasi mane, lorosa'e to'o loromonu, ita ne'e mesak feton nian, naan nian deit, maibe tanba saida maka han malu--haree malu hanesan loloos busa ho asu?

*) Diak liu ita keta ibun boot resin hodi promete tun, promete sa'e atu hala'o buat ida. Ita-nia nanal ne'e ruin laiha, fasil tebes atu baku ba, baku mai. Ha'u tauk deit katak to'o ikus ita la kumpri saida maka ita promete tiha ona.

***

AFORISMA DIARIA [04-02-2008]

[Ha'u mai fali Global Internet Cafe agora hodi atualiza ha'u-nia blog sira. Foin almosu iha warung Padang Bobonaro. Hasoru kolega sira uluk ami hamutuk iha Yogya: Ilido no Eduardo iha ne'eba.Kleur duni ona maka ha'u la ba han iha warung ne'e. Iha tempu UNTAET ha'u dala ruma ba han iha ne'eba. Antes almosu ha'u lori surat tahan uzadu sira ba iha loja Fotokopia Railakan atu halo kapa. Hasoru primu Andre Koli...

Ha'u husu sedu ba ha'u-nia xefe bainhira ohin reuniaun iha ami-nia eskritoriu iha tuku 9:45 AM tanba ha'u tenke ba Akait hasoru kolega Portugeza, Rute atu hala'o entrevista ba programa RDP 'ao vivo", ne'ebe tuir planu atu hala'o iha tuku 10 AM. To'o iha ne'eba, ha'u sei hein to'o kuaze tuku 11 maka programa foin hahu. Ohin Programa Conversas em Portugues halo nia tinan lima. Ha'u ba iha programa ne'e hanesan poeta Timor-Leste. Tanba tempu la to'o ona, ne'e duni ami ko'alia lalais deit iha final programa ne'e, no ha'u konsege lee poema ida ho titulu "Passaro da Paz", ne'ebe tradus ba Portuges hosi kolega-poeta, Toze Borges iha tinan liuba...]

*) Oinsa loos maka ita atu iha disiplina iha tempu katuas nian se ita rasik la buka atu kuda buat ne'e iha ita-nia an bainhira ita sei ki'ik no iha tempu foin sa'e?

*) Formula pensamentu klasiku tuir mai furak ba ita atu refleta bebeik:
-Ha'u hatene katak ha'u la hatene;
-Ha'u la hatene katak ha'u hatene;
-Ha'u hatene katak ha'u hatene;
-Ha'u la hatene katak ha'u la hatene.

*) Apa Katuas la rai buat barak mai ami, oan sira bainhira nia hakat ba mundu seluk. Nia rai deit kbiit entuziasmu mai ami atu konkista moris ne'e, ne'ebe nakonu ho mutin ho metan. Ami mos hakarak atu transmiti buat ne'e liu ba imi, oan sira hanesan buka'e klamar nian.

*) Hakarak sai poeta alias lia nain? Labele baruk atu sinti duni moruk no midar mundu nian.

***

AFORISMA DIARIA [02-02-2008]

[Ha'u iha fali ona Internet Cafe Global, Caicoli. Foin maka hanorin hotu Ingles III ba estudante sira. Sira balu ne'ebe la tuir dauk ezame mid-semester iha semana rua liuba, ha'u fo tempu atu tuir ezame ohin. Ami hahu ezame iha tuku 1:30. Depois hahu fali aulas hanesan baibain, iha tuku 2:30, no hotu iha tuku 4:00. Ha'u la fo materia foun, maibe ami diskuti kona-ba aprezntasaun sira-nian ne'ebe hato'o iha semana sira liuba; halo koresaun ba sala sira ne'ebe halo iha aspetu gramatika no pronunsia, nst...

Ohin dadeer ba tasi ibun Fatuhada iha tuku 8:00. Tuir loloos atu lori Apai, maibe to'o ikus ha'u desidi la lori ha'u-nia oan ba tasi ibun, tanba loro manas ona. Nia ba ho ha'u ne'e furak ona, maibe ha'u kala sei laiha tempu diak atu tuur halo reflesaun, no ha'u-nia tempu tomak ha'u kala sei dedika tomak hodi tau matan, haree nia maka halai tuun, no halai sa'e iha rai henek leten. Ha'u iha tempu furak atu tuur refleta. Aforisma sira ne'ebe mosu iha edisaun ohin nian nu'udar rezultadu reflesaun ne'ebe ha'u halo ohin iha tasi ibun Fatuhada. Ha'u mos haruka sms poezia oan ida kona-ba Jesus ba kolega sira, no alin Mundo. Mundu fo suporta ha'u hodi dehan, "Cool. Tasi nia panoroma fo inspirasi barak. have nice work." (07:29:18/02-02-2008).....]

*) Jesus--revoltador--revolusionariu/Jesus tuba/Jesus doko/Revolusaun domin, ne'e maka Nia asaun. Labele baruk atu tuir, labele hakotu, iha dalan klaran, ne'e maka Nia husu fila-fila//

*) Biblia: nu'udar bee matan/suli loron, suli kalan/ ha'u kuru, bee la maran/bee ha'u daku ha'u neon/ bee ha'u daku ha'u fuan/ bee halo ha'u hetan matak-malirin//

*) Destinu nasaun nian iha ita hotu nia liman. Se nune'e, entaun mai ita rona malu, mai ita fo laran ba malu. Se la hahu agora, bainhira tan, se la'os ita rasik, se tan?

*) Buat hotu sei la tuun deit hosi lalehan, se karik o la haka'as an to'o kosar metan suli atu hetan buat ida ne'ebe o hakarak.

*) Rai sabutar/manu kokorek ona/lakaleur rai hun mutin/lakaleur loro matan mosu/Belun, o prontu ona atu hadeer, o prontu ona atu ka'er rasik o-nia destinu?//

*) Laloran tasi/Baku ba ninin/ Hamosu furin/Rai henek bokon/Panorama ida maka furak/Ha'u tuur, rona ho hakmatek/ Ha'u tuur, hanoin ho neon luan/Nai, aban O sei fo fali tempu mai atan ha'u atu mai iha tasi ibun?//

*) Ita-nia isin presiza vitamina, presiza aihan murak. Ita-nia klamar?

*) LAMENTATION OF A MOTHER: 1) Oan, o dook tiha ona/o dook hosi ha'u-nia sorin/se loos maka ha'u atu tau neon tan?/se loos maka ha'u atu tau laran tan? 2) Ka'er metin ba o-nia lia fuan kmanek/ halo ha'u laran haksolok/hanoin fali ba o-nia hahalok kleuk/halo ha'u laran taridu/Oan, keta lokok an resin!/Keta haluha hun mak se, keta haluha abut maka se!//

***